Зяленскі накіраваў ліст Макрону: «Рыхтуючыся да Алімпіяды, мы павінныя быць упэўненыя, што Расія не зможа выкарыстаць яе для прапаганды агрэсіі»
Прэзідэнт Украіны Уладзімір Зяленскі падчас свайго традыцыйнага звароту, расказаў аб лісце прэзідэнту Францыі Эмануэлю Макрону.
«На фоне пастаянных расійскіх тэрарыстычных удараў па нашых гарадах і сёлах, на фоне пастаянных расійскіх штурмаў, якія спрабуюць не пакінуць проста ніводнай цэлай сцяны, нават шакіруе, што даводзіцца пераконваць міжнародных спартыўных бюракратаў адмовіцца ад якой-небудзь падтрымкі дзяржавы-тэрарыста.
Спробы Міжнароднага алімпійскага камітэта вярнуць расійскіх спартоўцаў на спаборніцтвы і Алімпійскія гульні – гэта спроба сказаць усяму свету, што тэрор можа быць нечым прымальным. Як быццам можна заплюшчыць вочы на тое, што Расія робіць з Херсонам і Харкавам, з Бахмутам і Аўдзееўкай.
Сёння накіраваў ліст спадару Прэзідэнту Макрону якраз з гэтай нагоды і ў працяг нашай з ім размовы, якая адбылася 24 студзеня.
Рыхтуючыся да парыжскай Алімпіяды, мы павінны быць упэўненыя ў тым, што Расія не зможа выкарыстаць яе ці іншую міжнародную спартовую падзею для прапаганды агрэсіі ці свайго дзяржаўнага шавінізму.
У першай палове XX стагоддзі ў Еўропе было дапушчана занадта шмат памылак, якія прывялі да страшных трагедый. Была і значная алімпійская памылка. Алімпійскі рух і дзяржавы-тэрарысты дакладна не павінны перасякацца.
Я дзякую ўсім, хто дапамагае абараняць нашых людзей ад расійскага тэрору! Дзякуй кожнаму і кожнаму, хто адважна абараняе Украіну ў шэрагах нашых сіл абароны і бяспекі!
Светлая памяць усім, хто змагаўся за незалежнасць і цэласнасць Украіны ў баі пад Крутамі і ў кожнай іншай бітве, якія дапамаглі нашаму народу захавацца і здабыць сваю ўласную дзяржаву!
Слава Украіне!», – Сказаў Зяленскі.
Нагадаем, што многія беларускія каманды і спартоўцы былі адхіленыя ад міжнародных спаборніцтваў у адказ на вайну, якая з 24 лютага працягваецца Расіяй ва Украіне з выкарыстаннем тэрыторыі Беларусі. 25 студзеня МАК дапусціў магчымасць зняцця адхілення на строгіх умовах, сярод якіх удзел у спаборніцтвах толькі ў нейтральным статусе і адсутнасць у біяграфіі «актыўнай падтрымкі» вайны ва Украіне.
