Арлоўскі эмацыйна пракаментаваў 3-е паражэнне запар: на рускай паслаў нядобразычліўцаў, на англійскай быў стрыманы і лаканічны

У ноч на 14 студзеня беларускі баец MMA Андрэй Арлоўскі, якому менш чым праз месяц стукне 45, праводзіў свой 41-ы паядынак у UFC. Яго супернікам стаў 32-гадовы дамініканец Валда Картэс-Акоста.

Бой прайшоў з перавагай Картэса-Акосты на працягу ўсіх трох раўндаў. Дамініканец меў некалькі магчымасцяў датэрмінова скончыць паядынак, але дасведчаны Арлоўскі змог выйсці з крытычных сітуацый. У выніку суддзі аднагалосна аддалі перамогу суперніку беларуса

Апошняю перамогу ў UFC Арлоўскі атрымаў 30 красавіка 2022 года, калі ён паасобным рашэннем суддзяў аказаўся мацнейшым за амерыканца Джэйка Колле. Затым былі тры паражэнні: сабмішэн ад бразільца Маркаса Ражэрыа Дэ Лімы, тэхнічны накаўт ад амерыканца Дон'Тэйлы Мэйесу і апошняе ад Картэса-Акосты. Для дамініканскага байца гэтая перамога стала 11-й у 12 баях на прафесійным узроўні. Баланс Арлоўскага зараз – 34-23.

Дарэчы, апошнюю паразу беларускі баец, здаецца, успрыняў вельмі балюча. Адразу пасля аб'яўлення вынікаў паядынку ён вельмі спяшаўся пакінуць актагон і ледзь не забыўся паціснуць руку суперніку.

А праз некалькі гадзін беларус у сваім Instagram выклаў фота з неадназначным подпісам на дзвюх мовах. На англійскай Арлоўскі, мяркуючы па ўсім, лаканічна пракаментаваў паядынак, напісаўшы upset, but it is what it is, што ў перакладзе азначае «засмучаны, але што ёсць, то ёсць».

Далей ідзе тэкст на рускай мове з выкарыстаннем ненарматыўнай лексікі.

Заканчваць са спортам «пітбуль» пакуль не плануе. Зусім нядаўна ён расказваў, што, нягледзячы на статус самага старога байца UFC, Арлоўскі хоча паставіць рэкорд і стаць самым узроставым байцом усіх часоў.