Сяргей Ігнатовіч: «Шахцёр» не глядзіць на турнірную табліцу са штрафам. Звяртаем увагу толькі на набраныя ачкі»

– Мы на турнірную табліцу са штрафам наогул не глядзім. Зважаем толькі на набраныя ачкі. Калі лічыць толькі іх, атрымліваецца, ідзём недзе ўверсе табліцы, на трэцім месцы. З гэтага і зыходзім. Зразумела, што па факце змагаемся за выжыванне, што «мінус» – гэта як мінімум непрыемна. Але гульцы ў гэтым не вінаватыя. Пры гэтым каманда прыняла сітуацыю і робіць усё магчымае, каб выправіць становішча.

У сутнасці ж нічога не памянялася. Калі паглядзець на агульную статыстыку каманды – мы ў лідарах, на персанальную статыстыку бамбардзіраў – таксама, Карпіцкі да гэтага часу ў топе. Паказчыкі асістэнтаў – тое ж самае. У нас гуляюць футбалісты нацыянальнай і маладзёжнай зборных.

– І тым не менш, нязвыкла, калі, напрыклад, ваш матч з «Белшынай» вырашае, у каго больш шанцаў застацца ў вышэйшай лізе?

– З пункту гледжання турнірнай табліцы – так, але мы крыху не так гэта ўспрымаем.

– Не засталося адчування, што вінаватыя ў «дагаварняках» людзі проста падставілі каманду?

– Зразумела, што ў гэтай сітуацыі прыемнага мала. Ужо быццам бы разабраліся, хто мае рацыю, хто вінаваты. Мы прынялі сітуацыю і стараемся ўсё разам выбрацца з гэтага становішча.

– Ёсць адчуванне, што пасля гэтага сезона, улічваючы, што ў еўракубкі «Шахцёр» у любым выпадку не трапіць, а ў наступным чэмпіянаце будзе штраф у 20 ачкоў, каманда вельмі сур'ёзна зменіцца. Ёсць спакуса сысці?

– Калі сапраўды, наогул пакуль пра гэта не думаў. Усе думкі накіраваны на тое, каб вырашыць задачы ў гэтым чэмпіянаце і дастойна яго скончыць. Але, зыходзячы са становішча спраў, якое вы апісалі, зразумела, такі варыянт вельмі верагодны. Магчыма, у наступным годзе «Шахцёр» будзе зусім іншай камандай.

– У вас самога якія планы?

– Пакуль не прымаў ніякіх рашэнняў. Падумаю пра гэта пасля заканчэння сезона, – сказаў Ігнатовіч.