Усевалад Садоўскі: «Жыццёвыя мэты пазначаю ў сшытку, у 2023-м закрыў два пункты»
Беларускі футбаліст «Ардабасы» Ўсевалад Садоўскі падвёў вынікі сезона-2023.
– На жаль, з-за траўмы не згуляў у кубкавым фінале з «Тоболом», а вельмі хацеў. Акрамя таго, прапусціў пяць апошніх сустрэч галоўнага ўнутранага турніру. Сустрэў чэмпіёнства на хатняй трыбуне ў Шымкенце. Усё ж недасказанасць прысутнічае...
– Пры гэтым вы сказалі, што мінулы сезон – лепшы ў кар'еры.
– Адназначна, нават пры тым, што для мяне яго канцоўка атрымалася непрыемнай. Па-першае, мы сталі чэмпіёнамі. Па-другое, здзейсніў мару – прыняў удзел у еўракубках, няхай гэта і была кваліфікацыя Лігі канферэнцый. Да таго ж у тых матчах забіў. У сшытку, у якім пазначаю жыццёвыя мэты, у сезоне-2023 зачыніў адразу два пункты.
– Наколькі складаным супернікам для «Ардабасы» стала ў другім раўндзе кваліфікацыі Лігі канферэнцый польская «Легія», прайсці якую не ўдалося?
– Раскажу гісторыю. Разам з Акмалем Бахціяравым, з якім жыў у адным пакоі на працягу двух гадоў, глядзелі лёсаванне. Як толькі стала зразумела, хто наш супернік, сказаў аднаклубніку, што забʼю і дома, і ў Варшаве. Бо гэта блізка ад дома – на матч прыедуць родныя і сябры. Тады мы пасмяяліся, але ў выніку я, атрымліваецца, слова стрымаў.
Думаў, «Легія» мацней, чым аказалася насамрэч. Каманда гуляе сама і дае гэта рабіць суперніку. Шанцы прабіцца ў трэці раунд меліся. У першым матчы дома вялі 2:0, маглі забіць яшчэ раз. Здарылася б так – шанцаў адыграцца ў палякаў ужо не было б. Ды і да судзейства ёсць пытанні: упэўнены, другі гол у нашы вароты забілі з афсайду. І пенальці ў нашу карысць арбітр ставіць не захацеў, хаця падставы меліся, – распавёў Садоўскі.
