IBA заклікала МАК адмяніць кваліфікацыйны статус Еўрапейскіх гульняў-2023

Міжнародная асацыяцыя бокса (IBA) заклікала Міжнародны алімпійскі камітэт (МАК) адмяніць адбор для ўдзелу ў Алімпіядзе-2024 праз Еўрапейскія гульні-2023.

«Пасля рашэння Еўрапейскага алімпійскага камітэта (ЕАК) адхіліць расейскіх і беларускіх спартоўцаў ад Еўрапейскіх гульняў-2023, што сур'ёзна пагаршае шанцы гэтых спартоўцаў кваліфікавацца да АГ-2024, IBA заклікае МАК адмяніць кваліфікацыйны статус гэтых спаборніцтваў.

МАК прызнаў гэта кваліфікацыяй для Еўропы, што цалкам супярэчыць пазіцыі МАК у адносінах да расійскіх і беларускіх спартсменаў, паколькі гэтыя атлеты не змогуць выступаць на Еўрапейскіх гульнях-2023 і ім будзе адмоўлена ў магчымасці адабрацца на Гульні ў Парыжы.

Па гэтай прычыне Еўрапейскія гульні-2023 больш не могуць заставацца прызнанымі МАК адборачнымі спаборніцтвамі да Алімпіяды і павінны быць ануляваны, каб супрацьдзейнічаць дыскрымінацыйным дзеянням, зробленым Еўрапейскім алімпійскім камітэтам па рэкамендацыях, зробленым на апошнім пасяджэнні Выканкама МАК.

IBA пацвярджае сваю прыхільнасць справядлівым магчымасцям усіх спартоўцаў незалежна ад іх нацыянальнасці і будзе адстойваць правы кожнага з іх.

Павінен пераважаць падыход «спартсмен на першым месцы», і ў нашым спорце не павінна быць месца палітыцы, і IBA дэманструе гэта сваімі дзеяннямі.

Сістэма алімпійскай кваліфікацыі IBA была адобрана Выканаўчым камітэтам МАК 1 красавіка 2022 года.

IBA настойвае на тым, што гэтая сістэма засноўвалася на справядлівасці, яснасці і адкрытасці, а таксама выніках спартоўцаў на спаборніцтвах IBA, у прыватнасці чэмпіянаце свету, – гаворыцца ў заяве.

Еўрапейскія гульні-2023 пройдуць у Польшчы з 21 чэрвеня па 2 ліпеня 2023 года. Улады Польшчы пацвердзілі, што прадстаўнікі РФ і РБ не будуць дапушчаны да гэтых спаборніцтваў.

У лютым гэтага года МАК пацвердзіў, што IBA не будзе ўдзельнічаць у алімпійскай кваліфікацыі па боксе.