Маск і Цукерберг хочуць пабіцца ў клетцы. Ілан ужо прапанаваў лакацыю, але з'явілася яго мама і ўсё скасавала
Вось да чаго прыводзяць сацыяльныя сеткі.
Марк Цукерберг, генеральны дырэктар кампаніі Meta, і ўласнік кампаніі Twitter Ілан Маск загаварылі пра паядынк ў клетцы. Усё праз новую праграму, якую распрацоўвае кампанія Цукерберга.
Цукерберг рыхтуе адказ Twitter. Гэта не спадабалася Маску, які высмеяў ідэю
Meta анансавала выхад праграмы Threads. Папярэдне публікацыя тэксту ў Threads будзе абмежавана 500 знакамі, а дызайнам і функцыяналам будзе нагадваць Twitter.
У Meta гэта ўжо назвалі «адказам Twitter». Дырэктар па прадуктах Meta Крыс Кокс намякнуў на праблемы Twitter, якія публічна абмяркоўваюцца не першы месяц:
«Мы чулі ад распрацоўшчыкаў і грамадскіх дзеячаў, што яны зацікаўленыя ў платформе, якая будзе працаваць разумна і якой, на іх думку, яны могуць давяраць і на якую можна разлічваць у плане распаўсюджвання».
Менавіта праблемы з апошнім пунктам выклікаюць найбольшую рэакцыю ў карыстальнікаў Twitter. Маск з першых дзён пасля пакупкі кампаніі пазіцыянаваў сябе як змагар з фэйкамі, фэйкавымі акаўнтамі і ботамі.
Затое рэальныя кампаніі атрымалі сур'ёзныя праблемы і рэальныя страты, калі ў сацыяльнай сетцы змянілася сістэма верыфікацыі – сёння сінюю птушачку, якая раней пацвярджала рэальнасць акаўнта, можна купіць за штомесячны плацёж, а атрымаць новую птушачку верыфікацыі (залацістую) стала значна складаней. Акрамя гэтага, дзесяткі робатаў разганяюць расійскія фейкі наконт вайны ва Украіне, пра якую і сам Маск выказваецца вельмі неадназначна.
Ілану ідэя Цукерберга не спадабалася:
«Упэўнены, што Зямля не можа дачакацца моманту, калі апынецца выключна ва ўладзе Цука, не маючы іншых варыянтаў. Прынамсі, гэта будзе «разумна». Я на імгненне занепакоіўся».
Маск заявіў, што гатовы пабіцца з Цукербергам. Той заклікаў даслаць яму месца
Пасля серыі рэакцый у твітэры, Маск адрэагаваў на адну з іх гатоўнасцю сустрэцца з Цукербергам у клетцы:
«Я гатовы да сустрэчы ў клетцы, калі ён гатовы», – напісаў Ілан.
Марк адрэагаваў:
«Прыйшлі мне месца».
Маск адказаў:
«Вегас Актагон».
Цукерберг актыўна займаецца джыу-джытсу, а Маск кажа, што мае фірменны прыём
Марк Цукерберг рэгулярна займаецца бразільскім джыу-джытсу і нават удзельнічаў у турнірах.
А яшчэ трэніруе змешаныя адзінаборствы.
Маск займаўся кіёкушынкай каратэ, але кажа, што цяпер не трэніруецца ўвогуле: «Хіба што бяру дзяцей і падкідаю іх у паветра».
Пры гэтым заяўляе пра свой асаблівы прыём:
«У мяне ёсць выдатны прыём, які я заву «Морж» – калі проста ляжу на суперніку і нічога не раблю».
Аднак хайп на паядынках для Ілана – норма. Увесну 2022-га ён прапаноўваў кіраўніку РФ паядынак:
“Я кідаю выклік Уладзіміру Пуціну. У адзінаборстве. Стаўка – Украіна», – напісаў Маск у Twitter.
Тады нічога не адбылося і наўрад ці адбудзецца гэтым разам. У сацсеткі ўжо прыйшла мама Маска, былая паўднёваафрыканская мадэль, і заявіла, што скасавала двубой.
