Сяднёў пра экс-гульца ЧБ Ражка, які загінуў у вайне з Расіяй: «Вельмі рады, што мне выпаў гонар папрацаваць з гэтым футбалістам і чалавекам»
Экс-трэнер «Белшыны» Аляксандр Сяднёў у інтэрв'ю тэлеграм-каналу «О, спорт! Ты – мир!» падзяліўся ўспамінамі пра былога падапечнага Сяргея Ражка. 24 студзеня ён загінуў на вайне, якую з 24 лютага 2022 года Расія працягвае ва Украіне з выкарыстаннем тэрыторыі Беларусі.
– Раніцай у чацвер мой памочнік перад традыцыйнай трэнерскай нарадай паведаміў гэтую навіну. Вядома, вельмі вялікі боль і смутак. Гэтага хлопца магу занесці ў разрад маіх самых улюбёных гульцоў. Па сукупнасці і гульнявых, і чалавечых якасцей.
Калі сапраўды, калі мне прапанавалі яго ў «Белшыну», у мяне была асцярога, што Сяргей, які ўжо пагуляў, не будзе досыць матываваны. Плюс ён быў ужо немалады. Але ў выніку я аказаўся прыемна здзіўлены тым, як ён паводзіў сябе на полі, мне прыемны быў наш саюз, які доўжыўся сезон. На полі ён быў чалавекам справы, нешматслоўным. А калі нешта і казаў, то дакладна, па справе.
Ён ніколі не скардзіўся на траўмы. Мне здавалася, што калі ў яго адарвецца нага, ён прынясе яе і скажа: «Паслухай, Сяргеевіч, дай мне два дні. Прыш'ю на месца і зноў буду гуляць». Гэта чалавек, які боль мог адчуць толькі праз некалькі дзён пасля стыку ці пашкоджання. Ведаю, што ён і з траўмамі гуляў. Сам сабе дыягназы ставіў. Лекар мог мне казаць, што Сяргея трэба здымаць з гульні, не пускаць на трэніроўку, інакш быць бядзе. На што Серы заўважаў: «Не, здымаць можна толькі на фотаапарат. А я буду працаваць далей».
Светлая памяць Сяргею. Ведаў яго і вельмі рады, што мне выпаў гонар папрацаваць з гэтым футбалістам і чалавекам, – распавёў Сяднёў.
