«Зорны мяч 2016» будзе беларускамоўным і з нацыянальным адценнем ФОТА

Закрыццё футбольнага сезону 2016 году "Зорны мяч" будзе беларускамоўным і нацыянальнаарыентаваным, аб чым можна казаць па здымку, на якім прадстаўлены бэйджы прэсы і запрашальнікі. Па інфармацыі, якая маецца на сённяшні дзень, гэта будзе не адзінае выкарыстанне беларускай мовы і культуры на мерапрыемстве, дзе збяруцца найлепшыя гульцы Беларусі і людзі, што робяць беларускі футбол лепшым і цікавейшым і якое адбудзецца 5 снежня.

Для параўнання, "Зорны мяч 2015" (а дакладней "Звёздый мяч 2015") быў цалкам рускамоўным - толькі Мікалай Януш, найлепшы бамбардзір беларускага чэмпіянату 2014 і 2015 гадоў рабіў свае прамовы па-беларуску.

Як бачым АБФФ працягвае паслядоўна беларусізаваць беларускі футбол, надаючы яму адметнасць і нацыянальны каларыт, аб чым кажа не толькі закрыццё сезону, але і сам сезон - "Белыя Крылы", вышыванка на форме, беларускамоўная атрыбутыка і паліграфія, не менш за 50% трансляцый беларускага чэмпіянату па ТБ па-беларуску і іншае выкарыстанне беларускай мовы і нацыянальнай культуры - не на словах, а на справе даказваюць гэта, за што вялікая падзяка ўсім супрацоўнікам АБФФ, што датычныя да гэтага.

Беларускі чэмпіянат і нацыянальная каманда робяцца сапраўды беларускімі.