У «Сіці» пачалася непазбежная перабудова, але новыя (патэнцыйныя) трансферы не даюць яе адчуць. Пеп зрабіў усё, каб яна праходзіла непрыметна

Пасля чэмпіёнства ў англійскай прэм'ер-лізе і перамог у Кубку Англіі і Лізе чэмпіёнаў «Манчэстэр Сіці» і ўвогуле мог бы скончыць з футболам, але так яно не працуе, так што «гараджане» рыхтуюцца да новага, патэнцыйна небеспраблемнага сезону.

Патэнцыйна небеспраблемным ён можа быць менавіта таму, што сёлета ўсе будуць чакаць ад манчэстэрцаў толькі замацавання поспеху, а каманда перажывае, хоць і невялікую, але ўсё ж перабудову шматгадовага і стабільнага кадравага складу.

Хто сышоў, хто прыйшоў на замену, які рух чакаць да канца трансфернага акна і хто з наяўных у камандзе футбалістаў можа выстраліць у новым сезоне? Разбіраемся.

Гюндаган і Марэз сышлі – яны былі асноўнымі, але ўжо ўзроставымі футбалістамі.

Некалькі сезонаў таму «Ліверпуль» лічылі самай стабільнай камандай Еўропы – у Юргена Клопа быў пастаянны стартавы склад, які прыносіў вынік як у хатніх турнірах, так і ў еўракубкавых. Зрэшты, у мінулым сезоне ўсю сталасць літаральна разбурыў сыход Сад'ё Манэ, так што мерсісайдцы пачалі маштабную перабудову складу, якую працягваюць і гэтым летам.

Карону стабільнасці Клоп перадаў Пепу Гвардыёле, і нават нягледзячы на знакамітую ратацыю трэнера і нечаканыя праблемы на левым флангу абароны, іспанец разам з камандай пацвердзілі гэтае званне.

Праўда, ужо летам каманду пакінулі два важныя элементы ў гульні Пепа ў мінулым сезоне – Ілкай Гюндаган і Рыяд Марэз.

Ужо экс-капітан «гараджан» Гюндаган пакінуў клуб па ўласнай ініцыятыве – у яго была прапанова падпісаць новы кантракт з манчэстэрцамі, аднак немец вырашыў рухацца далей і на правах вольнага агента падпісаў 2-гадовы кантракт з «Барселонай».

Для «Сіці» гэта, канешне, вялікая страта, бо мінулы сезон для Ілкая быў не толькі адным з самых дзейсных, але і найлепшы у яго футбольнай кар'еры.

Развітанне з Гюндаганам было хоць і балючым, але з іншага боку чаканым – кантракт падыходзіў да канца, а дамоўленасці пра новае пагадненне ўсё не было. А вось сыход Рыяда Марэза сапраўды стаў нечаканым.

На працягу доўгага часу Марэз быў галоўнай зброяй ратацыі Гвардыёлы – у мінулым сезоне быў перыяд, калі ён некалькі тыдняў сядзеў на лаўцы запасных у АПЛ, а ў плэй-оф Лігі чэмпіёнаў у старце выйшаў толькі аднойчы (фінал супраць «Інтэра» прасядзеў у запасе). Зрэшты, гэта не перашкаджала алжырцу запісаць на свой лік 28 рэзультатыўных дзеянняў ва ўсіх турнірах і ўнесці сур'ёзны ўклад у агульнакамандны поспех.

Выйграўшы ўсё, што магчыма, Марэз вырашыў змяніць абстаноўку і з'ехаў на кантракт усяго свайго жыцця ў «Аль-Ахлі». Але «Сіці» таксама ў выйгрышы: клуб атрымаў 35 млн еўра, якія можа рэінвеставаць ва ўзмацненне правага флангу атакі.

Так, Гюндоган і Марэз былі увогуле асноўнымі футбалістамі Пепа, але больш ідэальнага таймінгу для развітання і нельга было прыдумаць – яны абодва пакінулі «гараджан» пасля паспяховага сезона ў клубнай гісторыі ў 32-гадовым узросце. Змена пакаленняў у манчэстэрцаў ужо паціху пачынаецца.

Менш прыкметна для ўсіх таксама сышлі Бенжамен Мендзі (падпісаў кантракт з «Лар'янам»), Іса Кабарэ (адправіўся ў арэнду ў «Лутон») і Янхель Эрэра (аформіў паўнавартасны трансфер у «Жырону» за 5 млн еўра).

«Сіці» хутка знайшоў замену Гюндагану, а таксама ўзмацніў цэнтр абароны – і ўжо выдаткаваў 120 млн еўра

Растанне з Гюндаганам аказалася эмацыйным, аднак клуб кампенсаваў гэтую страту хуткім трансферам Матэа Ковачыча, якога набылі ў «Чэлсі» за 29,1 млн еўра.

Ковачыч ужо выходзіў на матч Community Shield з «Арсеналам» у стартавым складзе, а многія футбольныя эксперты ўпэўненыя, што пад кіраўніцтвам Пепа 29-гадовы Матэа зможа індывідуальна выйсці на больш магутны ўзровень, чым раней, бо ён упісваецца ў філасофію гульні Гвардыёлы.

Яшчэ больш сваю харвацкую фан-базу «гараджане» пашырылі пасля другога самага дарагога трансферу ў клубнай гісторыі – заплацілі «Лейпцыгу» 90 млн еўра за цэнтральнага абаронцы Ёшка Гвардыёла.

У матчы з «Арсеналам» Гвардыёл яшчэ не ўдзельнічаў, але яго афіцыйны дэбют чакаюць ужо ў першым туры АПЛ – у паядынку супраць «Бернлі».

«На шчасце, зараз мы з Холандам на адным баку, таму мне не трэба будзе перажываць за тое, як спыніць яго», – жартаўліва (а сапраўды сур'ёзна) пракаментаваў свой трансфер харват, які правёў усе 90 хвілін у матчы супраць «Сіці» ў ЛЧ у мінулым сезоне, у якім Эрлінг адгрузіў пента-трык у вароты «РБ».

Аднак новыя трансферы яшчэ будуць – як на ўваход, так і, верагодна, на выхад

Пасля адходаў асноўных гульцоў Пеп хоча закрыць іх пазіцыі новымі футбалістамі, і калі на пазіцыю Гюндагана ўжо знайшлі замену, то на месца Марэза пакуль няма. Хаця прывабныя варыянты прысутнічаюць.

Паводле інфармацыі брытанскіх СМІ, галоўныя прэтэндэнты на трансфер у «Сіці» – Майкл Олісе з «Крыcтал Пэлас» і Жэрэмі Даку з «Рэна».

Француз Олісе выглядае ідэальнай прамой заменай Марэзу – ён леваногі і тэхнічны правы вінгер, які ахвотна ссоўваецца ў цэнтр і які аддае пышныя перадачы паміж лініямі (хлеб Голанда), выконвае стандартныя становішчы і мае добры абводны ўдар з левай нагі. Бельгіец Даку ж – футбаліст больш індывідуальнага плана, які праяўляе актыўнасць на правым крыле ў першую чаргу за кошт хуткасці і кантролю мяча.

Яшчэ адно прозвішча, якое апошнім часам вельмі актыўна звязваюць з «гараджанамі», – Лукас Пакета. Галоўны трэнер «Вест Хэма» Дэвід Моес пацвердзіў інфармацыю, што «Сіці» зрабіў афіцыйную прапанову лонданцам наконт трансферу бразільца (кажуць, у памеры 101 млн еўра), аднак заявіў, што гэта «зусім не той кошт, у які ў клубе ацэньваюць Лукаса».

Сам футбаліст хоча пераехаць у Манчэстэр, а «Сіці» робіць усё магчымае, каб трансфер усё ж адбыўся – нават гатовы ўключыць у пагадненне Коўла Палмера (аўтара гола ў вароты «Арсенала»), які хоча атрымліваць больш гульнявой практыкі.

З іншага боку, Палмер – не адзіны гулец дзеючых чэмпіёнаў Англіі, які можа пакінуць клуб. Перш за ўсё, гаворка пра Жааў Канселу. Гвардыёла не мае намеру і далей працаваць з партугальцам, які зімой сапсаваў сабе рэпутацыю ў клубе, так што ахвотна адпусціць яго ў «Барселону», якая быццам бы цікавіцца яго паслугамі.

Эмерык Лапорт хоча атрымліваць больш гульнявой практыкі і гуляць больш важную ролю ў камандзе, аднак з прыездам Йошка Гвардыёла яго шанцы адкрыта памяншаюцца. Ёсць інфармацыя, што ім актыўна цікавяцца саудаўскія клубы, так што «Сіці» дакладна не адмовіцца ад лукатыўнай прапановы.

Але ў «Сіці» таксама ёсць добрыя ўнутраныя рэсурсы. Уокер і Бернарду застаюцца, а Філіпс і Альварэс стануць важнымі гульцамі.

Пеп разам з кіраўніцтвам клуба зрабіў усё магчымае, каб затрымаць кадравую перабудову і не даць вокамгненна разваліцца камандзе, якая выйграла трэбл мінулага сезона. Менавіта таму, здаецца, у Манчэстэры застаюцца Кайл Уокер і Бернарду Сілва.

Англічанін быў вельмі блізкі да пераходу ў «Баварыю», якая была гатовая парушыць клубнае правіла не даваць узроставым футбалістам доўгатэрміновыя кантракты, а перамовамі з агентамі Уокера асабіста займаўся Томас Тухель. Кантракт Кайла з манчэстэрцамі заканчваецца наступным летам, але ён ужо дамовіўся пра пралангацыю, афіцыйную аб'яву якой чакаюць у бліжэйшы час.

За Бернарду ўсё лета ганяліся «ПСЖ», «Барса» і саудаўскія клубы, але прыватная размова з Гвардыёлай прымусіла партугальца застацца, пасля чаго яго ў клубе назвалі некранутым.

Больш важную ролю ў новай кампаніі павінны гуляць Кэлвін Філіпс і Хуліян Альварэс.

Для англічаніна дэбютны сезон у «Сіці» выдаўся катастрафічным (вядома ж, у індывідуальным плане), але такая праблема пераследавала і Аке, і Родры, і Грыліша і многіх іншых, таму Філіпс гатовы перазапусціцца і стаць важным футбалістам у абойме Пепа. І такая магчымасць у яго сапраўды будзе, бо Родры ў інтэрв'ю The Athletic заявіў, што «60 матчаў за сезон наўрад ці прыносяць карысць яго здароўю» і збіраецца пагаварыць пра гэта з клубам і трэнерам.

У аргентынца ўсё было не так дрэнна, але ён таксама хоча быць неад'емнай часткай стартавага складу – і абыякава, на якой пазіцыі З «Арсеналам» Альварэс адыграў на пазіцыі атакавалага хаўбека і зусім не супраць закрыць правы фланг атакі, калі Пеп будзе разглядаць такую опцыю.

Прарыў таксама чакае і Серхіа Гомес, які ў свой дэбютны сезон на «Іціхадзе» адыграў усяго 971 хвіліну. Іспанец, як і Зінчанка ў свой час, гуляе мала, аднак, паводле слоў Пепа, шмат працуе, не збіраецца пакідаць каманду і будзе змагацца праз хвіліны на полі.

Фота: FC Barcelona, Al-Ahli Saudi Club, Manchester City, Craig Mercer/REUTERS, Pedro Soares/Keystone Press Agency/Global Look Press