БАТЭ ўжо зусім не «сям'я» – Альшэўскі вінаваціць гульцоў, яны незадаволеныя трэнерам i адзiн адным, а з Капскім лаюцца без наступстваў
Ссылка Падстрэлава ў дубль – вяршыня айсберга.
Улетку БАТЭ правёў чатыры адборачныя раўнды ў еўракубках (у групу так і не выйшаў), з-за чаго перанёс шмат матчаў ЧБ. Цяпер даводзіцца гуляць іх у тэмпе – атрымліваецца дрэнна: у трох матчах за восем дзён барысаўчане набралі толькі адно ачко, 3 кастрычніка прайграўшы «Энергетыку-БДУ» з апошняга месца. Цяпер у БАТЭ практычна роўныя пазіцыі з «Тарпеда-БелАЗ» і «Славіяй» у барацьбе за бронзу – пра іншыя медалі і казаць не даводзіцца.
Пры гэтым відавочны разлад і ў самой камандзе. Не паспела аціхнуць гісторыя з пакараннем за непаслушэнства Аляксандра Шасцюка (адабраў мяч для ўдару з пенальці ў прызначанага трэнерамі калегі і не забіў), як аказалася, што правініўся яшчэ і Дзмітрый Падстрэлаў. Пасля матчу са «студэнтамі» ў Кірылы Альшэўскага спыталі, чаму гулец прапусціў сустрэчу – і галоўны трэнер БАТЭ адказаў: «Адправілі яго ў дубль. Былі пэўныя абставіны. Гэта ўнутраная кухня».
Зрэшты, нам удалося даведацца, што адбылося ў сітуацыі з гульцом, а таксама якія ўвогуле настроі зараз у барысаўскай камандзе (спойлер: «сям'ёй», як было прынята пры Анатолі Капскім, дакладна не назваць).
Падстрэлаў прыйшоў у БАТЭ ў пачатку ліпеня свабодным агентам пасля паўгода ў казахстанскім «Каспіі». Паўабаронца паспеў правесці за барысаўчан 13 матчаў (пяць у старце), аформіць дубль у вароты брэсцкага «Дынама» ў пачатку верасня і адзначыцца асістам у 1-м раундзе кваліфікацыі ЛЧ (у матчы ў адказ з албанскім «Партызані»). Спасылкі ў дубль менавіта па гульнявых момантах нічога не прадвяшчала. Хоць для БАТЭ гэта не першая такая сітуацыя ў сезоне – у чэрвені клуб адправіў у дубль 19-гадовага форварда Аляксандра Французава, які нядрэнна ажыўляў матчы выхадамі на замену. Прычына аказалася ў незадаволенасці кіраўніцтва клуба адмовай гульца падпісваць новы кантракт. У выніку ў верасні гулец апынуўся ў «Чартанава» з расiйскага Д3.
З Падстрэлавым сітуацыя зусім іншая. Паводле нашай інфармацыі, тут уся справа ў тым, што адбылося ў раздзявальні БАТЭ 30 верасня пасля нічыёй (1:1) у гасцях у «Тарпеда-БелАЗ». Як удалося даведацца, Альшэўскі зладзіў камандзе сапраўдны разнос з асабістымі прэтэнзіямі да шэрагу гульцоў. Дасталася і Падстрэлаву, які ў Жодзіна выйшаў на замену на 63-й хвіліне замест Дзмітрыя Анцілеўскага і нічым асабліва не запомніўся. Аднак, у адрозненне ад астатніх, Падстрэлаў пры ўсёй камандзе груба адказаў трэнеру на яго словы. З-за гэтага Альшэўскі неўзабаве і настаяў на «выхаваўчай меры» – пераводзе паўабаронцы ў дубль. Пакуль незразумела, ці збіраецца ўвогуле трэнер вяртаць адтуль гульца і на якіх умовах.
Як удалося даведацца, у гэтай сітуацыі некалькі гульцоў БАТЭ засталіся на баку Падстрэлава – лічаць, што прэтэнзіі Альшэўскага да гульца былі беспадстаўныя. Хаця пры гэтым усе згодныя з тым, што трэба трымаць сябе ў руках, а не грубіць галоўнаму трэнеру.
Адразу пасля паражэння БАТЭ ад «Энергетыка-БДУ» журналіст Уладзіслаў Татур таксама заявіў, што, паводле ягонай інфармацыі, «бос БАТЭ Андрэй Капскі не кантралюе каманду, губляе яе і Альшэўскі, у раздзявальні няма парадку і дысцыпліны – ёсць праблемы з Арцёмам Канцавым і Дзянісам Грачыхам». Па нашых звестках, атмасфера ў калектыве сапраўды вымушае жадаць лепшага, а каманда не ўспрымае ўстаноўкі Альшэўскага. Футбалісты лічаць, што схемы, якія прасоўваюцца трэнерам, не працуюць. Яго заданні выконваюцца, але, паводле нашай інфармацыі, гульцы ўжо не раз прапаноўвалі коучу нешта памяняць, паспрабаваць штосьцi новае ў надзеі на вынік.
Як удалося высветліць, Альшэўскі дае зразумець, што свае метады змяняць не будзе. І хоць на прэс-канферэнцыях коўч віну за паразы бярэ на сябе, але не на публіку віноўнікамі няўдач БАТЭ бачыць менавіта гульцоў, якія, на яго думку, не ўспрымаюць трэнерскія ўстаноўкі належным чынам.
Не асабліва аўтарытэтны ў раздзявальні кіраўнік БАТЭ Андрэй Капскі. Як удалося даведацца, ён пасля матчаў нярэдка прыходзіць да гульцоў і таксама прад'яўляе ім прэтэнзіі – вось толькі футбалісты спакойна дазваляюць сабе лаяцца з кіраўніком. Больш за тое, паводле нашай інфармацыі, ніякіх пакаранняў кшталту штрафаў гульцы пасля гэтага не атрымліваюць.
Па словах нашых крыніц, на атмасферу ў калектыве не лепшым чынам уплывае і тое, што частка каманды выкладваецца на трэніроўках на 100 працэнтаў – а некаторыя выканаўцы, груба кажучы, адбываюць нумар. Аднак з боку Альшэўскага не бачаць рашучых дзеянняў у дачыненні да гэтых гульцоў – і такая «лаяльнасць» не задавальняе тых, хто працуе на занятках на ўсю моц. У выніку ў футбалістаў узнікаюць прэтэнзіі адзiн да аднаго.
Больш за тое, паводле нашай інфармацыі, у святле ўсяго таго, што робіцца ў камандзе, і яе вынікаў у еўракубках некаторыя гульцы летам нават выказвалі жаданне пакінуць БАТЭ. У выніку яны засталіся ў камандзе, але зараз проста дайграюць сезон. Што будзе зімой, пакуль ніводная з нашых крыніц прадказваць не бярэцца.
Фота: fcbate.by
