Каламутны агент не знік з «Шахцёра», хоць там і безграшоўе. Вось чым ён займаецца і пры чым тут Карпіцкі
Працягвае ставіць сваіх людзей.
Фасад няпростых абставінаў «Шахцёр» добра вядомы тым, хто сочыць за беларускім футболам: каманда за махінацыі пазбавілася чэмпіёнскага звання за сезон-2022, увесь мінулы год змагалася за выжыванне ў эліце, бо атрымала штраф у 35 балаў – і здолела ўратавацца. Штраф на сезон-2024 па старой справе склаў 20 пунктаў, але сітуацыя ўскладняецца тым, што на Салігорск накладзеная забарона на падпісанне новых гульцоў за даўгі перад тымі, хто выступаў за каманду раней.
Але ёсць у «Шахцёра» і свой задні двор. Уласна, там і робяцца рэчы, якія завялі клуб у тупік. Цягам некалькіх сезонаў за сурʼёзныя грошы ў каманду прывозіліся легіянеры, часта не самага высокага ўзроўню, але пад добрыя заробкі, потым гэтых легіянераў прыбіралі. На гэтых аперацыях «Шахцёр» нёс сурʼёзныя фінансавыя страты, марнуючы грошы свайго галоўнага фундатара «Беларуськалія», але боса прадпрыемства лукашыста Івана Галаватага гэта не хвалявала. Ён хоць напаказ і любіць спорт, але праваліўся і ў хакеі, а кіраванне футбольным праектам перадаў чалавеку, які ў клубе не мае ніякай пасады і не нясе ніякай адказнасці. Гаворка пра агента з сумнеўнай рэпутацыяй Яўгеніі Култаева, які проста па знаёмстве са спрэчнай эфектыўнасцю варочаў сотнямі тысяч долараў, што паступалі з прадпрыемства, якое ў Беларусі лічыцца нацыянальным здабыткам.
Култаеў не толькі набіраў гульцоў, але і фармаваў менеджмент «Шахцёра». І гэта яго людзі займаліся і забароненым стымуляваннем супернікаў сваіх канкурэнтаў, і зусім ужо крымінальным подкупам тых, хто мог перашкодзіць у барацьбе за золата.
А дзе Култаеў сёння, калі «Шахцёр» сядзіць у даўгах? Вось што мы змаглі даведацца пра гэта.
***
«Гарнякі» праводзяць адзін з самых складаных сезонаў у сваёй гісторыі. Пасля скандалу з дамоўнымі матчамі каманда здолела выратавацца ад вылету ў Д1 у мінулым сезоне, але цяпер гэта зрабіць будзе больш складана, хоць і штраф на 15 пунктаў менш. Калектыў істотна амаладзіўся, статусныя выканаўцы амаль усе сышлі, трэнуе 31-гадовы Станіслаў Сувораў, дэбютант на ўзроўні вышэйшай лігі. Пасля пяці тураў салігорцы зʼяўляюцца галоўным прэтэндэнтам на вылет: перамога, нічыя і тры паражэнні – з такім графікам цяжка на нешта спадзявацца.
«Шахцёр» замыкае табліцу з мінусам у 16 пунктаў. Да «Слуцка», які пакутуе ад безграшоўя і здабыў усяго адзін бал у пяці матчах, – 17 пунктаў. 28 красавіка гэтыя каманды правядуць вочную сустрэчу.
«Шахцёр» напэўна мог бы ісці больш шпарка пры наяўнасці мацнейшага складу, але з лістапада-2023 клубу, які нарабіў даўгоў перад футбалістамі, забаронена падпісваць навічкоў. У Салігорску спадзяваліся неяк вырашыць сітуацыю і зімой нават заключылі кантракты з вопытнымі Дзмітрыем Багам і Аляксандрам Катляровым. Аднак заявіць іх не ўдалося. На сайце ФІФА значыцца 11 спраў супраць «Шахцёра» – ініцыявалі іх футбалісты, якія хочуць выбіць свае грошы. Ну а клуб пакуль можа ўзмацняцца толькі выканаўцамі, якія ёсць у яго структуры. У прыватнасці, тымі, хто без асаблівага поспеху выступаў за фарм у першай лізе. У такім рэжыме «гарнякі» будуць жыць, пакуль не разлічацца па сваіх абавязаннях.
Тым не менш нават у такіх абставінах клуб не спыніў весці справы з агентам, які доўгія гады пракручваў каламутныя трансферныя схемы ў Салігорску, а потым разам з сынам стаў адным з фігурантаў скандалу з дамоўнымі матчамі. Гаворка пра Яўгена Култаева-старэйшага. Па нашай інфармацыі, ягоны ўплыў на клуб захоўваецца. Як сцвярджаюць крыніцы, цяперашні дырэктар Дзмітрый Агееў зʼявіўся ў «Шахцёры» з падачы менавіта Култаева. Гэтыя двое знаёмыя яшчэ з таго часу, як Агееў працаваў у расійскім футболе (у сярэдзіне 2010-х быў дарадцам прэзідэнта тульскага «Арсенала», а ў 2016-м там жа займаў пасаду спартыўнага дырэктара). Трансферныя справы звялі футбольных пасярэднікаў і яны ўжо каля 10 гадоў узаемадзейнічаюць.
Пасля таго, як у пачатку 2023 года быў затрыманы спартыўны дырэктар «Шахцёра» ураджэнец Казахстана Уладзімір Нідэргаус, якога таксама прывёў у белфутбол Култаеў (а раней прыводзіў у Салігорск на тую ж пазіцыю Дзмітрыя Хахлова, Міхаіла Лебедзева, Аляксандра Рэхвіяшвілі), яго пасаду заняў Агееў, таксама свой чалавек. Сам Култаеў па-ранейшаму аддае перавагу заставацца ў цені і рабіць справы чужымі рукамі. Як кажуць нашыя дасведчаныя крыніцы, дзеяч з латвійскім грамадзянствам прапанаваў кандыдатуру Агеева кіраўніку «Беларуськалія» Галаватаму, той яе ўхваліў.
Не ўсё ў Беларусі ў Култаева ішло гладка. У лютым 2023-га лукашэнкаўскія сілавікі затрымалі яго сына, Яўгена Култаева-малодшага, і змясцілі ў СІЗА. Бацьку, які знаходзіўся ў Латвіі, было прапанавана абмяняць яго на сябе. Пры гэтым нам невядома, у чым Култаеў-малодшы абвінавачваўся. Аднак яго бацька ў Беларусь не паехаў і ехаць не збіраецца, бо баіцца крымінальнага пераследу.
Што да сына, той доўгі час нашы суразмоўцы пацвярджалі, што ён знаходзіцца ў СІЗА ў якасці закладніка. Аднак дзе ён сёння, нам невядома. Па палітычных матывах рэжым Лукашэнкі можа трымаць людзей пад следствам колькі заўгодна доўга, але футбольныя махінацыі наўрад ці мяркуюць такія меры. Той жа Нідэргаус правёў пад вартай каля пяці месяцаў і атрымаў прысуд, не звязаны з пазбаўленнем волі, пасля чаго пакінуў Беларусь.
Але вернемся да Агеева. У студзені 2024-га ён заняў ужо пасаду дырэктара клуба, а спартыўным дырэктарам стаў 60-гадовы Сяргей Падпалы, вядомы беларускім заўзятарам тым, што ў 2003-м як трэнер прывёў «Гомель» да перамогі ў чэмпіянаце. Праўда, як кажуць нашыя суразмоўцы, гэта ўжо хутчэй ініцыятыва Агеева, які даўно знаёмы са спецыялістам.
Падпалы бачыцца назіральнікам «па вялікім рахунку, намінальнай фігурай». Па-першае, клуб жыве ў трансферным бане і не можа ні запрашаць, ні заяўляць новых гульцоў. Па-другое, Култаеў-старэйшы не мае намеру адмаўляцца ад свайго ўплыву. У міжсезонне да «гарнякоў» на прагляд прыязджалі як раз кліенты агента. У прыватнасці, 26-гадовы Арцём Юран, сын экс-гульца зборнай Расіі Сяргея Юрана. Да таго моманту «Шахцёру» ужо забаранілі рэгістраваць навічкоў, але ў клубе на нешта спадзяваліся. Калі стала зразумела, што патуранняў ад ФІФА не будзе, Юран зʼехаў (сёння гуляе за «Пары НН-2» у другой лізе Расіі).
Праўда, у сёлетнім «Шахцёры» і так ёсць футбалісты Култаева-старэйшага. Нашыя крыніцы дакладна адносяць у гэтую катэгорыю абаронцу Іллю Лукашэвіча і албанскага паўабаронцу Валона Ахмедзі – з 18 тысячамі рублёў у месяц самага высокааплатнага гульца каманды проста цяпер, які да таго ж судзіцца з «Шахцёрам» праз даўгі. Нельга выключаць, што і нехта з іншых футбалістаў карыстаецца паслугамі пасярэдніка з латвійскім пашпартам.
Пакуль «Шахцёр» не аднавіў фінансавую моц і не можа спускаць столькі ж грошай, колькі і раней, Култаеў усё роўна застаецца побач. Навошта? Сёння ён спадзяецца засвяціць маладых беларускіх гульцоў, да якіх мае дачыненне, з разлікам на тое, што іх удасца прадаць і атрымаць свае камісійныя. З нападнікам Ягорам Карпіцкім менавіта так і атрымалася. 19-гадовы гулец у чэрвені мінулага года падпісаў кантракт на чатыры сезоны з «Крыламі Саветаў». За першую палову сезона-2023 ён забіў за «гарнякоў» 12 мячоў у 13 сустрэчах і атрымаў прапанову з Расіі. Афіцыйна паведамлялася, што «Крылы» заплацілі «Шахцёру» 130 тысяч еўра, а вось расійскі агент Антон Смірноў сцвярджаў, што некалькі чалавек, у тым ліку Култаеў-старэйшы, атрымалі за трансфер камісію, агульная сума якой склала 600 тысяч еўра. Некалькі крыніц пацвердзілі нам, што ўжо некалькі гадоў Култаеў-старэйшы вядзе справы Карпіцкага. На сёння футбаліст не запатрабаваны ў стартавым складзе сваёй каманды. Карʼера аказалася ў тупіку, але яго агенту дакладна скардзіцца няма на што. Хаця сам гулец перад тым, як адправіцца ў Расію, на словах збіраўся ў Еўропу.
Па нашых звестках, Култаеў не прапускае магчымасці перацягнуць да сябе тую салігорскую моладзь, якая працуе з іншымі пасярэднікамі.
Фота: fcshakhter.by
