Абаронца-гаварун спачатку хваліў Скрыпчанку, а цяпер раз’юшыў яго – і быў сасланы ў дубль. Пры гэтым мае максімальны заробак у межах ЧБ
Такога цяжка будзе спіхнуць у арэнду.
27 чэрвеня стала вядома, што абаронца мінскага "Дынама" Руслан Хадаркевіч адхілены ад працы з асноўнай камандай "бела-блакітных". Пры гэтым у пачатку 2023-га, толькі перайшоўшы ў клуб, футбаліст захапляўся галоўным трэнерам Вадзімам Скрыпчанкам, а па выніку за паўгода не правёў пад яго кіраўніцтвам у афіцыйных матчах ні хвіліны. Чаму 30-гадовы Хадаркевіч патрапіў пад санкцыі? Калі коратка, то дагаварыўся ("Трыбуна" даведалася некаторыя падрабязнасці).
Што паказаў у сезоне-2023?
Кантракт з мінскім клубам футбаліст падпісаў у апошні дзень 2022-га, да гэтага правёўшы два з паловай гады ў «Шахцёры». Заключны сезон у Салігорску склаўся не найлепшым чынам: усяго сем матчаў ва ўсіх турнірах (шэсць у аснове) з дзвюма жоўтымі карткамі. Цікава, што ў матчах ЧБ, дзе выходзіў на поле Хадаркевіч, «Шахцёр» зарабіў усяго два балы (па 1:1 з «Нёманам» і брэсцкім «Дынама»), а ў трох сустрэчах «гарнякі» саступілі. Яшчэ ў 13 матчах футбаліст заставаўся на лаўцы запасных.
На гульнявую практыку Хадаркевіча ў Салігорску ўплывала не толькі тое, што ён прайграваў канкурэнцыю Сяргею Паліцевічу, Ягору Філіпенку і Мілашу Шатары, але і траўма калена. Улетку абаронца прапусціў два месяцы якраз праз пашкоджанне меніска.
Затое верыў у футбаліста Георгій Кандрацьеў, які ўпарта выклікаў яго ў нацыянальную зборную: шэсць матчаў за 2022 год, ва ўсіх па 90 хвілін.
І вось пасля такога не самага адназначнага года Хадаркевіч, не дамовіўшыся з «Шахцёрам» аб працягу супрацы, падпісаў кантракт з «Дынама» да канца 2023-га. Ужо ў студзені, на самым пачатку перадсезонкі, гулец актыўна захапляўся Вадзімам Скрыпчанкам, пад кіраўніцтвам якога толькі пачаў працу.
- Наогул, я ад нашага галоўнага трэнера ў захапленні. Узяць, да прыкладу, апошні тэарэтычны занятак – гэта проста ваў! Падача, экспрэсія - вельмі крута. Сядзіш і з адкрытым ротам слухаеш, што ён кажа, - адзначаў Хадаркевіч.
Падчас перадсезонкі Скрыпчанка давяраў абаронцу: у пяці з шасці гульнях выпусціў у аснове. Але калі сезон стартаваў, футбаліст грунтоўна засеў на лаўцы - трэнер давяраў іншым выканаўцам (у цэнтры абароны ў гэтым сезоне гуляюць Паліцевіч, Бягуноў, Сачыўка, Швяцоў), якія дапамагалі на старце ісці без страт у пунктах. У першых чатырох турах Хадаркевіч толькі трапляў у заяўку, але пры гэтым дэклараваў у медыя вялікія планы на сезон: гуляць, дамагацца выніку, выйграваць і станавіцца чэмпіёнамі.
Цікава, што адсутнасць практыкі зноў не збянтэжыла Кандрацьева, які выклікаў абаронцу на сакавіцкія матчы кваліфікацыі ЧЕ са Швейцарыяй і Румыніяй. Хадаркевіч адыграў супраць румынаў у пары з Захарам Волкавым 90 хвілін і зарабіў папярэджанне. Перад матчам абаронца праспяваў дзяржгімн, а праз 15 хвілін здзейсніў неабавязковы фол, пасля якога супернік са штрафнога адкрыў лік.
З 24 красавіка па 27 траўня Хадаркевіч не трапляў у заяўку «Дынама» - пасля трэніровак на сінтэтыцы «Дынама-Юні» зноў узніклі праблемы з каленамі.
Толькі на пачатку чэрвеня Хадаркевіч вярнуўся ў заяўку "бела-блакітных", але, як аказалася, ненадоўга. Абаронца прасядзеў на лаўцы матчы з брэсцкім "Дынама" і "Смаргонню", а праз некалькі дзён пасля паразы ад "мядзведзяў" 1:3 быў адхілены ад трэніровак з асновай.
І што здарылася?
Сітуацыя, у якую патрапіў абаронца, пачала развівацца яшчэ да матча ў Смаргоні. Хадаркевіч пасля чарговага нетраплення ў старт не вытрымаў і ў асабістай гутарцы выказаў з гэтай нагоды прэтэнзіі Скрыпчанцы. Маўляў, хачу гуляць, працую на трэніроўках, выкладваюся, але ўсё роўна застаюся на лаўцы. Па нашай інфармацыі, размова ішла не ў самым спакойным тоне - галоўны трэнер таксама паводзіў сябе эмацыйна.
Нягледзячы на гэта, абаронца застаўся ў абойме, але зноў на лаўцы, адкуль назіраў за паразай ад "Смаргоні". У распранальні трэнер зладзіў разнос калектыву, надта сябе не стрымліваючы. Усё ж каманда адкацілася на другое месца ў табліцы.
А на наступны дзень на агульнакамандным сходзе Хадаркевіч, па словах нашых суразмоўцаў, знаёмых з сітуацыяй, папракнуў Скрыпчанку за празмерную эмацыйнасць у Смаргоні. Маўляў, не варта было так моцна вымаўляць футбалістам. Пры гэтым многія аднаклубнікі не зразумелі выступу Хадаркевіча - па вялікім рахунку, яны былі згодныя з крытыкай трэнера, а таму не сталі падтрымліваць партнёра.
Затое была рэакцыя ад Скрыпчанкі. Той правёў з кіраўніцтвам клуба сустрэчу, дзе было вырашана адхіліць футбаліста ад трэніровак з асноўнай камандай. Цяпер Хадаркевіч не ўдзельнічае ні ў гульнявых практыкаваннях, ні ў занятках у трэнажорнай зале.
Ад аўторка любімчык Кандрацьева працуе з дублем «Дынама». І, паводле нашай інфармацыі, цалкам можа згуляць за рэзервістаў.
Што далей?
Кантракт у абаронцы з «Дынама» заканчваецца 31 снежня 2023 года. Крыніцы не выключаюць, што Хадаркевіч другую частку сезона можа правесці ў арэндзе. Трансфернае акно ў Беларусі адчыняецца 9 ліпеня. Але тут паўстае важнае пытанне: хто падбярэ гульца, які за два гады згуляў і ў клубах, і за зборную ўсяго 13 матчаў і пры гэтым атрымлівае максімальна магчымую ў чэмпіянаце Беларусі зарплату ў памеры 16200 рублёў?
Фота: dinamo-minsk.by, abff.by
