Арцём Чалядзінскі: «Вялікія грошы «Мiнск» плаціць не можа, галоўнае, каб своечасова – нас запэўнілі, на гэта можна разлічваць»
Галоўны трэнер «Мiнска» Арцём Чалядзінскі падзяліўся меркаваннем аб фінансавым становішчы ў клубе.
– Каманду ўжо пакінулі вопытныя варатары, якія гулялі ў мінулым годзе – Аляксандр Нячаеў і Уладзімір Пяцігорац. Вы схільныя да таго, каб у такой маладой камандзе галкіперы адпавядалі яе сярэдняму ўзросту?
– За галкіпераў у адказе Павел Часноўскі. З ім вядзецца дыялог, і гэта яго зона адказнасці. На рынку гульцоў гэтага амплуа выбар ёсць.
Самае галоўнае для нас – каб у рабят было жаданне развівацца, удасканальвацца або перазапусціць кар'еру. Вялікія грошы «Мiнск» плаціць не можа. Адштурхоўвацца будзем толькі ад гэтага.
– Тыя сціплыя фінансавыя ўмовы, якія ёсць цяпер у клубе, асабіста вас пры абмеркаванні супрацоўніцтва не збянтэжылі?
– Усе мы рэальна разумелі, у які клуб прыходзім. Натуральна, і па сумах заработнай платы таксама мы, трэнеры, з кіраўніцтвам размаўлялі. Але ўсё ж фінансавы бок для мяне ў гэтым выпадку – не першарадны фактар, хоць і немалаважны.
Найперш мне хацелася зноў спазнаць вышэйшую лігу, яшчэ раз паспрабаваць паказаць сябе на гэтым узроўні. Галоўнае, каб гэтыя невялікія, па нашых мерках, грошы выплачваліся своечасова.
Нашыя кіраўнікі запэўнілі, што на гэта можна разлічваць. Ва ўсякім разе, зробяць усё, што ад іх залежыць, – сказаў Чалядзінскі.
