20 крутых трансфераў лета, якія ўжо адбыліся
Выгаднае падпісанне «Ліверпуля», «Віла» адхапіла Цілеманса і іншае.
Нягледзячы на тое, што летняе трансфернае акно ў топавых еўрапейскіх лігах адчыняецца толькі 1 ліпеня, гэта ніяк не мяшае клубам аб’яўляць пра падпісанні і нават прэзентаваць пачаткоўцаў. Прайшло два тыдні чэрвеня, а мы ўжо лёгка сабралі два дзясяткі трансфераў, якія афіцыйна пацверджаныя.
Тут не будзе хіба што выпадкаў, калі клубы выкуплялі кантракты гульцоў, якія ўжо гулялі за іх у арэндзе, як, напрыклад, у выпадку з Пэдра Пора і «Тотэнхэмам» або Крысам Вудам і «Нотынгемам».
Тут будуць пераходы, пра якія вы ўжо так шмат ведаеце, але дадзім месца ў гэтым матэрыяле і менш вядомым, але перспектыўным футбалістам.
Ліянэль Месі, «ПСЖ» → «Інтэр» Маямі
Гэта пагражала стаць адной з цэнтральных трансферных саг лета, але Леа ўжо настолькі стаміўся ад ціску і ўвагі да яго будучыні, што хутка прыняў рашэнне — пераязджае ў МЛС. «Барселона» так і не змагла даць яму гарантыі, што не паўтарыцца гісторыя 2021 года, таму аргенцінец абраў варыянт з амерыканскай камандай. Мяркуючы па ўмовах, Месі сапраўды не пашкадуе.
Карым Бензема, «Рэал» → «Аль-Іціхад»
Але яшчэ больш нечаканым стаў сыход Бензема. Усё ішло да таго, што развітальны матч француза на «Бернабеу» адбудзецца ў траўні 2024-га, але перад 38-м турам Ла Лігі «Рэал» афіцыйна абвясціў, што Карым сыходзіць. Форвард таксама атрымаў тлусты кантракт, праўда, адправіўся ў супрацьлеглы Месі бок — у Саудаўскую Аравію.
«Чаму я перайшоў? Ну таму што я мусульманін, гэта мусульманская краіна, і я заўсёды хацеў жыць тут», — сказаў Бензема.
Паводле інфармацыі Фабрыцыа Рамана, футбаліст будзе зарабляць амаль 200 мільёнаў еўра чыстымі за сезон, у тым ліку камерцыйныя пагадненні.
Джуд Белінгем, «Дортмунд» → «Рэал»
Зараз «Рэал» будзе шукаць новага форварда, але пакуль — пракруціў аперацыю па самым перспектыўным гульцу свету. Джуд абраў Мадрыд і неўзабаве будзе прэзентаваны як гулец «сметанковых». Заносім гэты трансфер у афіцыйна пацверджаныя, паколькі «Дортмунд» са свайго боку ўжо пра ўсё распавёў — 103 млн еўра і бонусы. Ох і пашчасціла мадрыдцам.
Паўабаронца ўжо прайшоў медыцынскае абследаванне ў «Рэале». З 19-гадовым англічанінам падпісаны кантракт да лета 2029 года.
Алексіс Мак Алістэр, «Брайтан» → «Ліверпуль»
Хоць па ўзроўні шанцавання «Ліверпуль», падобна, абышоў «Рэал». Мерсісайдцы па шыкоўным кошце выхапілі Алексіса Мак Алістэра з «Брайтана» — усяго за 35 мільёнаў фунтаў (гэта была клаўзула гульца). Юрген Клоп нарэшце атрымаў топавага гульца ў цэнтр паўабароны, таму чакаем адраджэння мерсісайдскага гранда ў наступным сезоне.
«Адчуванні неверагодныя, мара стала рэальнасцю. Рады быць тут і з нецярпеннем чакаю пачатка. Гэта быў фантастычны год для мяне, чэмпіянат свету, тое, чаго мы дасягнулі з «Брайтанам», але зараз час падумаць пра «Ліверпуль» і спрабаваць кожны дзень быць найлепшым гульцом і найлепшым чалавекам», — пракаментаваў футбаліст.
Будзе гуляць пад 10-м нумарам.
Юры Цілеманс, «Лестэр» → «Астан Віла»
26-гадовы бельгіец некалькі нечакана далучыцца да «Астан Вілы» на правах свабоднага агента пасля заканчэння яго кантракта з «Лестэрам». На яго прэтэндавалі «Мілан», «Рома», «Ньюкасл» і іншыя клубы, але Цілеманс абраў перспектыўны праект бірмінгемцаў. Эмеры сапраўды дапаможа Юру вярнуць найлепшую форму.
Па папярэдніх дадзеных, бакі заключылі пагадненне на 4 гады з заробкам у 5 мільёнаў еўра ў сезон.
Конрад Лаймер, «Лейпцыг» → «Баварыя»
Пра пераход Конрада было вядома яшчэ ў студзені, калі інсайдэры паведамлялі, што паўабаронца амаль дамовіўся з мюнхенцамі. Нават адстаўка Нагельсмана не адбілася на фінальным рашэнні гульца. Пагадненне з 26-гадовым аўстрыйцам разлічана да 30 чэрвеня 2027 года. Трансфер прайшоў на правах свабоднага агента.
«Для мяне гэта мара, якая спраўдзілася. «Баварыя» з’яўляецца адным з самых вялікіх клубаў у свеце. Я ўсё аддам дзеля клуба і балельшчыкаў. У «Баварыі» заўсёды самыя высокія мэты, як і ў мяне», — сказаў Лаймер.
Цікава, што ў траўні ён ужо забіваў на «Альянц Арэне» — праўда, у вароты «Баварыі», чым ледзь не забраў у іх тытул.
Алехандра Грымальда, «Бенфіка» → «Баер»
На левага абаронцу прэтэндавалі «Ювентус» і «Барусія» Д, за ім актыўна сачылі «Арсенал» і «Ман Сіці», але ён нечакана перайшоў у «Баер». Магчыма, Хабі Алонса знайшоў нейкія адмысловыя словы і матывацыю для Грымальда.
З «Баерам» здзелка заключана на 4 сезоны.
Набі Кейта, «Ліверпуль» → «Вердэр»
Ці наўрад хтосьці мог прадставіць у 2018-м, што бясплатны сыход Кейта, за якога «Ліверпуль» заплаціў «Лейпцыгу» 60 млн еўра, стане палёгкай для фанатаў мерсісайдцаў. Набі так і не стаў важным гульцом каманды Клопа.
Але яму ўсяго 28 гадоў, таму яшчэ ёсць шанс праявіць сябе ў іншым клубе. «Вердэр» можа стаць тым месцам, дзе Кейта зноў зайграе на самым высокім узроўні.
Жаао Пэдра, «Уотфард» → «Брайтан»
За 21-гадовым бразільцам таксама палявалі многія клубы, але мінімум наступны сезон Пэдра будзе гуляць пад кіраўніцтвам Дэ Дзербі. Кантракт разлічаны да 2028 года, трансфер абышоўся ў 34 млн еўра.
Сезон 2022/23 ён правёў у Чэмпіёншыпе, гуляючы за «Уотфард». Забіў 11 галоў і аформіў 4 асістаў.
Фран Гарсія, «Рая Вальекана» → «Рэал»
Гарсія з’яўляецца гадаванцам «Рэала». У «Рая» ён перайшоў летам 2021 года, за два сезоны правёў там 79 матчаў. Кантракт разлічаны на 4 гады, а левы абаронца абышоўся мадрыдцам усяго ў 5 млн еўра — такая сума была прапісана ў пагадненні, калі каралеўскі клуб адпускаў гульца.
За «сметанковых» да гэтага ў Гарсіі быў толькі адзін матч у Кубку Іспаніі.
Рамі Бенсебайні, «Менхенгладбах» → «Дортмунд»
Дортмундская «Барусія» яшчэ год таму прапаноўвала 17 млн еўра за гэтага левага абаронцу, але варта было толькі год пачакаць — і атрымалі яго бясплатна.
Кантракт з 28-гадовым алжырцам разлічаны на 4 гады. Футбаліст можа згуляць на пазіцыях левага хаўбека і цэнтральнага абаронцы. У сезоне 2022/23 Бенсебайні забіў 7 галоў і зрабіў 1 асіст у 30 матчах.
Усэм Ауар, «Ліён» → «Рома»
Яшчэ некалькі гадоў таму Ауар мог прынесці «Ліёну» дзесяткі мільёнаў, але летам 2023-га сыходзіць з клуба як свабодны агент. У складзе каманды ён правёў 233 матчы, вызначыўшыся 41 голам і 36 асістамі, хоць спад формы вельмі прыкметны.
Пагадненне 24-гадовага футбаліста з рымлянамі разлічана на 5 гадоў, хаўбек узяў сабе 22-і нумар.
Марк Флекен, «Фрайбург» → «Брэнтфорд»
5 гадоў таму Флекен трапіў у загалоўкі з-за неверагоднай памылкі, якая назаўжды ўвойдзе ў зборнік кур’ёзных галоў. Але зараз ён варатар зборнай Нідэрландаў і аднаго з самых сімпатычных клубаў АПЛ.
Кантракт разлічаны на чатыры гады, фінансавыя ўмовы не выдаюцца. Але гэта намякае на тое, што клуб гатовы адпусціць Давіда Рая, які ацэньваецца ў 40 мільёнаў еўра.
Джэферсан Лерма, «Борнмут» → «Крыстал Пэлас»
Кантракт разлічаны на тры гады, прыйшоў свабодным агентам з «Борнмутам».
У сезоне-2022/23 28-гадовы Лерма правёў 37 матчаў за «Борнмут» і забіў 5 галоў. Каманда заняла 15 месца і засталася ў АПЛ.
Беньямін Шэшка, «Зальцбург» → «Лейпцыг»
Пра гэты трансфер было вядома яшчэ год таму, але зараз Шэшка афіцыйна стаў гульцом «Лейпцыга», таму заносім яго ў наш матэрыял.
Пра форварда ўжо сказалі шмат прыемных слоў, так што зараз яму давядзецца спраўляцца не толькі з абаронцамі Бундэслігі, але і з ціскам тых чаканняў і надзей, якія ўсклалі на яго.
Брэнэр, «Цынцынаці» → «Удынезэ»
А зараз пачаліся гульцы, пра якіх вы, магчыма, не чулі.
23-гадовы бразільскі форвард стаў гульцом «Удынезэ» за 10 млн еўра. Хаця атрымаў траўму калена, а ў 2023 забіў толькі адзін гол у МЛС. Але італьянцы спадзяюцца, што Брэнэр будзе забіваць, як у 2022-м — тады ў яго было 18 мячоў за «Цынцынаці».
Артур, «Амерыка» → «Баер»
«Баер» рыхтуецца выгадна прадаць гэтым летам правага абаронцу Джэрэмі Фрымпонга, таму ўжо падпісаў яму замену. 20-гадовага Артура з бразільскай «Амерыкі», які ўпершыню паспрабуе свае сілы ў Еўропе. У яго ўжо ёсць нават адзін матч за нацыянальную зборную Бразіліі — у сакавіку дэбютаваў у таварыскай гульні супраць Марока.
Вільям Пача, «Антвэрпэн» → «Айнтрахт»
21-гадовы цэнтральны абаронца ўзяў залатыя медалі чэмпіянату Бельгіі пасля матча з неверагоднай развязкай, а потым пераехаў у больш статусную лігу. Ужо дэбютаваў за зборную Эквадора, нават быў у заяўцы на ЧС-2022 (праўда, не згуляў ні ў адным матчы).
Ёсць усе перадумовы, што «Айнтрахт» у будучыні зможа прадаць Пача даражэй за 9 млн еўра, якія яны выклалі за яго цяпер.
Хуга Ларсан, «Мальмё» → «Айнтрахт»
А яшчэ 8 млн франкфуртцы заплацілі за аднаго з самых перспектыўных гульцоў Швецыі. Хуга таксама дэбютаваў за нацыянальную каманду, выступае на пазіцыі цэнтральнага і апорнага паўабаронцы. Правёў 61 матч за «Мальмё», у тым ліку 13 паядынкаў у еўракубках.
Янкуба Мінтэ, «Адэнсе» → «Ньюкасл» → «Феенорд»
Цяпер растлумачым, чаму тут цэлых тры клубы. «Ньюкасл» заплаціў за 18-гадовага гамбійца 7 млн еўра, але паколькі Эдзі Хау пакуль дакладна не плануе выкарыстоўваць такога маладога футбаліста, «сарокі» адразу ж адправілі Мінтэ ў арэнду ў Нідэрланды.
Выбухны вінгер аформіў 2+3 у 9 матчах мінулага сезона за Адэнсе. Мог бы згуляць і больш, але спачатку быў адхілены клубам ад трэніровак з першай камандай (пабіўся з партнёрам), а затым атрымаў дыскваліфікацыю ад лігі за зламаны кутні сцяжок пасля замены. Як бачыце, Янкуба выбухны не толькі ў гульнявым плане. Але вельмі таленавіты і хуткі.
