Арцём Чалядзінскі: «Калі б мы ведалі загадзя каляндар ЧБ, то спарынг з БАТЭ не праводзілі б»
Трэнер «Мінска» Арцём Чалядзінскі ацаніў вынікі лёсавання вышэйшай лігі.
– Так, можна сказаць, што «Мінску» на старце дасталіся моцныя супернікі, але ў сезоне нам трэба будзе згуляць з усімі. У якім туры гэта будзе: ў першым ці ў пятнаццатым, думаю, розніцы асаблівай няма. У любым выпадку трэба гуляць. Вядома, зараз цяжка казаць дрэнна гэта ці добра.
Калі вынік для нас будзе станоўчым, тады скажам добра, ну а калі наадварот, але можна было думаць пра лепшае лёсаванне, каб у пачатку, згуляць з больш сярэднімі супернікамі, з якімі можна было канкураваць.
– У першым туры вас чакае БАТЭ, з якім мы гулялі літаральна пару дзён таму…
– Гэтым спарынгам я застаўся задаволены, нашы хлопцы паглядзелі сябе на фоне знакамітага суперніка і месцамі паказалі, што і моладзь можа гуляць супраць такога тытулаванага клуба.
Да стартавай гульні з барысаўчанамі яшчэ ёсць час, амаль тры тыдні і за гэты час можна нешта падкарэкціраваць, магчыма, з'явяцца новыя гульцы, таму гэты матч з БАТЭ трэба разглядаць як кантрольную гульню ў падрыхтоўчы перыяд, у чэмпіянаце ўсё будзе па-іншаму.
Мяне больш непакоіць атрыманая ў матчы сурʼёзная траўма нашага вядучага футбаліста Глеба Гурбана. Але, напэўна, калі б мы ведалі загадзя каляндар, то магчыма не праводзілі б гэты спарынг.
– У другім туры заўзятараў «гараджан» чакаюць сталічнае дэрбі. Для вас гульня з «Дынама» будзе прынцыповай?
– За перамогу над мінскім «Дынама» даюць тыя ж тры ачкі, што і за выйгрыш у «Смаргоні», «Тарпеда-БелАЗ» ці БАТЭ. Калі б за перамогу над чэмпіёнам давалі больш...
А прынцыповай гэта гульня будзе ў тым плане, што на фоне «Дынама» мы можам паглядзець свае сілы, праверыць свае якасці, – сказаў Чалядзінскі.
