Экс-лучніца зборнай Беларусі Казлоўская: «Ці шкадавала пра пераезд у Польшчу? Былі сумневы. Але разумею, што не змагла б мірыцца з тым, што адбываецца ў Беларусі. Яшчэ і вайна…»
Экс-лучніца зборнай Беларусі Карына Казлоўская, якая ў 2022 годзе пераехала ў Польшчу, расказала ў інтэрв'ю «Зеркалу», ці шкадуе яна пра свой пераезд і як праз час адрэагавалі на яе ад'езд прадстаўнікі беларускай зборнай.
Нагадаем, што 22-гадовая падпісантка ліста за сумленныя выбары была звольненая са зборнай Беларусі пасля свайго ад'езду. Цяпер спартсменка выступае за клуб «Лучнік» з горада Жывец.
– У Беларусь цягне?
– Бываюць усякія думкі. Убачыць сяброў, сам Мінск… Але разумею, што вяртацца ў Беларусь для мяне сёння сапраўды небяспечна.
– Як ставіцеся да тых, хто не згодны з сітуацыяй у краіне, але не з'яжджае?
– Спакойна. Нехта смелы, нехта больш асцярожны. Ёсць тыя, хто гатовы ўсім рызыкнуць, а іншыя спадзяюцца на перамены, знаходзячыся па-ранейшаму ў Беларусі.
– Хоць раз пашкадавалі, што з'ехалі?
– Хутчэй, былі сумневы. Але потым гнала гэтыя думкі. Добра разумею, што рана ці позна не змагла б мірыцца з тым, што адбываецца ў Беларусі. Яшчэ і вайна... Я зрабіла выбар. Шкадаваць сёння ўжо проста недарэчна.
– Як праз час у Беларусі адрэагавалі на ваш раптоўны ад'езд?
– Мяне назвалі здраднікам. Трэнеры казалі ўсякія гадасці. Сказалі, што дурная – і кропка. Цяпер, натуральна, таму ніхто не кліча. Дарэчы, у Беларусі ў стральбе з лука чамусьці лічыцца, што змена трэнера – гэта проста скандал. Трэба быць са сваім да канца. Інакш, як мінімум, наперакос паглядзяць, а то і зусім спартовец становіцца ізгоем. Ніколі гэтага не разумела – калі для прагрэсу лепш трэніравацца з іншым трэнерам, то навошта ўтрымліваць атлета?
– Ніхто вас не падтрымаў?
– Толькі адзін чалавек з федэрацыі. Спартоўцы, з кім выступала, таксама мяне выдатна зразумелі. Маўляў, малайчына, што так паступіла.
– Вас спрабавалі прымусіць вярнуць алімпійскую стыпендыю?
– Усё засталося на ўзроўні пагроз. Ды і юрыст, з якім размаўляла, мне пацвердзіў: няма такіх механізмаў, што павінна вярнуць грошы. Наогул у мяне кантракт у зборнай быў да канца 2022-га. З'ехала з Беларусі ўвесну, і мяне адразу звольнілі за адсутнасць на працоўным месцы. Як і ў адзін момант пазбавілі алімпійскай стыпендыі.
– Вы, напэўна, самая маладая спартсменка, хто публічна выступіў супраць улады, ціску ў Беларусі і з'ехаў з краіны.
– Нават не ведаю, што сказаць… У мяне наперадзе, спадзяюся, вялікае спартовае жыццё. Будуць узлёты і падзенні. Што да астатняга, то немагчыма быць абыякавай. Знаходзячыся ў Польшчы, магу, прынамсі, больш дапамагаць тым жа ўкраінцам, якія хаваюцца ў падвалах ад ракет, – распавяла Казлоўская.
