Фанат «Крумкачоў» Раманенка затрыманы ГУБАЗіКам. Ён быў зарэгістраваны у плане «Перамога»
Праваабаронцам стала вядома пра затрыманне ў Мінску ўладальнікаў агенцтва нерухомасці КУБ — мужа і жонкі Васіля і Алы Раманенкі. Пра гэта паведамляе Telegram-канал «Вясна / Правы чалавека ў Беларусі».
Адзначым, што Васіль з’яўляецца фанатам «Крумкачоў».
«Учора, 20 красавіка, дадому да іх уварваліся супрацоўнікі ГУБАЗіК і САХР.
Вядома, што Васілю прад’явілі абвінавачанні па артыкуле 361-1 Крымінальнага кодэкса «Стварэнне экстрэмісцкага фарміравання або ўдзел у ім». Мужчына быў зарэгістраваны у плане «Перамога». У чым дакладна абвінавачваюць Алу, пакуль невядома.
Па словах сваякоў затрыманых, жанчына ў плане «Перамога» зарэгістраваная не была, але ў сацсетках яна пакінула некалькі пастоў, якімі выказала сваю пазіцыю супраць вайны ва Украіне. Вядома, што дома ў мужа і жонкі правялі агляд, канфіскавалі жорсткі дыск.
Па дадзеных, якімі валодаюць сваякі Алы і Васіля, ноч пасля затрымання яны правялі на Акрэсціна. Ёсць звесткі, што сёння, 21 красавіка, над імі павінен адбыцца суд», – гаворыцца ў паведамленні.
Адзначым, што пра рэгістрацыю ў плане «Перамога» Раманенка распавёў у пакаянным відэа ў Telegram-канале ГУБАЗіКа/