Tribuna/Авто/мото/Блоги/Гоначная псіхапатыя НЕ ВАЙНЕ!/Рэванш Крыстоферсана. Па выніках латвійскіх этапаў сусветнага ралі-кросу швед вярнуўся ў чэмпіёнскую гонку

Рэванш Крыстоферсана. Па выніках латвійскіх этапаў сусветнага ралі-кросу швед вярнуўся ў чэмпіёнскую гонку

Трохразовы чэмпіён свету па ралі-кросе Йохан Крыстоферсан у гэтым сезоне серыі WRX сутыкнуўся са шматлікімі праблемамі, не атрымаў аніводнай перамогі на першых трох этапах і, здавалася, ужо страціў шанцы абараніць свой тытул. Аднак у Латвіі швед перарваў заганнае кола параз, хоць і не адразу.

21 сентября 2021, 16:54
Рэванш Крыстоферсана. Па выніках латвійскіх этапаў сусветнага ралі-кросу швед вярнуўся ў чэмпіёнскую гонку

Трохразовы чэмпіён свету па ралі-кросе Йохан Крыстоферсан у гэтым сезоне серыі WRX сутыкнуўся са шматлікімі праблемамі, не атрымаў аніводнай перамогі на першых трох этапах і, здавалася, ужо страціў шанцы абараніць свой тытул. Аднак у Латвіі швед перарваў заганнае кола параз, хоць і не адразу.

Чарада няўдач у Крыстоферсана ў гэтым годзе надта ўжо зацягнулася. Пасля подыуму на першым этапе сусветнага ралі-кросу ў Барселоне Йохан не патрапіў нават у фінальныя заезды ў Хольесе і Лаэаку. У першым выпадку яму перашкодзіў двайны пракол, у другім – паломка паўвосі і скрыні перадач. Пры гэтым шведу не пашанцавала яшчэ і ў фінальнай гонцы трэцяга этапу пазадарожнай серыі Extreme E на выспе Грэнландыя, дзе праблемы з электронікай пазбавілі яго магчымай перамогі.

Аднак нішто не назаўжды, у тым ліку і чорныя палосы. Раней ці пазней нешанцаванне Крыстоферсана мусіла скончыцца, і на этапе WRX у сталіцы Латвіі Рызе, Йохан нарэшце атрымаў важную перамогу і сур’ёзна паправіў сваё становішча ў чэмпіянаце. Праўда, этапы на трасе Бікерніекі склаліся для яго зусім не ідэальна. І хоць тэхнічныя праблемы гэтым разам абышлі гоншчыка каманды KYB EKS JC бокам, яго канкурэнты ўсё ж такі ўскладнілі яму жыццё.

Дакладней, адзін з канкурэнтаў, і – што самае цікавае! – не хтосьці з братоў Хансэнаў, трыумфатараў першых трох этапаў. У Латвіі, дарэчы, гэтых этапаў за мінулы ўік-энд прайшло адразу два, і ў суботу выклік трохразоваму чэмпіёну свету па ралі-кросу кінуў сын двухразовага чэмпіёну свету па класічнаму ралі Маркуса Гронхольма – Ніклас. Найхутчэйшы ў двух кваліфікацыях з трох (на здвоеных этапах іх праводзіцца па тры, а не па чатыры, як на звычайных), фін потым і ў сваім другім паўфінале перамог.

І апынуўся на першым шэрагу разам з Крыстоферсанам, які быў хутчэйшым за ўсіх у другой кваліфікацыі, перамог у першым паўфінале, і таму ў вырашальным заездзе стартаваў з найлепшай пазіцыі (унутранай адносна першага павароту). Але стартавы кантакт з Гронхольмам, які паводзіў сябе надзвычай агрэсіўна, прывёў да развароту Audi S1 шведа і адкінуў яго назад. У выніку заняць пятае месца, а не шостае, Йохану ўдалася толькі дзякуючы сходу на першым жа кругу Ціма Шайдэра, на чыім Seat Ibiza ўзніклі механічныя праблемы.

Нікласа Гронхольма ж яго Hyundai i20 не падвёў, ды і сам ён не дапусціў памылак і не прапусціў наперад ні Цімі Хансэна, ні яго малодшага брата Кэвіна, якія фінішавалі другім і трэцім адпаведна. Не знайшлі парушэнняў у яго дзеяннях на старце і суддзі (з чым, верагодна, не быў згодны Крыстоферсан), так што Ніклас стаў першым у гэтым годзе не-Хансэнам, які падняўся на вяршыню подыуму на этапе сусветнага ралі-кросу.

Ну а Крыстоферсан у нядзелю аказаўся другім такім удзельнікам чэмпіянату. Не бліснуўшы ў кваліфікацыях (другія вынікі ў другой і першай і чацвёрты ў трэцяй), Йохан патрапіў у другі паўфінал, але там ужо нейкія шанцы пакінуў толькі свайму суайчынніку – аднаму з самых вядомых у свеце гоншчыкаў-шматстаночнікаў, чэмпіёну шведскага Турынга, двухразоваму чэмпіёну DTM і чэмпіёну WRX 2016 году Маціасу Экстрому, які ў Латвіі вярнуўся ў сусветнае ралі-кросавае першынство на два этапы і быў напарнікам Шайдэра па камандзе ALL-INKL.COM Münnich Motorsport. У другім нядзельным паўфінале ён заняў другое месца, адстаўшы ад Крыстоферсана на 0,474 секунды.

Для параўнання, Кэвін Хансэн, фінішаваўшы трэцім, адстаў ад Йохана болей чым на чатыры секунды. І, канечне, не ён і не Экстром былі галоўнымі супернікамі Крыстоферсана ў фінале. Там трохразовы чэмпіён першы шэраг ізноў дзяліў з Гронхольмам, які раней перамог у першым паўфінале. На гэты раз у шведа і фіна абышлося без сутыкненняў, і Крыстоферсан дзякуючы выдатнаму старту, па вонкавым радыусе ў першым павароце абагнаўшы Гронхольма, захапіў лідарства і больш яго не саступаў. Ёсць доўгачаканая першая ў сезоне перамога!

Гронхольм заняў другое месца, а трэцім фінішаваў Цімі Хансэн. Пэўныя праблемы ў Латвіі сустрэў ужо ён з Кэвінам – браты на Peugeot 208 правялі на другіх ролях увесь уік-энд. А Кэвін у нядзельным фінале яшчэ і памыліўся на старце ў першым павароце, фінішаваўшы у выніку толькі пятым і прапусціўшы яшчэ і Экстрома.

У чэмпіянаце малодшы з Хансэнаў пры гэтым захаваў другую пазіцыю, дзе ў яго 113 ачкоў, але Крыстоферсан, які разам падняўся на трэці радок, цяпер адстае ад яго ўсяго толькі на тры балы. Ды і Цімі, у якога 130 ачкоў, хоць і працягвае лідзіраваць, знаходзіцца цяпер у межах дасягальнасці для Йохана. Апошні, можна не сумнявацца, пойдзе ў рашучую контратаку на наступных этапах.

З малодшых катэгорый WRX у Рызе была прадстаўленая толькі еўракубкаўская RX1, якая, у адрозненні ад старэйшай, правяла толькі адзін этап. Затое ў ёй на радасць мясцовым заўзятарам дамінаваў, пачынаючы з трэцяй кваліфікацыі, латвіец Яніс Баўманіс, які выступаў на Škoda Fabia. Яго галоўным канкурэнтам у фінале стаў француз Фаб’ен Пайле на Peugeot 208, які заняў другое месца. Трэцім фінішаваў швед Петэр Хэдстром на Hyundai i20.

Наступны этап сусветнага ралі-кросу 9-10 кастрычніка будзе прымаць траса Спа-Франкаршам у Бельгіі. Якая ў гэтым годзе ўжо прыняла этап чэмпіянату свету па гонках на цягавітасць, найцікавейшы сутачны марафон серыі GT World Challenge, незразумелы Гран Пры Бельгіі Формулы-1, а ў мінулы ўік-энд стала арэнай пятага этапу Еўрапейскай серыі Ле Ман, пра які «Гоначная пісхапатыя» распавядзе цягам тыдня. Сачыце за публікацыямі!

Другие посты блога

Все посты