П'яны Грыліш – галоўны хайлайт святкавання «Сіці». Гісторыя Джэка з алкаголем цягнецца з юных гадоў

Не толькі трэбл, выйграны «Ман Сіці» ў сезоне 2022/23, увойдзе ў гісторыю, але і святкаванне каманды пасля перамогі ў фінале Лігі чэмпіёнаў. Сацыяльныя сеткі да гэтага часу гудуць пацешнымі відэа, галоўны герой на большасці з якіх – Джэк Грыліш.

Англічанін, здаецца, выпіў увесь алкаголь спачатку ў Стамбуле, потым на Ібіцы, а потым – яшчэ і ў Манчэстэры, а таксама прызнаўся, што амаль не спаў.

Джэк і алкаголь – гэта асобная гісторыя, якая цягнецца яшчэ з часоў яго выступу за «Астан Вілу».

Пасля фіналу ЛЧ Грыліш у 6 раніцы ўсё яшчэ быў у форме і гетрах, запіваў віскі півам, а на Ібіцы Уокер пад руку вёў яго ў аэрапорт

На святкаваннях пасля перамогі ў фінале Лігі чэмпіёнаў Грыліш быў галоўным завадатарам і весялуном.

Усё пачалося яшчэ ў распранальні Алімпійскага стадыёна ў Стамбуле:

Пасля Джэк эфектным з'яўленнем у мікст-зоне перапыніў інтэрв'ю адразу некалькіх аднаклубнікаў. «Сіці», здавалася, ужо пакідалі стадыён з торбамі і валізкамі, але ўсё, што было ў руках у Грыліша калонка з легендарнай Everywhere у выкананні Fleetwood Mac, банка піва і маленькая сумачка Gucci:

Заўважылі, што Джэк усё яшчэ быў у гульнявой форме? Аказваецца, ён і ў шэсць раніцы не змяніў свой аўтфіт – быў адзіным, хто працягваў запальваць у форме (і нават гетрах!), у той час як усе астатнія гульцы ўжо даўно пераапрануліся:

Акаўнт у твітары пад назвай «Drunk Jack Grealish» (пераклад – «П'яны Джэк Грыліш») стаў адным з самых папулярных сярод футбольных заўзятараў па ўсім свеце.

Самае атмасфернае відэа ночы пасля перамогі ў ЛЧ – тое, як 10-ка манчэстэрцаў запівае віскі півам:

Пасля «гараджане» адправіліся на Ібіцу – і Джэк зноў быў у цэнтры ўвагі. Журналісты адразу ж знялі яго эфектны знешні выгляд:

Але на Ібіцы ўсё прайшло настолькі весела (на твары Джэка ўсё напісана), што назад у аэрапорт Грыліша вёў Кайл Уокер.

Пагаворваюць, што ўжо ў аэрапорце англічаніну прапаноўвалі інвалідную каляску, але ён усё ж змог дайсці да самалёта сам.

Самае цікавае пачалося, калі «Сіці» вярнуліся ў Манчэстэр. BBC зняў выхад футбалістаў з самалёта і апублікаваў відэа з назвай «П'янае вяртанне дадому», а Джэк – найлепшае пацвярджэнне тэзы брытанскіх журналістаў:

Праз некалькі гадзін Джэк працягнуў апантана ліць у сябе алкаголь:

На чэмпіёнскім парадзе з заўзятарамі Джэк тусіў у сігнальнай камізэльцы будаўніка:

– Джэк, ты ў парадку?

– Ну, у цэлым так. Апошнія 24 гадзіны былі найлепшым днём і ноччу. Калі сапраўды, не думаю, што я спаў.

А калі ў яго спрабавалі адабраць мікрафон, Джэк выдаў: «Я – індычка, а індычку трэба пакарміць», намякаючы, каб у яго залілі яшчэ крыху гарэлкі.

Наўрад ці Джэк будзе цалкам памятаць свой найлепшы дзень у жыцці:

Гісторыя Джэка з алкаголем цягнецца яшчэ з «Астан Вілы». Калісьці яму пагражалі нават вылікам з-за п'янкі ў Іспаніі.

◉ Улетку 2015 года, калі Джэку было ўсяго 19 гадоў, ён са сваімі сябрамі адправіўся ў Тэнэрыфэ ў канцы сезона. Тады Грыліш быў яшчэ не такой публічнай асобай, але ўжо выступаў у прэм'ер-лізе – быў футбалістам ратацыі «Астан Вілы».

У канцы яго адпачынку ў сетках пачалі распаўсюджваць фатаграфію, дзе п'яны Джэк ляжыць на падлозе.

«Віла» сціпла адрэагавала на інцыдэнт, адзначыўшы, што гэта асабістыя справы паміж клубам і футбалістам, але па даных набліжаных да клуба інсайдэраў, Джэку паведамілі, што паўтарэнне такой гісторыі можа прывесці да разрыву кантракту.

◉ У кастрычніку 2016 года моладзевая зборная Англіі перамагла Боснію з лікам 5:0, а Грыліш вызначыўся двума асістамі. Вінгер прызнаны найлепшым гульцом матча, а ўзнагародай аказалася бутэлька шампанскага ад партнёра зборнай Vauxhall England.

Заўзятары бірмінгемскага клуба добра памяталі інцыдэнт у 2015-м і яшчэ некалькі малаважных сітуацый, таму груба тролілі Джэка ў сацсетках:

«Не давайце яму алкаголь!»;

«Божа, хто прыдумаў узнагародзіць яго шампанскім? Ён жа сёння нап'ецца»;

«Даць яму алкаголь – выдатная ідэя, брава».

◉ У 2020-м ён патрапіў у бяду, калі падчас пандэміі каранавіруса патрапіў у ДТЗ на сваім Range Rover. Сведкі паведамлялі, што «ад яго пахла алкаголем» і «ў яго ўвесь час заблытвался язык».

◉ У мінулым годзе Джэк таксама эпічна з'явіўся на святкаваннях «Ман Сіці» у гонар перамогі ў АПЛ – з віскі і колай у адной руцэ і півам у другой.

◉ Пасля гэтага Грыліш з сябрамі адразу адправіліся ў Лас-Вегас, дзе таксама стварылі нямала кантэнту для таблоідаў тыпу The Sun ці The Mirror.

Цяпер зразумела, пра каго казаў Гвардыёла, калі казаў «за 48 гадзін да матчу мае гульцы выпілі ўвесь алкаголь у Манчэстэры і паказалі, чаму яны чэмпіёны» 😅

Фота: Sun Sport, Isaac Parkin - Manchester City FC, The Mirror