Хакейны суддзя Хрыстоўскі пра «справу «Шахцёра»: «Цырк з клоунамі»
Беларускі хакейны рэферы Павел Хрыстоўскі падзяліўся меркаваннем наконт дагаворных матчаў у беларускім футболе.
– Нядаўна спартыўную грамадскасць патрэсла навіна пра дагаворныя матчы ў нашым футболе...
– Мяне проста трасе ад фразы беларускі футбол! Люблю гэты від спорту, люблю выходзіць на поле. Выбачыце, але тое, што адбываецца на прафесійным узроўні, – за мяжой разумення. Цырк з клоунамі!
Што вы зарабілі на гэтых матчах? А колькі праблем у выніку атрымалі? Перш чым нешта рабіць, трэба добра ўсё абдумаць, уявіць наступствы. Абрагам Лінкальн казаў: «Калі б у мяне было восем гадзін, каб ссекчы дрэва, выдаткаваў бы шэсць, каб навастрыць сякеру», – сказаў Хрыстоўскі.
Нагадаем, 11 траўня КДК АБФФ разгледзеў інфармацыю, што ў ЧБ-2022 кіраўніцтва «Шахцёра» арганізавала дагаворныя матчы і фінансава стымулявала клубы вышэйшай лігі. У выніку «Шахцёр» быў пазбаўлены залатых медалёў, «Энергетык-БДУ» – сярэбраных. У гэтых клубаў і «Белшыны» таксама знялі ачкі на сезоны 2023 і 2024 гадоў. 30 чалавек атрымалі розныя дыскваліфікацыі і штрафы, але 25 з іх не будуць забаненыя, калі выплацяць прызначаныя сумы. Падрабязней пра справу «Шахцёра» можна даведацца па спасылцы ніжэй.
