Калі маркетынг важнейшы за спорт. Быць цікавым Гран Пры Нідэрландаў не быў абавязаны ад пачатку
Этап Формулы-1 у Нідэрландах ад самага пачатку планаваўся найперш не як спартыўнае мерапрыемства, а як сродак заробку грошай. Што, канечне, зусім не абясцэньвае перамогу Макса Ферстапена на хатнім Гран Пры.
Фота: formula1.com
Этап Формулы-1 у Нідэрландах ад самага пачатку планаваўся найперш не як спартыўнае мерапрыемства, а як сродак заробку грошай. Што, канечне, зусім не абясцэньвае перамогу Макса Ферстапена на хатнім Гран Пры.
Траса Зандварт – падарунак для тэлевізіёншчыкаў! Олдскульная, звілістая, з прафіляванымі паваротамі і блізкімі адбойнікамі. Прыгажосць! Аднак яна вузкая, і таму калі машынам той жа серыі GT World Challenge Europe і іншых кузаўных яна яшчэ больш ці менш пасуе, то сучасным хуткім і даволі буйнагабарытным балідам Формулы-1 на ёй цесна. Таму ўсім аматарам каралеўскіх аўтагонак адразу было зразумела, што чакаць на ёй барацьбы кола ў кола і вялікай колькасці абгонаў не варта.
Разумелі гэта і арганізатары і прамоўтэры Гран Пры Нідэрландаў. Аднак у іх быў (і ёсць) неаспрэчны козыр – Макс Ферстапен. Нават калі Формула-1 вярнулася б у Зандварт у мінулым годзе (як першапачаткова і планавалася, для чаго аўтадром быў сур’ёзна абноўлены і чаму перашкодзіла пандэмія), калі, нагадаю, Льюіс Хэмілтан і Mercedes былі проста непераможныя, этап не проста акупіўся б, а прынёс бы звышпрыбытак. Высокая цікавасць нідэрландскіх заўзятараў да гонкі з удзелам мясцовага пілота была гарантаваная ў любым выпадку.
У чым, дарэчы, мы пераканаліся ў мінулы ўік-энд, калі на трыбунах быў аншлаг. І гэта пры тым, што на іх былі дапушчаныя толькі дзве траціны ад тых, хто набыў квіткі – пандэмія працягваецца і працягвае ўносіць свае карэктывы ў планы правядзення спартыўных спаборніцтваў. Толькі што, паўтаруся, Гран Пры Нідэрландаў быў такім толькі фармальна. На самой жа справе маркетынг у ім дамінаваў.
Тым больш што гэтым годзе, калі Red Bull атрымаў ад Хонды канкурэнтаздольную сілавую ўстаноўку, дзякуючы чаму яго баліды падняліся на адзін узровень з машынамі Mercedes, а Макс Ферстапен пачаў змагацца за чэмпіёнства на роўных з Хэмілтанам, арганізатары Гран Пры Нідэрландаў атрымалі двайны падарунак. Наўрад ці памылюся, зрэшты, калі зраблю здагадку, што і ў Рэд Буле доўга і дасканала рыхтаваліся да яго.
Хутчэй за ўсе, падчас працы на сімулятары былі адпрацаваныя ўсе магчымыя сцэнарыі развіцця падзей на хатнім для Макса этапе. Разумеючы, што поўл у Зандварце будзе вельмі важным, каманда і пілот максімальна выклаліся ў суботу. У выніку менавіта за Ферстапенам і засталася першая стартавая пазіцыя і новы афіцыйны рэкорд трасы – 1:08,885. Час, дарэчы, мог бы быць і лепей, думаю, на палову секунды, але ў фінальнай спробе нідэрландзец застаўся без DRS – выйшаў з ладу прывад, які адкрывае задняе антыкрыло. Перад гонкай вузел быў заменены, і гэта стала адзіным для Макса расчараваннем уік-энду.
Так, можна яшчэ ўспомніць, што ў гонцы лепшы круг усталяваў, зарабіўшы бонуснае ачко, усё ж не ён, а Хэмілтан – яго галоўны канкурэнт у чэмпіянаце. Аднак перамога дома ўсё роўна вярнула Ферстапена на першую пазіцыю ў асабістым заліку, таму галоўная для яго задача пакуль што выглядае выкананай. А вось для Red Bull у цэлым – не. Таму што Серхіа Перэс, з якім каманда яшчэ перад непаразуменнем пад назвай Гран Пры Бельгіі працягнула кантракт на наступны год, у Зандварце кваліфікацыю праваліў, не прайшоўшы нават у другі яе сегмент.
Кваліфікаваўся Перэс шаснаццатым, а стартаваў увогуле з піт-лэйну – у камандзе вырашылі парушыць рэжым закрытага парку і замяніць на яго балідзе сілавую ўстаноўку. Што раней ці пазней усё роўна прыйшлося б рабіць са штрафам, бо пасля аварый Ферстапена на Сільверстоўне і самога Серхіа на Хунгарорынгу (прывітанне Хэмілтану і Валтары Ботасу адпаведна!) у Red Bull атрымаўся дэфіцыт новых вузлоў.
Чэка, канечне, рэабілітаваўся ў нядзелю, стаўшы аўтарам шматлікіх абгонаў. Прычым некалькіх супернікаў мексіканец эфектна і эфектыўна абыходзіў па вонкавым радыусе першага павароту. Фінішаваў ён у выніку восьмым і ачкі набраў, але не столькі, колькі мог бы, і Red Bull у Кубку Канструктараў Mercedes не апярэдзіў. Хаця званне «Гоншчыка дня» па выніках балельшчыцкага галасавання ў Інтэрнэце Серхіа атрымаў цалкам заслужана.
Перэс жа даказаў (не толькі ён, зрэшты), што абганяць у Зандварце ўсё ж такі можна. Толькі ў спрэчцы за перамогу паміж Ферстапенам і Хэмілтанам абышлося без іх. Макс і Red Bull, дарэчы, такімі ўжо дамінатарамі нідэрландскага Гран Пры не выглядалі – Хэмілтан у гонцы калі і саступаў, то зусім крыху. Лепшы круг, ізноў жа, застаўся за ім. Але яго барацьба з любімцам мясцовых трыбун выйшла тактычнай.
Стартавалі абодва на шынах Soft (у Нідэрланды кампанія Pirelli прывезла самыя жорсткія кампаўнды C1, C2 і C3), Ферстапен хутка адарваўся ад Хэмілтана з Ботасам (фін стартаваў трэцім), а на дваццатым кругу – праз круг пасля Льюіса – наведаў боксы, атрымаўшы, як і брытанец, свежы Medium. Замінка з заменай правага пярэдняга кола, што адбылася на піт-стопе Хэмілтана, вялікай ролі не адыграла – Макс усё роўна быў хутчэй. І Ботаса, які затрымаўся на трасе і мусіў быў яго прытармазіць, каб дапамагчы напарніку да яго наблізіцца, пілот Red Bull на трыццаць першым кругу абагнаў так лёгка, што нагадаў стары анекдот пра Чапаева і карацістаў: «Куды ім, Пецька, з голымі пяткамі ды супраць шашцы?».
Хэмілтану Валтары, зразумела, не замінаў, і тут жа прапусціў і яго. Не меў намеру ўскладніць брытанцу жыццё Ботас і пазней, калі на апошніх кругах па невядомай прычыне яго заклікалі ў боксы і ўсталявалі на яго балід прыкачаны «софт». Магчыма, ў Мерсэдэсе адчулі пагрозу з боку Перэса, які свой фінальны адрэзак праводзіў на гуме таго ж тыпу, і тэарэтычна мог адабраць лепшы круг у Льюіса (сяміразовы і дзейсны чэмпіён да таго моманту ён ужо належыў).
Але ў выніку калектыў Тота Вольфа ледзь не перахітрыў самога сябе – хоць Ботасу і забаранілі перапісваць гэтае дасягненне на сваё імя, фінскі пілот паспеў гэта зрабіць, нават запаволіўшыся на фінальным сектары трасы! Таму каб абараніць пазіцыі Хэмілтана ў чэмпіянаце, на перадапошнім кругу боксы наведаў і ён, таксама атрымаў камплект мяккіх шын і апошні круг усё ж такі праехаў хутчэй за ўсіх у гонцы.
Другое месца Льюіс пры гэтым захаваў, а Валтары фінішаваў трэцім. Толькі гэта яго ўжо не ратавала, бо рашэнне наконт яго будучыні было прынятае даўно. І сёння, акурат перад тым, як я сеў за гэты артыкул, было афіцыйна абвешчана, што ў наступным годзе ён будзе пілотам Alfa Romeo.
Хто будзе яго напарнікам, пакуль невядома, але дакладна не Кімі Райканен. Чэмпіён 2007 году ў сваю чаргу напярэдадні Гран Пры Нідэрландаў аб’явіў аб завяршэнні сваёй кар’еры ў Формуле-1 па сканчэнні гэтага сезону. Таксама, дарэчы, адзначыўшы, што ўсё вырашыў яшчэ зімой. Нажаль, праз станоўчы тэст на каронавірус прапусціць яму прыйшлося і гонку ў Зандварце. Замяніў яго Роберт Кубіца, які выступіў не так і дрэнна, заняўшы пятнаццатае месца.
Затое сакрэтам Палішынэля цяпер ёсць імя будучага напарніка Хэмілтана! Наўрад ці яно радуе самога Льюіса, бо імя гэта – Джордж Расэл. Малады, таленавіты, хуткі і амбіцыйны, ён дакладна зробіць жыццё свайму тытулаванаму суайчынніку значна больш складаным. І сезон-2022 робіцца цікавым ужо зараз.
У Нідэрландах Джордж, дарэчы, выступіў не так удала, як многія ад яго чакалі. У фінал кваліфікацыі ён на гэты раз не прайшоў, хоць і паказаў адзінаццаты вынік. Прытым што па ходу другога сегменту ледзь не разбіў свой балід, зляцеўшы з трасы ў трынаццатым павароце. Аб бар’ер бяспекі ён усё ж такі стукнуўся, але не моцна, і нават здолеў вярнуцца на трасу і даехаць да боксаў для рамонту. Дырэкцыя гонкі на ўсялякі выпадак (паправіць трэба было і адбойнік) прыпыніла кваліфікацыю чырвонымі сцягамі, а хутка пасля яе аднаўлення зрабіла гэта зноў – ужо ў восьмым павароце і ўжо фатальна свой балід разбіў напарнік Расэла па Williams Нікаля Лаціфі.
Але канадзец хаця б у гонцы фінішаваў, хай і шаснаццатым. Тады як Расэл, які яшчэ і штрафныя пяць секунд за перавышэнне хуткасці на піт-лэйне атрымаў, пад бліжэй да фінішу сышоў з дыстанцыі праз праблемы са скрыняй перадач (магчыма, пашкоджанай у суботнім інцыдэнце). Аднак, улічваючы, што Джордж ведае, за якую каманду будзе выступаць у наступным годзе (пра што сам заяўляў), наўрад ці ён моцна расстроіўся.
Лепшую ролю другога плану ў Зандварце выканаў пілот AlphaTauri П’ер Гаслі, які і кваліфікаваўся, і фінішаваў чацвёртым. У гоншчыкаў McLaren гэта не атрымалася: хуткасці не было ні ў Ланда Норыса, ні ў Даніэля Рыкарда, ні ў суботу, ні ў нядзелю. У выніку адзінае ачко за дзясятае месца атрымаў толькі брытанец, тады як аўстраліец фінішаваў адзінаццатым. Прытым што стартавалі яны дзясятым і трынаццатым адпаведна.
Так што McLaren пасля Гран Пры Нідэрландаў ізноў саступіў Ferrari трэцюю пазіцыю ў Кубку канструктараў і зараз мае 170 ачкоў супраць 181,5. Пілоты Скудэрыі ўчора выступілі значна лепей – Шарль Леклер заняў пятае месца, Карлас Сайнс фінішаваў сёмым. Mercedes, які працягвае лідзіраваць, мае 344,5 ачка, яго перавагу над Red Bull павялічылася да дванаццаці балаў.
Вось у асабістым заліку, як я адзначыў вышэй, Ферстапен лідарства сабе вярнуў – у яго 224,5 ачка, на тры болей чым у Хэмілтана, які апусціўся на другую пазіцыю. Ботас у сваю чаргу падняўся на трэцюю, апярэдзіўшы Норыса, і мае цяпер 123 ачкі. Хоць гэта зробіць крыху саладзейшым яго горкі яблык.
Ну а Формула-1 свой сезон працягне ўжо на гэтым тыдні ў легендарнай Монцы. У мінулым годзе там сенсацыйна перамог згаданы вышэй Гаслі, шмат чаго можна чакаць і гэтым разам. І таму ў тым ліку, што гэта будзе другі пасля брытанскага ўік-энд са спрынтам.