Дзіцячы трэнер Карпіцкага: «Каб быць нападаючым, Ягор спецыяльна згуляў дрэнна»
Дзіцячы трэнер Ягора Карпіцкага Алена Філіповіч распавяла, як ён пачынаў займацца футболам:
– Ягора прывёў тата. Сказала, што крыху позна, таму што ён прыйшоў у 9 гадоў. Але паглядзела, што хлопец добра бегае, таму пакінула яго. Пазней параіла яму больш працаваць з мячом яшчэ і ў двары. Трэніроўка трэніроўкай, але па-за полем таксама трэба прагрэсаваць. Ягор адказаў, што ўжо займаецца гэтым. Праўда, дадаў, што дзяцей у двары мала збіраецца, таму ў асноўным з мячом практыкуецца адзін.
– Карпіцкі пачынаў кар'еру на пазіцыі абаронцы. Як ён перакваліфікаваўся ў нападаючага?
– Калі працэс пачынаецца, спачатку ўсе гуляюць 1 на 1, 2 на 2, 3 на 3, потым на міні-футбол пераходзяць. Там усё ўзаемазаменна. Ён то ў абароне гуляў, то ў атацы. Часцей менавіта ў абароне, але актыўна падключаўся наперад. Калі перайшлі на вялікае поле, падняла яго вышэй – на пазіцыю крайняга паўабаронцы. Потым перыядычна ставіла нападаючым. Бывала так, што перад вырашальнымі матчамі ўсе форварды траўмаваліся. Ведаючы, што Ягор можа адпрацаваць дзе заўгодна, ставіла яго. Калі ён апынуўся ў «Віцебску», трэнер яго зноў перавёў у паўабарону. А ён узяў і спецыяльна згуляў дрэнна. Яго назад у напад паставілі – правёў сустрэчу добра, – распавяла Філіповіч.
