🤯 Стамбул можа ў трэці раз страціць фінал ЛЧ – горад спрабуе яго правесці яшчэ з 2020-га
Могуць перанесці з-за выбараў у Турцыі.
УЕФА разглядае варыянт з пераносам фіналу Лігі чэмпіёнаў са Стамбула. Пра гэта пакуль паведамлялі толькі The Independent і Daily Mail, таму давяраць гэтаму варта з улікам даверу да крыніц.
Зрэшты, калі гэта адбудзецца, сітуацыя будзе максімальна камічнай – паколькі Стамбул спрабуе правесці фінал яшчэ з 2020-га.
Спроба №1: кавід, лакдаўн – «фінал васьмі» ў Партугаліі
Першапачаткова стадыён «Алімпійскі» ім. Атацюрка вызначылі гаспадаром фіналу ЛЧ яшчэ ў траўні 2018-га – на пасяджэнні Выканкама УЕФА ў Кіеве. Тады Выканкам аддаў перавагу менавіта стадыёну ў Стамбуле – іншым кандыдатам быў «Эштадыу Да Луш» у Лісабоне.
Зрэшты, пасля прыпынення сезона 2019/20 з-за пандэміі каранавіруса і падчас распрацоўкі плана яго абнаўлення Выканкам УЕФА вырашыў правесці аднаматчавы «фінал васьмі» ў Партугаліі – пачынаючы з чвэрцьфіналаў. Арганізацыя не дала тлумачэнняў, чаму была абрана гэтая краіна.
У выніку «Баварыя» выйграла ЛЧ у фінале супраць «ПСЖ» менавіта на «Эштадыу Да Луш».
УЕФА тады тым рашэннем зрушыла двух наступных раней вызначаных гаспадароў фіналаў – Стамбул і Санкт-Пецярбург на год наперад.
Спроба №2: брытанскі ўрад, «чырвоная зона» – фінал зноў у Партугаліі
У 2021-м Стамбул зноў быў гатовы прымаць фінал ЛЧ. У гэты раз гэта павінен быў быць «унутраны» фінал для двух каманд АПЛ – «Ман Сіці» гуляў супраць «Чэлсі».
Аднак тады яшчэ існавалі «каранцінныя зоны» паміж краінамі, у тым ліку ў Вялікабрытаніі. І якраз у той час з-за ўспышкі кавіда Турцыя патрапіла ў «чырвоную» зону ў Вялікабрытаніі – што азначала б, што па прылёце з фіналу ўсе ўдзельнікі павінны былі б пайсці на 10-дзённую самаізаляцыю без магчымасці выйсці з яе раней у выпадку негатыўнага тэсту. Акрамя таго, УЕФА планавала яшчэ дапусціць некалькі тысяч заўзятараў – паколькі ўсе яны былі б з Англіі, гэта таксама фактычна стала немагчымым.
Спачатку ў арганізацыі хацелі правесці фінал на «Уэмблі», але для гэтага трэба было, каб некаторым чыноўнікам з «чырвоных» краін урад Вялікабрытаніі зрабіў выключэнні адносна самаізаляцыі. Ім адмовілі – і тады УЕФА перанесла фінал у Партугалію, на гэты раз на «Драгау» ў Порту. Прычыны вызначэння лакацыі – знаходжанне краіны ў «зялёным спісе» Вялікабрытаніі і «станоўчы досвед» папярэдняга розыгрышу ЛЧ.
Фінал у Санкт-Пецярбургу ў 2022-м на гэты раз вырашылі не рухаць (ён не адбудзецца там ужо з-за ўварвання РФ ва Украіну) – Стамбул «перапрызначылі» на 2023-і.
Спроба №3: выбары ў Турцыі, патэнцыйныя беспарадкі – зноў Партугалія?
У гэты раз ужо, здавалася, няма каранавіруснай праблемы для Стамбула – СААЗ ужо нават не вызначае Covid-19 глабальнай пандэміяй.
Перашкодзіць могуць выбары прэзідэнта ў Турцыі. Першы тур адбудзецца 14 траўня, магчымы другі – 28 траўня. На іх дзейнаму прэзідэнту Рэджэпу Таіпу Эрдагану апаніруе Кемаль Кілічдараглу – і, паводле сацыялагічных апытанняў, менавіта ў апазіцыйнага кандыдата невялікая перавага.
Daily Mail сцвярджае, што ва УЕФА ёсць занепакоенасць рызыкай узнікнення беспарадкаў, калі на прэзідэнцкіх выбарах Турцыі прайграе дзейны кіраўнік дзяржавы Рэджэп Таіп Эрдаган (хаця гэта можа адбыцца і ў выпадку яго перамогі).
На такі выпадак, па дадзеных крыніцы, арганізацыя ўжо правяла неафіцыйныя перамовы з Партугальскай федэрацыяй футбола – гаворка ідзе пра перанос фіналу на «Эштадыу Да Луш». Адзначаецца, што УЕФА не хоча пераносіць фінал, паколькі ён ужо двойчы пераносіўся са Стамбула праз кавід, але, магчыма, будзе вымушаны разгледзець гэтую ідэю, паколькі бяспека заўзятараў з'яўляецца іх першачарговым клопатам.
Фота: David Klein, Peter Schatz, Tunahan Turhan/Global Look Press, Goal.com
