«Мінспорту» загадвае АБФФ ужо пісьмова і з тэрмінамі: Д3 пакінуць і ўзгадніць, адказаць за грошы і курсы для трэнераў
ФІФА і УЕФА зноў не заўважаць?
Канфлікт рэжымнага міністэрства па спорце і АБФФ – ужо не сакрэт. Ён доўжыцца даволі даўно, а нядаўна зʼявілася і канкрэтная нагода: у федэрацыі збіраюцца праводзіць розыгрыш у трэцім дывізіёне ў новым фармаце, вылучыўшы жа таго ж чацвёрты дывізіён, а рэжымны «міністр» Сяргей Кавальчук патрабуе пакінуць усё як было. Мы ўжо падрабязна пісалі пра дэталі.
Але, як аказалася, гэта не ўсё. А самае цікавае – што фіксацыя прэтэнзій «мінспорту» існуе ў пісьмовым выглядзе. У распараджэнні «Трыбуны» аказаўся дакумент, які рэжымнае ведамства рассылае па спартыўных упраўленнях выканкамаў Лукашэнкі. Гэта так званая пастанова калегіі «Аб удасканаленні сістэмы развіцця футбола ў Рэспубліцы Беларусь», якую ў «мінспорта» праводзілі 26 сакавіка. Папера падпісаная Кавальчуком – а ў тэксце змяшчаюцца прамыя загады на адрас АБФФ. Цяпер вечнае ўмяшанне дзяржавы ў працу федэрацыі замацаванае дакументальна – зрэшты, напэўна ФІФА і УЕФА зноў адшукаюць нагоду заплюшчыць вочы на парушэнне сваіх жа правілаў (каб сітуацыя выйшла на міжнародны ўзровень, патрэбна ініцыятыва беларускай федэрацыі, але наўрад ці там нехта захоча рызыкаваць свабодай, падстаўляючы рэжым пад новыя санкцыі).
Мы ж раскажам, што так не падабаецца Кавальчуку і чаго ён патрабуе ад федэрацыі.
У дакуменце «мінспорта» ўказваецца, што беларускі футбол знаходзіцца «ў нездавальняючым стане» – гэта, маўляў, паказаў спецыяльны аналіз, праведзены «па даручэнні» Лукашэнкі (без яго, вядома, устанавіць сістэме гэта было немагчыма). Згадваецца і канкрэтная дата ўзнікнення гэтых даручэнняў – ёсць спасылка на іх пратакол «ад 4 чэрвеня 2021 г. №7». Праўда, знайсці інфармацыю пра цікавасць Лукашэнкі да футбола ў той дзень у публічнай прасторы не атрымліваецца – разнос ён праводзіў ужо ў верасні, а наогул займаецца гэтым рэгулярна (праблемы чамусьці нікуды не знікаюць).
АБФФ абвінавачваецца ў тым, што «шмат у чым фармальна» падыходзіць да рэалізацыі нейкага «плана мерапрыемстваў», які павінен развіць беларускі футбол. 2 лютага ў «мінспорта» ужо была дакладна такая ж прэтэнзія на аналагічнай «калегіі». Цяпер Кавальчук пісьмова пастанавіў «указаць АБФФ на неабходнасць безумоўнага выканання плана». Што ж за план такі? А невядома – у доступе ёсць толькі «16 пунктаў Кавальчука» з пашыранай «калегіі» з лютага 2023-га, «развіцця» у якіх не праглядаецца.
Цяпер да канкрэтыкі са свежага дакумента. Там «мінспорта» заяўляе, што статут АБФФ «і іншыя нарматыўныя акты» не адпавядаюць «заканадаўству Рэспублікі Беларусь» – і патрабуюць выправіць гэта да 1 чэрвеня 2024 года. Асобна адзначана, што АБФФ «не ўпаўнаважаная выконваць патрабаванні міжнародных спартыўных арганізацый у парушэнне» рэжымных законаў. У статуце АБФФ сапраўды напісана, што яна выконвае рэгламенты і рашэнні ФІФА і УЕФА – гэта, уласна, дазваляе беларускай федэрацыі ўваходзіць у міжнародныя структуры.
Асобна Кавальчуку не падабаецца, што АБФФ самастойна праводзіць трэнерскія курсы. Яшчэ ў кастрычніку 2023-га «Трыбуне» стала вядома, што рэжым хоча абавязаць беларускіх трэнераў праходзіць «павышэнне кваліфікацыі» ў БДУФК пад пагрозай унясення ў «чорны спіс» у белфутболе, а ў 2024-м трэнеры «вышкі» ўжо давалі справаздачу аб «гадавых планах» перад спецыяльнай «камісіяй».
Але Кавальчук хоча павелічэння ўплыву рэжымнага БДУФК. У свежым дакуменце нагадваецца, што гэта «адзіная профільная ўстанова, якая рыхтуе трэнераў па футболе з вышэйшай адукацыяй» у Беларусі, дзе «на дзяржаўным узроўні выбудавана сістэма падрыхтоўкі і павышэння кваліфікацыі трэнерскіх кадраў». Пасля такіх «аргументаў» Кавальчук указвае АБФФ на «неабходнасць да 1 чэрвеня 2024 г. вывучэння пытання правядзення трэнерскіх курсаў АБФФ на базе БДУФК для атрымання спецыялізаваных дыпломаў УЕФА». Засталося яшчэ як-небудзь пераканаць УЕФА замест ліцэнзій па ўласнай трэнерскай канвенцыі раптоўна прызнаваць звычайныя дыпломы па беларускай прапагандысцкай праграме – тады «мінспорта» дакладна будзе дастаткова.
Відавочна Кавальчука бударажаць грошы. Па-першае, тыя, якія АБФФ атрымлівае ад УЕФА: у дакуменце пазначана, што сродкамі, маўляў, трэба больш актыўна дзяліцца з абласнымі федэрацыямі і павялічваць іх штат за кошт «аптымізацыі» ў самой АБФФ. Яшчэ адно абвінавачванне – што ў белфутболе нібыта не вырашана пытанне з тым, каб «прадугледжваць фінансаванне» на развіццё «масавага і дзіцячага спорту».
Хвалююць псеўдаміністра і іншыя прыбытковыя артыкулы АБФФ. Адзін з іх – ізноў жа, трэнерскія курсы. Напрыклад, навучанне на катэгорыю УЕФА Pro, якая па агульных правілах «міжнароднікаў» патрэбна для працы ў Д1 еўрапейскіх краін, у АБФФ каштуе пяць тысяч еўра (адзначым, што за амаль два гады працэсу). Не падабаецца Кавальчуку і тое, што федэрацыя сёлета рэзка павялічыла заявачныя ўнёскі для клубаў, патлумачыўшы гэта «павышэннем затрат на правядзенне чэмпіянату». Чынуша запатрабаваў у АБФФ да 8 красавіка «прадставіць абгрунтаванне» цаны трэнерскага навучання і памеру ўзносаў.
Больш за тое, Кавальчук даручыў свайму намесніку Аляксандру Барауле «накіраваць афіцыйныя запыты ў дзяржаўныя органы», ад якіх патрабуюцца адказы: а) ці законна АБФФ падвышае кошт удзелу ў сваіх жа турнірах; б) ці можна ў прынцыпе федэрацыі вучыць трэнераў. А яшчэ Барауля павінен да 8 красавіка прыдумаць «міжведамасную рабочую групу», якая, па задуме Кавальчука, будзе ацэньваць «эфектыўнасць выкарыстання фінансавых сродкаў» на «развіццё футбола» ва ўсіх яго відах – і асобна «правядзення трэнерскіх курсаў» на ліцэнзіі УЕФА.
Аляксандр Барауля злева
Ужо асветлены канфлікт па фармаце Д3 таксама прапісаны ў свежым дакуменце. Там «мінспорта» ўказвае, што «пашырэнне геаграфіі ўдзельнікаў другой лігі» – гэта, маўляў, адно з даручэнняў Лукашэнкі з 2021-га (зноў жа, публічна такога не было чуваць). Таксама нагадваецца, што фармат Д3 з дзяленнем па абласцях замацаваны ў яшчэ базанаўскай «канцэпцыі развіцця на доўгатэрміновую перспектыву» да 2028 года (памятаеце яшчэ такую?).
Што «масавы» фармат прынёс кучу разгромаў з двухзначным лікам і тэхнічных паражэнняў праз недаезды, «мінспорта» не хвалюе – Лукашэнка ж у 2021-м, аказваецца, даручыў «стварыць ва ўсіх раённых цэнтрах і населеных пунктах з колькасцю насельніцтва не менш за 6 тыс. чал. аматарскіх футбольных каманд і ўмоў для іх удзелу ў спаборніцтвах АБФФ на высокім арганізацыйным узроўні» (і гэтая «праца», як паказваецца, яшчэ не завершаная). Цяпер федэрацыя, зрэшты, не адмаўляецца ад абласнога ўзроўню цалкам – збіраецца проста панізіць яго ў статусе, абʼяднаўшы зусім ужо аматараў Д4. Але Кавальчук абураны тым, што гэта «не ўзгаднілі з мясцовымі органамі» кіравання рэжыму, якія, маўляў, «нясуць асноўную фінансавую нагрузку».
Вынік – прамы загад ад Кавальчука: дзяленне на Д3 і Д4 «лічыць немэтазгодным». А «мінспорта» на адрас АБФФ «пастанавіла да 12 красавіка распрацаваць і ўнесці на ўзгадненне рэгламент правядзення другой лігі, захаваўшы фармат 2022-2023 гг.». Адзначым, што федэрацыі паказальна пляваць на гэта – «калегія» з удзелам вярхоў АБФФ прайшла 26 сакавіка, а 3 красавіка ў Доме футбола прайшло лёсаванне Д3 па новым фармаце (рэжым ужо пайшоў ціснуць на клубы).
Відавочна, згаджацца на ўмовы адзін аднаго ні «мінспорта», ні АБФФ не маюць намеру. Але камусьці ў выніку давядзецца саступіць.
Як думаеце, каму?
