Ці саладзейшы хрэн за рэдзьку? Разбіраемся на прыкладзе Гран Пры Штырыі і перамогі на ім Макса Ферстапена

Фота: formula1.com, drive-igora.ru

За што бароліся, на тое і напароліся: было ў Формуле-1 дамінаванне Mercedes, стала дамінаванне Red Bull. Ці інтрыгу хаваць зарана, і дзейсныя чэмпіёны яшчэ скажуць сваё слова?

Варта было Хондзе перад новым сезонам пабудаваць удалую сілавую ўстаноўку, як стала ясна, што толькі яе камандзе Red Bull і не хапала. Шасі RB16 і так было адным з лепшых з гледзішча аэрадынамікі і прыціскальнай сілы, а ў версіі B яго даўзброілі маторам адпаведнага ўзроўню.

І вось ужо хуткія і непераможныя Mercedes і яго пілот Льюіс Хэмілтан, які ў мінулым годзе зраўняўся з Міхаэлем Шумахерам па колькасці чэмпіёнскіх тытулаў, апынуліся ў ролі тых, якія даганяюць. Яны цяпер самі прызнаюць, што Red Bull хутчэйшы на прамых.

Пры гэтым нікуды не дзелася і хуткасць балідаў аўстрыйскай каманды ў паваротах. Мы ж памятаем, што на Гран Пры Азербайджана Хэмілтан наракаў на тое, што як раз толькі на прамой яшчэ і можа ўгнацца за Серхіа Перэсам, а на звілістых сектарах той ад яго проста з’язджае.

У выніку толькі аварыя Макса Ферстапена праз праблемы з задняй левай шынай у Баку і далі магчымасць Льюісу і яго камандзе вярнуцца на пазіцыі лідараў ў заліку пілотаў і Кубку канструктараў. Якой яны, зрэшты, не скарысталіся. Паспрабавалі былі контратакаваць у Францыі, але там ужо былі пабітыя зброяй, якой самі раней удала скарысталіся на Гран Пры Партугаліі і Іспаніі – шыннай стратэгіяй.

Ну а на аўстрыйскай трасе Red Bull Ring, як вынікае з яе назвы, хатняй для Чырвоных Быкоў, узяць іх за рогі тым больш прадстаўлялася складанай задачай. Прамых тут багата, амаль усе павароты хуткія – проста ідэальнае месца для выставы дасягненняў каманды і яе пастаўшчыка сілавых установак.

Нейкую надзею на цікавы і непрадказальны Гран Пры даваў толькі прагноз надвор’я напачатку мінулага тыдня, які абяцаў на мінулыя выхадныя дажджы ў Шпільбергу. Але ён у выніку не спраўдзіўся – усе сесіі этапу былі сухімі.

Амаль ва ўсіх першынстваваў Ферстапен, толькі ў суботу раніцай саступіўшы Хэмілтану. Аднак затым без асабістых цяжкасцей заваяваў поўл, а ў нядзелю спакойна кантраляваў гонку ад старту да фінішу і перамог у ёй. Хэмілтану, які заняў другое месца, толькі і засталося, што адказаць на гэта найхутчэйшым кругам на саставе шын Soft, што ён атрымаў на перадапошнім кругу. Так што бонусны бал за гэта атрымаў менавіта брытанец.

Ці значыць усё гэта, што цяпер Формулу-1 далей можна не глядзець праз дамінаванне ўжо Ферстапена і Red Bull? Натуральна, не. На Гран Пры Штырыі гэтакай трэцяй сілай стаў… Валтары Ботас! Хмары над ім згушчаюцца, плётак на тэму яго замены ў наступным сезоне ў складзе Мерсэдэса маладым пілотам Williams Джорджам Расэлам усё болей.

Дарэчы, брытанец на Гран Пры Штырыі толькі дадаў гэтым плёткам паліва сваім удалым выступам. Ён і кваліфікаваўся выдатна, ледзь не прайшоўшы ў фінальны сегмент, але ўсё роўна патрапіў у першую дзясятку стартавай рашотцы пасля пакарання пілота AlphaTauri Юкі Цуноды, які заблакаваў Ботаса ў другой частцы і страціў за гэта тры пазіцыі.

І ў гонцы ў гэтай першай дзясятцы Джордж трымаўся доўгі час, прэтэндуючы на першыя для сябе і каманды ачкі ў сезоне. Толькі праблема з пнеўматыкай рухавіка, праз якую ён сышоў з дыстанцыі на трыццаць пятым кругу, не дазволіла яму паказаць той вынік, на які ён здатны.

Затое Ботас бліснуў у складаных умовах. Складаных не толькі праз свае пакуль што няясныя перспектывы ў чэмпіянаце свету (у Mercedes быццам бы абяцаюць даць яму адказ па пытанні кантракту да канца гэтага тыдня). Яшчэ ў пятніцу пасля другой трэніроўкі суддзі яго самога пазбавілі трох пазіцый на стартавай рашотцы за інцыдэнт на піт-лэйне.

Эксперыментуючы з крананнем з месца пасля піт-стопу, механікі змянілі яму налады і папрасілі кранацца з другой перадачы. У выніку Валтары занесла і развярнула перад боксамі McLaren. І хоць абышлося без аварыі і траўм механікаў на піт-лэйне, суддзі палічылі інцыдэнт патэнцыйна небяспечным і выпісалі фіну штраф.

Пры гэтым першы стартавы шэраг па выніках кваліфікацыі раздзяліў з Ферстапенам менавіта Ботас! Ды і ў гонцы Валтары быў хуткім. За Максам і Льюісам не ўгнаўся, але і другога прадстаўніка Red Bull Серхіа Перэса да сябе на адлегласць атакі не падпусціў, хоць той і спрабаваў.

У адрозненні ад Ботаса, Хэмілтана і Ферстапена, у фінал кваліфікацыі Чэка прайшоў на «софце», на якім, па правілах, і стартаваў. Аднак дагнаць да першага піт-стопу Валтары ў яго не атрымалася – шыны хутка страцілі эфектыўнасць.

Значна хутчэй мексіканец паехаў на «хардзе», але на піт-стопе выйшла замінка, на якой было згублена некалькі секунд. Ну а пасля другога піт-стопу і ўжо на «медыюме» Серхіа змог ушчыльную пад’ехаць да Ботаса (на фінішы іх раздзяліла ўсяго палова секунды), але абагнаць яго не паспеў, заняўшы чацвёртае месца. Чым, магчыма, дапамог Валтары, схіліўшы чашу шаляў Mercedes у яго бок.

Былі на Гран Пры Штырыі і іншыя станоўчыя моманты. Напрыклад, яшчэ адзін фініш на высокай – пятай – пазіцыі пілота McLaren Ланда Норыса. Пры гэтым, праўда, у яго напарніка Даніэля Рыкарда цяжкасці адаптацыі працягваюцца – ён учора фінішаваў толькі трынаццатым, сутыкнуўшыся па ходу гонкі са стратай магутнасці.

Значна лепей чым у Ле Кастэле выступілі ў Шпільбергу абодва пілоты Ferrari. Карлас Сайнс заняў шостае месца, а Шарль Леклер, не гледзячы на тое, што на першым кругу ў другім павароце патрапіў у замес і пашкодзіў пярэдняе антыкрыло, пасля замены якога адкаціўся на апошнюю пазіцыю, фінішаваў сёмым.

Боксы манэгаск, дарэчы, наведаў двойчы, скарыстаўшы ўсе даступныя тыпы гумы (гэта зноў была сярэдняя тройка C2, C3 і C4). Шкада толькі, што ў выніку таго інцыдэнту з удзелам Шарля са зламанай падвескай сышоў з дыстанцыі пілот AlphaTauri, затое яго напарнік Цунода здолеў замкнуць першую дзясятку.

Вось у чэмпіянаце сітуацыя не такая натхняльная. Замест рэдзькі – дамінавання Хэмілтана і Мерсэдэса – мы атрымалі хрэн (добра, што не ў вочы) – дамінаванне Ферстапена і Red Bull. Пытанне, што саладзейшае, рытарычнае.

З іншага боку, успомніце сітуацыю пасля васьмі этапаў у мінулым годзе, калі перавага Льюіса і яго каманды вымяралася дзясяткамі ачкоў. Зараз жа Максу, які, маючы 156 ачкоў, лідзіруе цяпер, ён саступае васямнаццаць балаў. Перэс, які застаўся на трэцяй пазіцыі, пры гэтым далёка – у яго 96 ачкоў.

Праўда, адлегласць паміж імі пасля першай гонкі ў Шпільбергу ўсё роўна вырасла, як і паміж Red Bull і Mercedes у Кубку канструктараў, дзе яны маюць 252 і 212 ачкоў адпаведна. Каманда McLaren, у якой 120 ачкоў, па-ранейшаму замыкае першую тройку.

Але крыж на Гран Пры Аўстрыі, які на той жа трасе Red Bull Ring адбудзецца ўжо ў бліжэйшы ўік-энд, я б усё роўна загадзя не стаў. Тое ж надвор’е яшчэ можа дыяметральна змяніцца (яго прагнозы – справа няўдзячная). Дый наперадзе акрамя яго яшчэ чатырнаццаць этапаў, і ў Сільверстоўне і асабліва на Хунгарарынгу, дзе пачне дзейнічаць абмежаванне хуткасці піт-стопаў (спроба арганізатараў запаволіць і хуткі па гэтым паказчыку Red Bull), перавага яшчэ можа перайсці да мерсэдэсаўцаў (а на Гран Пры Вялікабрытаніі, як мы памятаем, адбудзецца яшчэ і кваліфікацыйная гонка).

У спісе гэтых этапаў, дарэчы, зноў ёсць раней адменены турэцкі. Цяпер ён замяніў сабой сінгапурскі і мусіць прайсці 1-3 кастрычніка. Праўда, страты ў календары ўсё роўна магчымыя. Напрыклад, Гран Пры Японіі, які мусіць прайсці праз тыдзень пасля Турцыі, яшчэ можа пайсці пад нож. Як на мінулым тыдні гэта адбылося з японскім этапам MotoGP, які таксама ў першыя дні кастрычніка меўся прайсці на трасе Twin Ring Motegi.

Зрэшты, наколькі можна зразумець з афіцыйных заяў FIM і кампаніі Dorna (арганізатарам чэмпіянату MotoGP), прычыны тут збольшага не пандэмійныя, а арганізацыйныя. Таму, спадзяемся, доўгачаканую гонку Формулы-1 на трасе Сузука мы ў гэтым годзе пабачым.

А вось Гран Пры Расіі з 2023 года будзе прымаць не Сочы, а траса «Игора Драйв» пад Санкт-Пецярбургам. Гэта было афіцыйна пацвердзіў ў мінулую суботу выканаўчы дырэктар FOM Стэфана Даменікалі.

Тут мы выражаем спадзеў не толькі на тое, што гонкі будуць больш цікавымі, але і што гледачоў на іх будзе шмат. Таму што, напрыклад, тэмпы вакцынацыі і зніжэння захворваннем на каронавірус у Еўропе ўжо падштурхнулі арганізатараў надыходзячага Гран Пры Вялікабрытаніі дапусціць на трыбуны Сільверстоўна максімальную колькасць балельшчыкаў – да 140 тысяч!

Зычым поспеху і здароўя ўсім!

Этот пост опубликован в блоге на Tribuna.com. Присоединяйтесь к крупнейшему сообществу спортивных болельщиков!
Другие посты блога
Гоначная псіхапатыя
+18
Написать комментарий
Реклама 18+