Пераможца «Арсенала» з «чорнага спісу» ўсё ж сышоў з БАТЭ, дзе сядзеў без грошай – меў варыянт у Польшчы, але выбраў цікавасць Ганчарэнкi
Ужо гатовы вярнуцца на поле.
5 чэрвеня БАТЭ страціў чарговага старажыла. Пасля доўгіх гадоў у Барысаве каманду пакінуў брамнік Дзяніс Шчарбіцкі, які ў канцы мінулага года патрапіў у «чорны спіс» «мінспорту» Лукашэнкі. Брамнік на сваёй старонцы ў Instagram ужо развітаўся з клубам. Паводле нашай інфармацыі, Шчарбіцкі падпісаў гадавы кантракт з «Уралам», дзе працуе экс-трэнер БАТЭ Віктар Ганчарэнка.
«Трыбуна» даведалася больш дэталяў пераходу 27-гадовага брамніка.
У БАТЭ моцна губляў у заробку, а потым застаўся ўвогуле без дапамогі
У БАТЭ Шчарбіцкі патрапіў яшчэ ў пачатку 2010-х, з 2014-га выступаў за дубль, у 2016-м дэбютаваў за асноўны склад. У Барысаве дасягнуў сапраўды вялікіх поспехаў: станавіўся трохразовым чэмпіёнам Беларусі, браў Кубак і Суперкубак краіны, двойчы ўключаўся ў спіс 22 найлепшых футбалістаў Беларусі (2017 і 2018 гады), а ў 2017-м атрымаў званне найлепшага варатара ЧБ. За 118 матчаў за асноўны склад БАТЭ кiпер прапусціў 108 мячоў, 58 сустрэч згуляў «на нуль». Амаль 30 гульняў Шчарбіцкі правёў у еўракубках, у тым ліку ў групавым этапе ЛЧ і плэй-оф ЛЕ з той самай перамогай над лонданскім «Арсеналам».
У свой час Дзянісам цікавіліся расійскія «Крылы Саветаў» і «Зеніт», малдоўскі «Шэрыф» і нават італьянскі «Мілан», але Шчарбіцкі заставаўся ў БАТЭ. Многія змены сарваліся з-за таго, што ў апошнія гады Шчарбіцкі больш лячыўся, чым гуляў. Спакою не давалі праблемы з плячом, з-за чаго прыйшлося перанесці некалькі аперацый і фактычна паставіць кар'еру на паўзу.
Апошні раз Шчарбіцкі гуляў ажно 21 жніўня 2022 года – дапамог БАТЭ адолець «Дняпро» (2:1) у 18-м туры «вышкі». Пасля гэтага – зноў прастой, звязаны з лячэннем. А потым – унясенне ў «чорны спіс», з-за чаго ў сакавіку па загадзе Сяргея Кавальчука БАТЭ скасаваў кантракт з Дзянісам і іншымі «спісачнымі» футбалістамі.
Тым не менш Шчарбіцкі працягваў трэніравацца з клубам. Працу на полі ён чаргаваў з заняткамі ў рэабілітацыйным цэнтры і ў трэнажорнай зале. Па нашай інфармацыі, сам Дзяніс падчас цяперашняга сезона, не маючы нават тэарэтычнай магчымасці гуляць у ЧБ, вырашыў на 100 працэнтаў закрыць пытанні з плячом. Як удалося даведацца, Дзяніс поўнасцю аднавіўся ў пачатку гэтага лета.
Ускладняла сітуацыю тое, што з сакавіка, апынуўшыся ў статусе беспрацоўнага, футбаліст жыў на зберажэнні. Як нам расказалі крыніцы, знаёмыя з сітуацыяй, ад БАТЭ не было зусім ніякай дапамогі, нягледзячы на былыя заслугі варатара. Разлічваць Дзяніс мог выключна на сябе. Узніклі некаторыя бытавыя пытанні, але Шчарбіцкі не дазваляў ім уплываць на свае трэніроўкі – усё роўна працаваў на ўсю моц.
Пры гэтым кантрактныя ўмовы ў апошнія гады ў БАТЭ ў Дзяніса ўціскаліся. Як удалося даведацца, да 2022 года зарплата гульца складала каля сямі тысяч долараў у месяц. А перад сезонам-2022 клуб заявіў, што футбаліст не гуляе, а больш лечыцца, але пакідаць зусім без грошай яго не будуць – і прапанавалі новую дамову з заробкам у некалькі разоў менш, на ўзроўні 4 тысяч рублёў у месяц. Шчарбіцкі пагадзіўся і заключыў такое пагадненне на два гады, але з-за «чорнага спісу» яно аказалася скасаванае раней.
Не выбраў польскі варыянт, кантракт залежыць ад вынікаў
Некалькі месяцаў Шчарбіцкі толькі трэніраваўся і безвынікова чакаў рашэння рэжымнай «камісіі». Пры гэтым у маі Шчарбіцкі прыняў удзел у прадстаўленні новай формы БАТЭ. У тым жа месяцы профілі Дзяніса і іншых спісачных гульцоў зніклі з сайта клуба, але потым зноў з'явіліся. Зрэшты, як нас запэўнілі, гэта не было звязана з наяўнасцю прозвішчаў гульцоў у пераліку «мінспорту», а тлумачыцца тэхнічнымі момантамі.
22 чэрвеня кіраўнік БАТЭ Андрэй Капскі заявіў, што клуб чакае вяртання ўсіх гульцоў з «чорнага спісу», і яны «настроены дапамагаць БАТЭ ў еўракубках, радаваць балельшчыкаў, вяртаць веру ў наш футбол». А ўжо праз тыдзень з'явілася інфармацыя, што Шчарбіцкі знаходзіцца ў размяшчэнні «Урала».
Па нашай інфармацыі, цікавасць да брамніка яшчэ два тыдні таму праяўляў не толькі «Урал», але і адзін з клубаў чэмпіянату Польшчы. Аднак кіпер зрабіў выбар на карысць каманды з Екацярынбурга. У многім гэта абумоўлена асабістай цікавасцю Віктара Ганчарэнкі і яго памочніка Аляксандра Ермаковіча, пры якім у ролі галоўнага трэнера БАТЭ Шчарбіцкі пачынаў гуляць у аснове барысаўчан. «Урал», як аказалася, сачыў за сітуацыяй з варатаром, а калі стала зразумела, што рэжымная «камісія» максімальна зацягвае з рашэннем, екацярынбуржцы зрабілі крок да заключэння кантракта з гульцом.
Немалаважную ролю ў пераходзе футбаліста, паводле нашых звестак, адыграў і цяперашні трэнер варатароў мінскага «Дынама» Андрэй Дрозд. Калісьці пад яго пачаткам стартавала прафесійная кар'ера Шчарбіцкага, пазней яны разам працавалі ў аснове БАТЭ. У Дразда наладжаныя добрыя адносіны з калегам з «Урала» Андрэем Шпілёвым – і беларускі трэнер даў Шчарбіцкаму станоўчую характарыстыку як у гульнявым, так і ў чалавечым планах. Пасля гэтага трэнерскі штаб «Урала» прыняў канчатковае рашэнне запрасіць да сябе Дзяніса. А на праглядзе кiпер паказаў сябе найлепшым чынам.
Дзянісу прапанавалі кантракт на год. Па нашых даных, яго сума не самая вялікая нават па беларускіх мерках, аднак пагадненне прапісанае так, што пры добрай гульні і дасягненні пэўных вынікаў заробак будзе падвышацца. Па сутнасці, дамова дае Шчарбіцкаму стымул працаваць і адваёўваць сваё месца ў рамцы. Цяпер асноўным варатаром «Урала» з'яўляецца 26-гадовы Ілля Памазун. За екацярынбуржцаў галкіпер выступае з 2020 года – належыць ЦСКА, які пастаянна падаўжае арэнду. Памазун ужо згуляў за «Урал» у 81 паядынку (100 прапушчаных мячоў, 21 «сухар»).
Ні Віктара Ганчарэнку, ні яго памочнікаў не збянтэжыў доўгі гульнявы прастой Шчарбіцкага. Паводле нашай інфармацыі, трэнерскі штаб мае намер даць час галкіперу паўнацэнна ўліцца ў калектыў, паступова падводзіць футбаліста да матчаў, і калі той будзе на 100 працэнтаў гатовы гуляць, дасць шанс на полi.
Ну а БАТЭ зноў не змог папоўніць і без таго дзіравы бюджэт за кошт аднаго са сваіх актываў. Па даных Transfermarkt, рынкавы кошт Дзяніса складае 200 тысяч еўра, аднак, як і іншы галкіпер Антон Чычкан, Шчарбіцкі пакінуў БАТЭ бясплатна.
Фота: fcbate.by
