Жудасны эпізод з баскетбольнай Лігі Чэмпіёнаў. Арбітра забралі з арэны на насілках
Аляксандр Глішыч парваў звязкі.
Жудасны эпізод адбыўся з сербскім арбітрам Аляксандрам Глішычам, які абслугоўваў матч баскетбольнай Лігі Чэмпіёнаў паміж іспанскім «Тэнэрыфэ» і латвійскім ВЭФам.
У трэцяй чвэрці арбітр рыхтаваўся падаць сігнал пра неспартыўны фол, але спатыкнуўся аб уласную нагу і ўпаў.
Спачатку арбітру паспрабавалі дапамагчы калегі і камісар матчу, але неўзабаве зразумелі, што без дапамогі прафесіяналаў не абысціся. Медыкі некалькі хвілін «чаравалі» над Глішычам, а затым пагрузілі яго на насілкі і павезлі з арэны.
Пасля лекары ўстанавілі, што рэферы атрымаў разрыў крыжападобных звязкаў.
Матч дайгралі з двума арбітрамі, а перамогу атрымалі іспанцы - 76:55.
Зараз «Тэнэрыфэ» займае трэцяе месца ў турнірнай табліцы групы C Лігі чэмпіёнаў, ВЭФ замыкае сваю чацвёрку.
