Мікіта Навумаў: «У «Жэтысу» барана на полі рэзалі, я туды нават не глядзеў»
Беларускі футбаліст Мікіта Навумаў, які правёў сезон-2023 у чэмпіянаце Казахстана, расказаў пра незвычайную традыцыю.
– Перад пачаткам сезона ў «Кызыл-Жары» на стадыёне барана рэзалі?
– Не на стадыёне. І не перад усёй камандай. Проста кіраўніцтва клуба купіла барана, зарэзала яго і раздала маламаёмасным. Вось і ўсё. Гэта ў «Жэтысу» яго на поле рэзалі. Потым хлопцы крывёю сабе буцы мазалі, а галкіперы – штангі сваіх варот.
– У кульмінацыі гэтага абраду адвярнуцца не хацелася?
– А я асабліва і не глядзеў. Цырымонія як праходзіла? Гульцы, якія паводле сваёй веры мусульмане, садзіліся на поле і маліліся. Мы, прыезджыя, на калена ўставалі. Барана пры гэтым каля вуглавога сцяжка рэзалі. Але я кажу – туды нават не глядзеў. Тым больш ён жа пры гэтым ніякіх гукаў не выдае. Каму было трэба, тыя да яго потым падыходзілі. Я – адразу міма, – распавёў Навумаў.
