«Рэал» не аддасць Эндрыка ў арэнду. Аднаго з самых таленавітых маладых футбалістаў свету адразу ўключаць у асноўную каманду

Мадрыдскі клуб абвясціў аб трансферы нападаючага «Палмейрас» Эндрыка ў снежні 2022 года за 35+25 млн еўра. Ён далучыцца да «Рэала» летам 2024-га – пасля таго, як яму споўніцца 18 гадоў.

У адрозненне ад сітуацыі з Вінісіусам Жуніярам і Радрыга, якія праходзілі адаптацыйны перыяд у «Кастыльі», Эндрыка не плануюць пераводзіць у рэзервовую каманду.

«Рэал» мае намер адразу інтэграваць бразільца ў асноўны склад, але чакае, што на працягу першага сезона гулец будзе выходзіць на поле з лавы запасных.

Таксама, паводле інфармацыі UOL, мадрыдцы не пакінуць Эндрыка ў чэмпіянаце Бразіліі на правах арэнды і не плануюць аддаваць яго ў арэнду якой-небудзь еўрапейскай камандзе.

Адзначаецца, што гэтыя планы могуць змяніцца ў выпадку сыходу Карла Анчалоці і прызначэння новага галоўнага трэнера.