Iвулiн пра затрыманне Nizkiz: «Летась моцна здзівіўся, што яны застаюцца ў Беларусi, але гэта ўласны выбар дарослых людзей»
Беларускі журналіст Аляксандр Івулін у сваiм Instagram пракаментаваў затрыманне «сілавікамі» Лукашэнкі трох удзельнікаў гурта Nizkiz.
«Летась выпадкова апынуўся на канцэрце Nizkiz у Лімасоле.
Пасля выступу ў галаве была адна думка: калi б усё было па правілах, тады замест маленькага клуба на Кіпры гэтыя хлопцы лёгка збіралі б стадыёны.
Паціснулі рукі, крыху пабалбаталі. Калі шчыра, моцна здзівіўся, што амаль усе ўдзельнікі гурта застаюцца ў Магілёве.
– Ох, рабятушкі, беражыце сябе.
– Саш, ты таксама.
Атрымалася так сабе.
Відавочна, рэліз новага альбома, над якім працавалі пацаны, адкладаецца на салідны тэрмін.
Зараз менш за ўсё хочацца вінаваціць хлапцоў у інфантылізме. Гэтага хапае і ў Твітары, і ў Фэйсбуку, дзе шмат хто павёўся на прапагандысцкі наратыў пра «раптоўнае вяртанне». Разумею эмоцыі, але гэта ўласны выбар дарослых людзей.
Я ж папрашу тых, хто чытае гэты тэкст, не забываць пра салідарнасць і ўласную бяспеку. Тры галоўныя пойнты:
– «Палочно-галочная» рэпрэсіўная сістэма не думае спыніцца. Асабліва ў гэты год якасці.
– Ніякія дамоўленасці не працуюць.
– Не трэба вам гэты зонаўскі досвед.
Сіл хлопцам. У краіне па-ранейшаму «Небяспечна», – напісаў Івулін.
