Спрэчны момант у матчы зборнай Украіны: арбітр не прызначыў пенальці, які мог пазбавіць Італію Еўра
І нават не звярнуўся да VAR.
20 лістапада ў апошнім для сябе матчы кваліфікацыі Еўра-2024 зборная Украіны згуляла ўнічыю з Італіяй – 0:0.
На 90+3-й хвіліне Украіна праводзіла адну з апошніх атак, падчас якой вінгер Міхаіл Мудрык прыняў мяч у штрафной, кінуў сабе на ход, але ўпаў на газон пасля кантакту з нагой італьянскага хаўбека Браяна Крыстантэ.
Галоўны арбітр сустрэчы іспанец Хесус Хіль Мансана палічыў, што ў тым моманце не было парушэння і не прызначыў пенальці. Таксама ён не скарыстаўся сістэмай VAR, каб удакладніць свой вердыкт. Гэты момант выклікаў шквал пытанняў і крытыкі на адрас рэферы.
На прэс-канферэнцыі пасля матча галоўны трэнер зборнай Украіны іранізіраваў, што нават на VAR арбітры маглі не ўбачыць парушэння правілаў:
«Я таксама лічу, што там быў чысты пенальці, але ёсць VAR . На мой погляд, гэта быў адзінаццаціметровы. Але гэта вырашалі не мы. Мусіць, пры праглядзе VAR не ўбачылі б фола. Там ёсць людзі, якія глядзяць», – сказаў Сяргей Раброў.
Эпізод абмяркоўвалі і італьянскія аглядальнікі. Сярод іх знайшліся і тыя, хто ўгледзеў фол з боку Крыстантэ.
Адзін з аўтарытэтных італьянскіх журналістаў Паола Дзіліяні да скрынаў з фолам на Мудрыку дадаў словы прэзідэнта УЕФА Аляксандра Чаферына аб тым, што Італія павінна згуляць на Еўра-2024:
Маўрыцыа Пістокі, які больш за 40 гадоў аглядае італьянскі футбол і мае больш за 200 тысяч падпіснікаў у твітары, так пракаментаваў эпізод:
«Розніца паміж заўзятарам і журналістам павінна палягаць у тым, каб выказаць правільнае меркаванне, каментуючы вырашальны і сенсацыйны эпізод: Крыстантэ на Мудрыку – гэта відавочны фол, правае калена па левай назе. Відавочная памылка, VAR павінен быў умяшацца».
Звярнулі ўвагу на эпізод і найбуйнейшыя спартыўныя медыя. ESPN з аўдыторыяй у 11,8 млн чытачоў паказаў скрын кантакту Мудрыка з Крыстантэ:
«Украіна не атрымала пенальці пасля гэтай атакі на Мудрыка ў кампенсаваны час супраць Італіі. Перамога вывела б Украіну на ЕЎРА-2024. Італія ўжо афіцыйна прайшла кваліфікацыю, але Украіна будзе мець шанец прайсці праз раўнд плэй-оф».
SPORTbible з аўдыторыяй 2,1 млн зрабіла падобнае паведамленне:
«Украіна не атрымала пенальці на 92-й хвіліне пасля атакі на Міхаіла Мудрыка. Перамога вывела б Украіну, але зараз Італія афіцыйна прайшла кваліфікацыю пасля нічыёй 0:0.
Ноч, якую варта забыць, для ўсіх арбітраў».
Што тычыцца ўкраінскіх аматараў футбола, яны літаральна наваднілі сацсеткі UEFA. Самымі папулярнымі былі згадкі, што UEFA – гэта мафія, а таксама што Украіну проста «абрабавалі» такім рашэннем.
А вы як лічыце, ці быў пенальці ў гэтым моманце?
