Клубы Экстралігі - больш мовы, калі ласка!

Распачаўся 23-ці чэмпіянат Беларусі і з гэтай нагоды даслаў ва ўсе 11 клубаў Экстралігі прапанову больш выкарыстоўваць беларускую мову. Цікава, якія адпіскі будуць, каб даказаць, што беларускую мову развіваць нельга/немэтазгодна? Хоць сам спадзяюся, што за год у хакеі з'явілася больш патрыётаў Беларусі, беларускай мовы і беларускай незалежнасці. Прапановы наступныя:

1. Выканаць эмблему клуба па-беларуску;

2. Пісаць прозвішчы гульцоў на форме па-беларуску;

3. Агучваць аб’явы на арэне па-беларуску;

4. Пісаць на табло на арэне па-беларуску;

5. Стварыць беларускамоўную версію сайта;

6. Весці афіцыйныя старонкі ў сацыяльных сетках па-беларуску;

7. Выконваць афішы да гульняў па-беларуску;

8. Выконваць праграмкі да гульняў па-беларуску;

9. Праводзіць прэс-канферэнцыі па-беларуску;

10. Праводзіць іншыя захады па папулярызацыі беларускай мовы і культуры.