Бачылі сцяг па схеме БЧБ на фінале ЛЧ? Яго разгарнуў сын Румаса, чый бацька фатаграфаваўся на фоне рэкорднага мiтынгу пасля выбараў

Прыхільнікі «Чэлсi» радуюцца. Іх улюбёнцы другі раз у гісторыі выйгралі Лігу чэмпіёнаў. У вырашальным матчы «пенсіянеры» абыгралі «Манчэстэр Сіці» з лікам 1:0.

Цікава, што ў святкаванні тытула, здабытага ў Партугаліі, быў беларускі след. На трыбунах у першых шэрагах насупраць футбалiстаў заўзятары «Чэлсі» разгарнулі свой сцяг – ён зроблены па схеме БЧБ з некалькiмi вiдамi нацыянальных арнаментаў.

Хто разгарнуў БЧБ

Як даведалася «Трыбуна», мужчына ў сіняй майцы і паднятымі рукамі на фота – Валерый Румас. Не, гэта не проста цёзка па прозвiшчы былога прэм’ер-міністра Беларусі і экс-старшыні АБФФ, а яго старэйшы з чатырох сыноў.

А вось і фота паблізу, дзе не застаецца сумневаў (Валерый па цэнтры).

Чым займаецца Валерый

Старэйшы сын Румаса скончыў эканамічны факультэт БДУ, а затым разам з жонкай Настай паехаў вучыцца ў прэстыжную Cass Business School, якая ўваходзiць у структуру Лонданскага гарадскога ўнiверсiтэта. Пасля атрымання дыпломаў Валерый і яго жонка вярнуліся ў Беларусь. Тут хлопец узначаліў фан-клуб заўзятараў «Чэлсі», які існуе ўжо восем гадоў. Арганiзацыя афiцыйна прызнаная з боку «Чэлсi». На 2016 год у ёй было 63 члены. Цяпер фан-клуб узначальвае мінчанін Віталь Валовіч. 

У Мінску Валерый працаваў у інвестыцыйна-кансалтынгавай кампаніі Uniter. Аднак з часам сын экс-прэм’ера вярнуўся ў Вялікабрытанію. Цяпер Румас жыве ў Лондане, дзе займае пасаду памочніка дырэктара ў брытанскім філіяле расейскай інвестыцыйнай кампаніі VTB Capital.

У адным са сваіх інтэрв’ю Сяргей Румас распавядаў, што старэйшы сын спартыўны хлопец і нядрэнна гуляе ў тэніс. Таксама Валерый добра плавае і гуляе ў футбол з аднагодкамі.

Не першае перасячэнне Румасаў з БЧБ

Фiнал ЛЧ – не першы раз, калi «Румас» i «БЧБ» сустракаюцца ў адным загалоўку. 16 жніўня 2020 года на Facebook жонка былога прэм’ер-міністра Жанна Румас выклала палітпікантнае фота з мужам. Яны стаялі на даху Банка развіцця ў Мінску – а на фоне была прастора ля стэлы, дзе збiраўся самы вялiкi ў гiсторыi Беларусi мiтынг за чэсныя выбары ды супраць гвалту з небывалай колькасцю БЧБ-флагаў. Аднак неўзабаве пасля публікацыі Жанна выдаліла пост.

Таксама АБФФ, якой кіраваў Румас, заступалася за фанатаў, якiя на сустрэчу ў Барысаве зборных Беларусі і Паўночнай Македоніі прыйшлi ў шалiках з «Пагоняй» i былi затрыманыя. АБФФ падкрэслiвала, што такая сiмволiка не забароненая. Аднак МУС тады проста заявіў, што прычына затрымання ў iншым.

Чым займаецца Румас пасля футбола

Сяргей Румас пакінуў АБФФ пасля васьмі гадоў працы ў пачатку 2019 года з-за занятасці на пасадзе прэм’ер-міністра Беларусі. Тут чыноўнік прабыў да чэрвеня 2020 года, пасля чаго разам са сваім кабінетам быў адпраўлены ў адстаўку. Аляксандр Лукашэнка патлумачыў рашэнне жаданнем Румаса заняцца бізнесам.

Экс-кіраўнік белфутбола ніяк не каментаваў сітуацыю ў краіне пасля прэзідэнцкіх выбараў. А ў лютым 2021 года з’явілася інфармацыя, што Румаса быццам затрымалі супрацоўнікі КДБ. У самім ведамстве не абвяргалі навіну, а жонка чыноўніка адказвала, што той «у ад’ездзе за межамі Беларусі».

Румас выйшаў на сувязь праз пяць дзён. Як аказалася, былы прэм’ер знаходзіўся ў Лондане – якраз у гасцях у Валерыя, святкаваўшы яго дзень нараджэння.

«Я не буду даваць ніякіх каментароў, прабачце. Вы пачулі, што я жывы, не арыштаваны, але нічога каментаваць не буду. Дзякуй, што хвалюецеся», – сказаў Румас.

У гэты час у Беларусі затрымлівалі людзей з атачэння экс-чыноўніка. Паведамлялася, што справы завялі на выконваючага абавязкі дырэктара ААТ «Беларуская лясная кампанія», экс-кіраўніка «Белінвестбанка» Генадзя Сысоева, кіраўніка і сузаснавальніка Тураўскага малочнага камбіната Ігара Чарняўскага і шэрагу топаў «Белаграпрамбанка». Пры гэтым сам Румас не спяшаўся вяртацца ў Менск, дзе, па чутках, у яго доме правялі ператрус. Пасля навіны аб сваім затрыманні той месяц жыў у Кіеве. У той жа час паведамлялі, што Румаса прызначылі ў назіральны савет «Рассельгасбанка», што ўзгаднілі яшчэ восенню 2020-га. Аднак экс-прэм’ер усё не вылятаў у Маскву, што некаторыя СМІ тлумачылі бояззю затрымання на тэрыторыі Расiі. Тым не менш, у красавіку Румаса зацвердзілі ў набсавеце, дзе беларус значыўся як прадстаўнік Расійскай Федэрацыі.

У другой палове траўня з’явілася інфармацыя, што Румас на некалькі дзён прыязджаў у Мінск. Не стаў адмаўляць гэта і сам экс-чыноўнік, не знайшоўшы ў гэтым нагоды здзiўляцца.

«Пытанні да мяне з боку праваахоўных органаў выдумляюць журналісты. Іх не было і няма. На наступным тыдні зноў збіраюся ў Кіеў, у мяне там праект», – заявiў экс-прэм’ер.