Асанаў паказаў наступствы ліўняў у Дубаі – за суткі там выпала больш за гадавую норму ападкаў
Ваду з дому прыйшлося прыбіраць вёдрамі.
Наймацнейшыя праліўныя дажджы і ўраганны вецер абрынуліся на краіны Персідскага заліва. Праз стыхію ўжо вядома пра гібель як мінімум 20 чалавек, больш за ўсё ахвяр зафіксавана ў Амане.
Не абмінула стыхія і Аб'яднаныя Арабскія Эміраты, дзе 16 красавіка пачалася наймацнейшая паводка праз моцныя залевы. Дарогі ў горадзе ператварыліся ў рэкі, затапіла дамы, офісы і гандлёвыя цэнтры. Была спаралізаваная праца Міжнароднага аэрапорта Дубая – другога ў свеце па абароту пасажыраў.
У Дубаі ў аўторак выпала рэкордная колькасць ападкаў (100 мм пры гадавой норме 97 мм) за ўсе 75 гадоў назіранняў. У сярэднім па ААЭ штогод выпадае 140-200 мм. Сярэднямесячная норма для красавіка складае каля 8 мм.
Стыхійнае бедства заспеў у Дубаі беларускі баксёр Дзмітрый Асанаў, які пражывае і праводзіць трэнінгі ў ААЭ. Наступствамі паводкі ён падзяліўся ў сваёй інстаграме. Вось так у Дубаі ў першы дзень залеваў выглядалі вуліцы:
Вада прарывалася на крытую паркоўку:
І ў апартаменты, дзе жыве Асанаў з сям'ёй:
Праз непагадзь Асанаву давялося адмяніць усе персанальныя трэнінгі, але без справы ён не застаўся. Пабаксаваць з татам пагадзіўся яго маленькі сын Цімафей. Атрымалася пацешна:
Нацыянальнае ўпраўленне па надзвычайным сітуацыям ААЭ раней выпусціла папярэджанне з заклікам да мясцовых жыхароў заставацца ўдома. Тых, для каго гэта магчыма, папрасілі не ездзіць у офісы, а прыватным школам рэкамендавалі перайсці на дыстанцыйнае навучанне. Па стане на 18 красавіка дождж скончыўся, а камунальныя службы змагаюцца з наступствамі.
