Бах пра допуск беларусаў і расіян да АГ: «Спачатку хацелі дачакацца кваліфікацыйных турніраў»
Прэзідэнт Міжнароднага алімпійскага камітэта (МАК) Томас Бах адказаў на пытанне пра тое, якія фактары ўплываюць на тое, што да гэтага часу няма рашэння па магчымым допуску беларусаў і расіян да Алімпіяды-2024.
– Гэта фактары, якія былі першапачаткова – мы імкнуліся дачакацца таго, што будзе адбывацца падчас кваліфікацыйных турніраў, падчас сусветных і кантынентальных чэмпіянатаў, якія выступаюць як кваліфікацыйныя турніры для Алімпіяды.
Гэта тое, што мы працягваем рабіць. Вы маглі пачуць гэта ў прамежкавай справаздачы, як і пра тое, што ёсць шмат умяшанняў іншых членаў у намеры МАК адносна галоўнай місіі Алімпіяды – аб'яднаць увесь свет у мірным спаборніцтве, – сказаў Бах.
Летнія Алімпійскія гульні ў Парыжы пройдуць з 26 ліпеня па 11 жніўня 2024 года.
Нагадаем, у адказ на вайну, якая з 24 лютага 2022-га працягваецца Расіяй ва Украіне з выкарыстаннем тэрыторыі Беларусі, МАК 28 лютага 2022-га апублікаваў рэкамендацыю адхіліць прадстаўнікоў Расіі і Беларусі ад міжнародных спаборніцтваў, як i зрабiла большасць сусветных федэрацый па відах спорту.
28 сакавіка 2023-га МАК абвясцiў, што з гэтага моманту рэкамендуе дапускаць да міжнародных спаборніцтваў беларускіх і расійскіх індывідуальных атлетаў у нейтральным статусе, калі такія спартсмены не дапускалі «актыўнай падтрымкі» вайны ва Украіне, а таксама не маюць кантракта з ваеннымі або сілавымі ведамствамі Беларусі ці Расіі.