Трэцяя хваля дамоўных матчаў у Беларусі (разгром «Шахцёра» і «Энергетыка») пачалася цалкам выпадкова – адзін чалавек перапіў, і на яго выклікалі так званую міліцыю
Вось што было далей.
27 чэрвеня ў лукашэнкаўскім судзе па Маскоўскім раёне Мінска пачаўся разгляд справы экс-спартыўнага дырэктара «Шахцёра» Уладзіміра Нідэргауса. Ён абвінавачваецца ў подкупе ўдзельнікаў і арганізатараў спартовых спаборніцтваў - прасцей кажучы, функцыянер быў адным з тых, хто ладзіў несумленныя матчы "Шахцёра". Ужо на першым паседжанні Нідэргаус, якога яшчэ раней абвясцілі персонай нон грата ў беларускім футболе і аштрафавалі амаль на 15 тысяч долараў па лініі АБФФ, цалкам прызнаў віну. Менеджару пагражае да трох гадоў пазбаўлення волі.
Сёння носьбіты формы актыўна расказваюць пра тое, як яны спрытна раскрылі злачынную сетку. На самой жа справе Нідэргаус цалкам мог знаходзіцца не ў клетцы, а на волі - у Салігорску ці дзе-небудзь у Казахстане. І «Шахцёр» па-ранейшаму быў бы чэмпіёнам і рыхтаваўся да ўдзелу ў еўракубках, і «Энергетык-БДУ» са сваім срэбным медалём займаўся б тым жа самым. Аднак недарэчны інцыдэнт у адным з мінскіх бараў прывёў да драматычных наступстваў.
Як стала вядома "Трыбуне", уся гэтая сённяшняя гісторыя па барацьбе з дамоўнымі матчамі і стымуляваннем, у якую трапілі "Шахцёр", "Энергетык-БДУ" і "Белшына", пачалася з выпадковасці. Калі б не яна, махінацыі яшчэ доўга маглі б заставацца схаванымі, і ўвогуле не факт, што да іх нехта дабраўся б.
У канцы восені 2022 года тэхнічны дырэктар "Энергетыка-БДУ" Арам Абдаль-Маджыд адправіўся ў адзін з мінскіх бараў. Нашыя крыніцы адзначаюць, што для функцыянера гэта было звыклае баўленне часу: ён часцяком наведваў бары і кавярні, каб расслабіцца і выпіць. Звычайна Абдаль-Маджыд не перавышаў сваю норму і, адпаведна, не меў праблем праз ужыванне алкаголю. Аднак у той злашчасны вечар усё пайшло не так. Экс-футбаліст сур'ёзна перабраў і пачаў паводзіць сябе неадэкватна. Супрацоўнікі бара не змаглі самі яго суцішыць і былі вымушаныя выклікаць так званую міліцыю.
Лукашэнкаўскія сілавікі адвезлі Абдаль-Маджыда ў пастарунак. Там яго апыталі, а таксама накіравалі на медыцынскі агляд. Зацікавіліся носьбіты формы і мабільным тэлефонам буяна - дыктатарскі рэжым шукае ў прыладах беларусаў сляды ўдзелу ў пратэстах пасля выбараў-2020. Нічога палітычнага ў мабільніку Абдаль-Маджыда лукашысты не адшукалі, затое знайшлі сёе-тое іншае: у WhatsApp яны ўбачылі інтэнсіўную перапіску са спартыўным дырэктарам «Шахцёра» Уладзімірам Нідэргаўсам. У чаце абмяркоўваліся сумнеўныя футбольныя справы: сумесныя дзеянні ў інтарэсах салігорскага клуба, стымуляванне "студэнтаў" ды іншае.
Абдаль-Маджыда адпусцілі з пастарунка, але тэлефон не аддалі. Апарат быў накіраваны ў Следчы камітэт Лукашэнкі, дзе і пачаліся разбіральніцтвы, з якіх узнялася трэцяя хваля «дагаворнякоў».
Некалькі лішніх келікаў мелі маштабныя наступствы для беларускага футбола. Сам Абдаль-Маджыд адхілены на тры гады ад футбольных спраў і аштрафаваны на 14800 рублёў. Яго клуб пазбавіўся срэбных медалёў сезона-2022, а таксама 23 пунктаў у гэтым сезоне, што пагражае вылетам з вышэйшай лігі, і 10 у наступным, а яшчэ павінен заплаціць 74 тысячы рублёў штрафу.
