Ковель пра кубкавы матч супраць «Тарпеда-БелАЗ»: «Хто выйграе адзінаборствы – перамагае ў матчы»
Паўабаронца «Іслачы» Максім Ковель падзяліўся эмоцыямі пасля матчу з «Тарпеда-БелАЗ» (1:1), у якім яго каманда аформіла выхад у фінал Кубка Беларусі.
– Ці не збянтэжыў каманду прапушчаны гол, дзякуючы якому «Тарпеда» зраўняла лік у супрацьстаянні?
– Не-не, зусім не збянтэжыў. Мы былі эмацыйна гатовыя. Блін... Нават не ведаю, што яшчэ сказаць:) эмоцыі бяруць верх!
– У «Іслачы «была няпростая серыя ў чэмпіянаце: паядынкі з «Нёманам», БАТЭ. Як рыхтаваліся ў такім напружаным графіку да вырашальнага матчу паўфіналу?
– Рыхтуемся да кожнай каманды індывідуальна, дасканала разбіраем суперніка. Ведалі, што нас чакае.
– На апошняй хвіліне другога дадатковага тайма паўстала гарачая разборка з гульцамі «Тарпеда». Эмоцыі пасля незалічанага гола жодзінскай каманды ці нешта іншае адбылося?
– У абедзвюх каманд эмоцыі зашкальвалі, усе хацелі выйграць. Думаю, гэта больш момант драйву.
– Здалося, што «Іслач» грубавата гуляла ў першым тайме...
– Хто выйграе адзінаборствы – перамагае ў матчы.
– Што першае зрабілі гульцы «Іслачы» ў распранальні пасля матчу?
– Усё было спакойна. У нас яшчэ фінал наперадзе, трэба падысці ў поўным узбраенні! Аднаўляем эмоцыі.
– Днямі «Іслач» даведалася сваіх патэнцыйных апанентаў па першым раўндзе кваліфікацыі Лігі канферэнцый. Ці сочыце за гэтым?
– Не, у камандзе мы пакуль нават пра гэта не казалі. У нас цяпер тут – Кубак і чэмпіянат краіны, рыхтуемся да іх.
– Ці будзе «Іслач» неяк адзначаць пуцёўку ў фінал?
– Пакуль усе думкі накіраваны на падрыхтоўку да наступных няпростых гульняў, – сказаў Ковель.
