Беларуская скакуха з шастом здымае відэа на сотні тысяч праглядаў, але рэкорды ставіць пры пустых трыбунах – яе гэта засмучае
Хоча змяніць сітуацыю.
Днямі беларуская шаставічка 13-разовая чэмпіёнка Беларусі на адкрытым паветры Ірына Жук выклала відэа, у якім скардзіцца, што ёй даводзіцца ставіць рэкорды краіны пры пустых трыбунах.
Дзяўчына, якая актыўна вядзе свае сацыяльныя сеткі, заявіла, што будзе радая, калі пасля прагляду відэаролікаў, у якіх яна расказвае пра свой від спорту, на стадыён прыйдзе хаця б 50 чалавек. Гэтая прамова набрала амаль чвэрць мільёнаў праглядаў у TikTok - праўда, абмеркавання вакол яе не здарылася, бо спартсменка закрыла каментары.
Што яшчэ размяшчае ў сваіх сацсетках 30-гадовая шаставічка, каб прыцягнуць на трыбуны стадыёнаў беларускіх заўзятараў? У большасці відэа яна паказвае свае трэнаванні. Напрыклад, найболей праглядаў сабраў ролік, у якім Жук паказвае спробу сагнуць вельмі жорсткі жэст. Яго прагледзелі больш за 2 мільёны разоў.
Амаль мільён праглядаў сабраў ролік, дзе дзяўчына паказвае ключавыя этапы свайго трэнавання.
Наступным па папулярнасці ідзе відэа з рэкордам Беларусі, якое сабрала амаль 600 тысяч праглядаў і 213 каментароў.
Спартсменка таксама распавядае пра сваё асабістае жыццё з прарэжымным падпісантам Віталём Жуком, але такія відэа не карыстаюцца вялікай папулярнасцю – усяго 33 тысячы праглядаў пад адным з іх.
Часам Жук дэманструе незвычайную логіку. Напрыклад, з таго, што не зачапіла нікога з дзяцей шастом на трэнаванні, робіць выснову, што любіць дзяцей і будзе добрай мамай.
Спартсменка не абмяжоўваецца публікацыяй гатовых відэа, але і праводзіць стрымы, падчас якіх адказвае на пытанні карыстальнікаў. Калі ў Жук пацікавіліся адрозненнем рускай і беларускай моў, яна адказала, гэта абсалютна розныя мовы, і распавяла гісторыю пра шуфлядку.
Яшчэ больш кантэнту шаставічка посціць у сваім інстаграм. Там можна знайсці парады па хатніх трэнаваннях, развагі наконт таго, што такое талент, а яшчэ даведацца пра запаведзі спартсменкі.
