Узнагарода знайшла героя! Ланда Норыс нарэшце адкрыў лік сваім перамогам на Гран Пры Маямі
Фота: formula1.com
Пятнаццаць разоў на подыуме, але ніколі на яго вяршыні. Аднак шаснаццатая спроба была плённай, і пілот McLaren нарэшце атрымаў сваю першую перамогу, якую разам з ім чакалі, напэўна, усе прыхільнікі Формулы 1. Пры гэтым ўік-энд у Маямі быў для Ланда Норыса якім заўгодна, толькі не простым.
За такой гонкай ледзь не забыліся не толькі гарачыя навіны чэмпіянату свету (надыходзячы сыход з Red Bull Эдрыяна Ньюі, суд Гюнтэра Штайнэра з Haas), але і суботні спрынт з пятнічнай кваліфікацыяй да яго. Па іх выніках нішто не прадвесціла нядзельнага поспеху Норыса, а я напярэдадні галоўнага заезду ўік-энду думаў над тым, каб мае фармулёўкі пасля пасля чарговай разгромнай перамогі Макса Ферстапена не гучалі занадта дэпрэсіўна.
Траса ў Маямі выкарстоўваецца рэдка, счапленне з ёй пакідае чакаць лепшага, ды яшчэ і трэніроўка толькі адна, што не дазваляе ні толкам укаціцца, ні падабраць правільныя налады. Таму Ферстапен, выйграўшы спрынт-кваліфікацыю, потым здзіўляўся, бо ідэальнага круга так і не сабраў. Проста ўсе астатнія, па словах трохразовага і дзейнага чэмпіёна, праехалі ў фінале яшчэ горш. Той жа Норыс кваліфікаваўся наогул толькі дзявятым, і гэта было пачаткам яго цяжкасцей.
Займі брытанец на рашотцы спрынта пазіцыю павышэй – глядзіш, і не стаў бы ён ахвярай сутыкнення ў першым павароце на старце заезду пілотаў Aston Martin. Фернанда Алонса падбіў машыну Лэнса Строла, ну а той ужо выбіў Норыса, для якога, як і для канадца, спрынт на гэтым і скончыўся. Ацэнка маштабнага пакету абнаўленняў, якія McLaren разам з іншымі камандамі прывезлі ў Маямі, адклалася.
Ферстапен жа без асаблівых цяжкасцей выйграў спрынт, пяцёра гоншчыкаў следам фінішавалі таксама на тых жа пазіцыях, з якіх стартавалі. Пазмагаліся паміж сабой у гэтай групе хіба што напарнік Макса па Red Bull Серхіа Перэс і пілот RB Даніэль Рыкарда. Аўстраліец у пачатку заезду апярэдзіў быў мексіканца і падняўся на трэцюю пазіцыю, але на шостым кругу прапусціў яго ізноў, задаволіўшыся чацвёртым месцам. Але хаця б здабыў першыя ў сезоне ачкі.
Чэка ў сваю чаргу так і фінішаваў трэцім, бо ўгнацца за канкурэнтам з Ferrari Шарлем Леклерам, які заняў другое месца, не здолеў. Забягаючы наперад, дэфіцыт тэмпу Серхіа захаваўся і ў нядзелю. Суботні ж спрынт можна было б назваць нудным, але яго ад гэтага выратавалі сяміразовы чэмпіён свету з Mercedes і будучы напарнік Леклера Льюіс Хэмілтан і пілот Haas Кэвін Магнусэн.
Брытанец і датчанін па ходу спрынта змагаліся за дзявятую пазіцыю, ды так адчайна, што Кэвін сабраў ажно тры 10-секундныя штрафы за атрыманне перавагі пасля выезду за межы трасы і адзін пяцісекундны за проста парушэнне меж трасы. А Льюіс адхапіў праезд па піт-лэйне за перавышэнне хуткасці на ім падчас нейтралізацыі заезду аўтамабілем бяспекі, які пасля стартавага інцыдэнту вадзіў пелатон менавіта ўздоўж боксаў, а не па галоўнай прамой. У выніку ў пратаколе Хэмілтан апынуўся на шаснаццатым месцы, а Магнусэн – на васямнаццатым.
Пазней у суботу прайшла і кваліфікацыя да нядзельнай гонкі. І прайшла таксама чакана – поўл выйграў Ферстапен. Праехаць ідэальны круг ізноў не атрымалася ні ў каго, у тым ліку ў Перэса, які кваліфікаваўся толькі чацвёртым, прапусціўшы наперад абодвух пілотаў Ferrari. Леклер і на гэты раз быў бліжэй да Ферстапена, а Сайнс дзяліў другі шэраг з Чэка. Той паспрабаваў быў адыграцца ўжо на старце гонкі але памыліўся на тармажэнні перад першым паваротам і замест гэтага нават страціў адну пазіцыю.
Прапусціў пры гэтым Перэс пілота McLaren, але не Норыса, які стартаваў пятым, а Оскара Піастры, які пачынаў гонку следам за напарнікам і прарваўся наогул на трэцюю пазіцыю. І доўгі час здавалася, што менавіта аўстраліец стане аўтарам вялікага поспеху калектыву з Уокінга. Не перамогі, бо скласці на тым этапе гонкі канкурэнцыю Ферстапену, які ўдала стартаваў і пакрысе нарошчваў адрыў, але фінішу на подыуме, бо Оскар быў хутчэйшым за абодвух канкурэнтаў з Ferrari і не толькі не падпускаў да сябе Сайнса, але і абагнаў на чацвёртым кругу Леклера.
Неўзабаве пачалася і хваля піт-стопаў, адзіная для пераважнай часткі пелатона, якая прытрымлівалася кансерватыўнай стратэгіі са стартам на шынах Medium і пераходам на Hard. Тут і пачалося цікавае, што, аднак, стала ясна не адразу. Памылцы лідара гонкі на той момант асаблівага значэння ніхто не прыдаў. Ну збіў Ферстапен на дваццаць трэцім кругу абмежавальны слупочак у адной з шыкан, нічога страшнага, тым больш што кругам пазней нідэрландзец паехаў пераабувацца.
На трасу Макс вярнуўся чацвёртым, і мала хто сумняваўся, што неўзабаве ён верне сабе лідарства, калі боксы наведаюць яго канкурэнты наперадзе. І шанцы на перамогу Норыса, які ўзначаліў быў пелатон, выглядалі мізэрнымі. Але нечакана выявілася, што Ланда мусіць будзе ставіць скрыню піва Кэвіну Магнусэну. Менавіта яго суддзі прызналі вінаватым у сутыкненні з пілотам Williams Логанам Сарджэнтам у першым павароце на дваццаць восьмым кругу, якое прывяло да аварыі і выезду аўтамабіля бяспекі.
Так што Норыс на наступным кругу правёў фактычна бясплатны піт-стоп, захаваўшы першую пазіцыю і вярнуўшыся на трасу перад Ферстапенам. Той, вядома, атакаваў на рэстарце на трыццаць трэцім кругу, але не толькі не здолеў абагнаць Ланда, а пачаў ад яго адставаць, саступіўшы яму на фінішы болей за сем з паловай секунд. Шыны ў Макса былі старэйшымі за шыны брытанца на некалькі кругоў, і гэта, відаць, адлюстравалася на яго тэмпе. Таму лідару чэмпіянату прыйшлося задаволіцца другім месцам, а перамогу гэтым разам святкавалі ў McLaren.
З першым трыумфам Норыса віншавалі ўсе, у тым ліку Леклер, які заняў трэцяе месца, і Сайнс, які фінішаваў следам. Але ўжо пасля гонкі прапусціў на чацвёртую пазіцыю Перэса, бо атрымаў штрафныя пяць секунд за кантакт з Норысам падчас іх прынцыповай барацьбы пасля рэстарту, вынікам якой стала пашкоджанае іспанцам пярэдняе антыкрыло машыны аўстралійца, што і не дазволіла апошняму зарабіць ачкі.
Ланда, набраўшы 25, апярэдзіў таго ж Сайнса ў чэмпіянаце, падняўшыся на чацвёртую пазіцыю. Праўда, колькасць балаў у іх роўная – па 83, і за тытул ні той, ні той не змагаюцца. Як і Леклер, які з 98-мю ачкамі па-ранейшаму замыкае першую тройку, і Перэс, у якога 103 балы. Ферстапен са сваімі 136-цю ўсё роўна далёка ад іх усіх. Гэтаксама і Red Bull упэўнена лідзіруе ў Кубку канструктараў, маючы 239 ачкоў. Ferrari мае 187 і займае другую пазіцыю, McLaren са 124-ма на трэцяй.
Але ці захаваецца падобная сітуацыя ў бліжэйшыя годы – пытанне цяпер адкрытае. Бо сыход з Red Bull Эдрыяна Ньюі натуральна паўплывае на стан каманды. Хутчэй за ўсё, не глабальна, і толькі ад гэтага калектыў з Мілтан-Кінса сваю моц не разгубіць. Тым больш што там павінны былі рыхтавацца да такога варыянту развіцця падзей, які раней ці пазней усё роўна б рэалізаваўся, улічваючы ўзрост Ньюі. Але што страта будзе адчувальнай, прызнаюць усе.
У сваёй афіцыйнай заяве Эдрыян ні слова не сказаў пра ўнутрыкамандны скандал у Red Bull з удзелам Крысціана Хорнэра, які стаў адной з галоўных навін перад пачаткам сезона. Аднак зразумела, што нездаровая атмасфера ў камандзе ўсё ж такі адыграла сваю негатыўную ролю. А персанальна мяне навучыла быць смялейшым у сваіх прагнозах.
Каля я рыхтаваў перадсезоннае прэв’ю, то ўжо напісаў быў пра тое, які разбуральны эфект могуць мець меркаваныя непрыстойныя паводзіны Хорнэра для каманды. Але якраз тады прыйшлі навіны, што скандал быццам бы заціхае, і частку пра гэтую мутную гісторыю я перапісаў, паверыўшы афіцыйным заявам. Аднак як у чарговы раз выявілася, першая думка – самая правільная, і не варта сароміцца яе выказваць. Йос Ферстапен пасля абвяшчэння аб рашэнні Ньюі наогул заявіў, што Red Bull можа разваліцца,
Зрэшты, наступствы кроку Эдрыяна, якога ўсе настойліва сватаюць то ў Ferrari, то наогул у Williams, праявяцца ў аддаленай перспектыве. У бліжэйшай жа ў нас Гран Пры Эміліі-Раманьі, на якім брытанец яшчэ будзе на сваёй цяперашняй пасадзе і які пройдзе 17-19 мая. Тэлеграм-канал нашых сяброў Formuła Pieramohi | F1 распавядзе пра ўсё самае важнае са свету Вялікіх Прызоў, а наш блог і яго канал Honačnaja psichapatyja – і аб усім з іншых серый. Віримо в ЗСУ! Слава Україні! Жыве Беларусь!
Падтрымаць «Гоначную псіхапатыю»: банк Wise, нумар рахунку IBAN BE07 9678 4276 5466, нумар карты 4569 3348 0933 7627. Не пераводзьце грошы, калі знаходзіцеся ў Беларусі! Гэта небяспечна для вас!
