Алег Рыжанкоў: «Чэмпіянат «Саюзнай дзяржавы» выкліча вялікую цікавасць»
Трэнер зборнай Беларусі Алег Рыжанкоў падзяліўся меркаваннем аб планах на сезон-2024/25.
– СБР нядаўна апублікаваў папярэдні каляндар на наступны год. У Кубку Садружнасці чакаецца шэсць этапаў.
– Так, пакуль запланавана шэсць этапаў. Зразумела, што ўсё яшчэ стадыі абмеркавання. Нешта можа памяняцца. Не думаю, што гэта канчатковая версія, бо там вельмі шмат спаборніцтваў. Думаю, наша каманда нешта ўсё роўна будзе прапускаць.
– Асобным пунктам там значыцца чэмпіянат «Саюзнай дзяржавы», які могуць прыняць Раўбічы. У ім шэсць дысцыплін пазначана, што відавочна разлічана на відовішчнасць.
– Вельмі цікавы старт. Нават – патрэбны старт. Я б увогуле абазначыў яго, як галоўнае спаборніцтва для нас у наступным сезоне. Ён будзе расцягнуты на 11 дзён. Будзе шмат дысцыплін, эстафеты разведзены ў розныя дні. Думаю, што гэта выкліча вялікую цікавасць, – сказаў Рыжанкоў.
