У 56 гадоў дэбютаваў за свой 16-ы клуб. Самы ўзроставы футбаліст у свеце робіць гісторыю

Японскі нападаючы Кадзуёсі Міура, якому цяпер 56 гадоў, працягвае гуляць у футбол і не збіраецца спыняцца. У лютым ён на правах арэнды перайшоў у «Алівейрэнсе» (Д2 Партугаліі). Гэта яго 16-ы клуб і пяты замежны за 38 сезонаў кар'еры! Раней ён выступаў у Бразіліі, Італіі, Харватыі і Аўстраліі. Японец з'яўляецца найстарэйшым актыўным футбалістам у свеце.

На мінулым тыдні японец ужо паспеў дэбютаваць за сваю новую каманду, выйшаўшы на замену ў матчы з «Акадэміку дэ Візэу» (4:1).

У лютым 2017 года, калі Міуры споўнілася 50, ён выйшаў на поле за «Ёкагаму» ў матчы супраць «Мацумота Ямагі». У выніку нападаючы стаў самым узроставым гульцом, які гуляў у прафесійным футболе, пабіўшы папярэдні рэкорд Стэнлі Мэцьюза.

«Я думаю, што заўсёды буду так ці інакш удзельнічаць у футболе, – казаў Кадзуёсі ў 2021-м. – Я не ведаю, як доўга буду гуляць. Можа быць я скончу заўтра, а можа быць праз два ці тры гады. Калі я падпісаў свой першы прафесійны кантракт у Бразіліі ва ўзросце 18 гадоў, ніколі не думаў, што буду гуляць да гэтага ўзросту. Я змог зрабіць гэта, таму што кожны год аддаваў усю сваю энергію футболу».