Ліверпуль і Тотэнгэм гуляюць у нічыю

Гэта быў майстар-клас ад Контэ, яго абарончая тактыка спрацавала, але вынік не задаволіў анікога. Першая палова распачалася з высокага тэмпу, Ліверпуль накінуўся на суперніка і прыціскаў яго на іх жа палове поля. Гэта быў хуткі футбол, нават і не падумаў бы, што Ліверпуль гуляў у ЛЧ пасярод тыдня. Яны выглядалі энергічна і прымушалі памыляцца гульцоў Тотэнгэма пры выхадзе з-пад прэсінга. Гэта быў ціск, які амаль не перарываўся, але “шпоры” без асаблівых турботаў адбіваліся.

Абарончая пабудова 5–4–1, дзе паміж лініямі няма вялізнага разрыву, дзе гульцы падстрахоўваюць адно аднаго, гэта відавочна каманда, якую пабудаваў Контэ. Яны гублялі мяч пры спробе контр-атакаваць, але калі ў іх атрымлівалася выбрацца з-пад ціску “чырвоных”, то яны мелі гострыя моманты. Адна з такіх хуткіх атак прывяла да голу ў другім тайме, калі Сесеньён знайшоў у цэнтры цалкам вольнага Сона, а той з вялікім задавальненнем адправіў мяч у сетку.

Гэта быў моцны ўдар па Ліверпулю, улічваючы, як абараняўся Тотэнгэм, задача перамагчы ўскладнілася шматкратна. Але адзначым, што Ліверпуль узмацніў ціск і ў пэўныя моманты гульня завісала толькі каля штрафной Льёрыса.

І на 74-й хвіліне такія дзеянні гаспадароў прывялі да голу. Дыяз змясціўся са свайго фланга ў цэнтр і пасля пары ложных замахаў прабіў, мяч дакранаецца да нагі Бентанкура і залятае ў ніжні кут варот.

Энфілд узрываецца, камандзе пасміхнулася ўдача, шчыра, яны гэтага заслужылі. 1–1 і яшчэ застаецца час, каб здабыць 3 пункты. Але фінальнага штурму так і не атрымалася. Ліверпуль насядаў на вароты Тотэнгэма, але па сапраўднаму гострых момантаў не ўзнікала. А вось “шпоры” маглі б вырваць і перамогу на апошніх хвілінах. Кейн быў адзін у метрах васьмі ад варот Бэкера, але вырашыў не прабіваць галавой, а зрабіць скідку на партнёра, мяч быў перахоплены.

Кампрамісны вынік 1–1, гэтая нічыя не задаволіла нікога. На тварах гульцоў праглядалася расчараванне. Ліверпульцы могуць адпусціць “Сіці” у барацьбе за чэмпіёнства, а “Шпоры” могуць адстаць ад Арсенала. Трэнеры адзначылі добрую гульню сваіх гульцоў. Контэ хваліў, што змаглі выстаяць на Энфілдзе супраць адной з мацнейшых каманд свету. А Клоп быў задаволены рухам сваіх гульцоў, адзначыў характар, што ўдалося выраўняць лік, бо супернік вельмі добра абараняўся.