Юрый Вяргейчык: «Ліміты адмяняць нельга ні ў якім разе»
Кіраўнік мінскай гарадской федэрацыі футбола Юрый Вяргейчык, які падчас працы намеснікам старшыні АБФФ ініцыяваў увядзенне ліміту на маладых гульцоў у вышэйшай лізе, пракаментаваў магчымую адмену гэтага абмежавання.
«Лічу, што ліміты адмяняць нельга. Ні ў якім разе! Бо пойдзе ланцуговая рэакцыя. Кожнаму клубу патрэбны вынік. І ўмоўная «Смаргонь» ці «Слуцк», разумеючы, што ім трэба застацца ў вышэйшай лізе, будуць карыстацца старэйшымі, а не маладымі футбалістамі. Таму што малады на дадзеным этапе слабейшы па ўзроўні майстэрства.
Дык вось, каб карыстацца ўказам № 91, ім трэба застацца ў наймацнейшым дывізіёне – прыцягнуць дасведчаных гульцоў, і ўсе астатнія клубы так жа будуць рабіць, каб заставацца канкурэнтаздольнымі. Ланцуговая рэакцыя, як я ўжо сказаў!
Атрымаецца, што 50-60 маладых футбалістаў, якім мы сёння далі практыку, застануцца без гэтай самай гульнявой практыкі. Спачатку гэта дрэнна адаб'ецца на моладзевай зборнай, а потым і на нацыянальнай. Паўтару: яшчэ не прыйшоў час адмяняць ліміт. У дадзены перыяд часу яго трэба пакінуць», – выказаўся Вяргейчык.
