Нагельсман узначаліў зборную Германіі
Нямецкі футбольны саюз абвясціў пра прызначэнне Юльяна Нагельсмана галоўным трэнерам зборнай Германіі.
Кантракт з 36-гадовым немцам разлічаны да 31 ліпеня 2024 года. Гэта значыць былы коўч «Баварыі», «РБ Лейпцыга» і «Хофенхайма» будзе кіраваць камандай на Еўра-2024, якое пройдзе летам наступнага года ў Германіі.
Раней паведамлялася, што Нагельсман будзе атрымліваць 4 мільёны еўра ў год у зборнай Германіі, а яго кантракт з «Баварыяй», які да гэтага часу дзейнічаў і прыносіў Юльяну 7 мільёнаў еўра ў год, скасавалі без кампенсацыі. Пасля Еўра-2024 ён зноў стане вольным агентам.
У зборнай Нагельсман замяніў Ханс-Дзітэра Фліка, звольненага пасля паражэння 1:4 ад Японіі ў таварыскім матчы і ўсяго толькі 4 перамог у апошніх 17 сустрэчах.
Асістэнтамі Нагельсмана будуць Сандра Вагнер і Бенджамін Глюк.
