Фаны «Легіі» напалі на паліцыю пад стадыёнам «Астан Вілы» – 3 паліцэйскіх паранілі, арыштавалі каля 40 чалавек

Перад матчам польскі клуб быў незадаволены, што «Віла» вырашыла на падставе рэкамендацый паліцыі і Кансультатыўнай групы па бяспецы скараціць колькасць гасцявых фанаў на стадыёне да 890 чалавек. Правілы УЕФА дазваляюць камандзе гасцей заняць 5% трыбун ад умяшчальнасці стадыёна – гэта 2 100 квіткоў на «Віла Парк».

«Легія» абвінаваціла «Астан Вілу» у парушэнні рэгламенту і прапанавала кампраміснае рашэнне – вылучыць 1700 квіткоў для польскіх фанатаў. Менавіта столькі ж было англійскіх прыхільнікаў на першым матчы паміж камандамі ў Польшчы.

За месяц да гульні ў Англіі «Легія» атрымала ліст аб скарачэнні квоты да 890 чалавек. Польскі клуб дасылаў скаргі, але не дасягнуў дамоўленасці з «Вілай».

Фаны «Легіі» накіраваліся ў «Віла Парк» перад пачаткам матчу, але там паліцэйскія размясцілі бар’еры і сфарміравалі жывы шэраг праваахоўнікаў у шлемах. Палякі спрабавалі прарвацца на стадыён, аднак паліцыя супраціўлялася. Падчас сутычкі фаны запускалі сігнальныя ракеты, увогуле паранілі 3 паліцэйскія.

Паліцыя змагла не дапусціць польскіх фанатаў на стадыён, акрамя невялікай групы людзей. У выніку сутыкненняў паліцыя Бірмінгема правяла каля 40 арыштаў.

«Астан Віла» пасля гэтага інцыдэнту заявіла, што ні адзін фан «Легіі» не патрапіў на стадыён. Клуб патлумачыў, што прымаў рашэнне аб скарачэнні колькасці польскіх заўзятараў, улічваючы іх паводзіны ў Алкмары ў мінулым месяцы, дзе яны таксама ўчынілі сутычкі.