Браманс Аліева і Мілеўскага: знаёмыя з 15, разам разрывалі за «Дынама», начныя клубы Кіева і ютуб
А пасварыліся, як беларус выйшаў з комы.
Сяброўскія адносіны Аляксандра Аліева і Арцёма Мілеўскага праходзяць выпрабаванне крызісам. «Кенты», былыя футбалісты публічна пасварыліся і зрабілі шмат гучных заяў.
Вельмі коратка пра асноўнае. Аліеў адкрыта распавёў пра стан здароўя сябра і наступствы праблем з алкаголем. Праз некаторы час Мілеўскі прайшоў рэабілітацыю і цяпер спрабуе вярнуцца да жыцця. Учынак Аляксандра ён назваў «вельмі дурным». У адказ Аліеў не стаў маўчаць: «Пасля тых слоў, якія сказаў Мілеўскі, для мяне ён больш не існуе».
Гучыць, нібы «салодкая парачка» прайшла свой пункт незвароту, і што гэта канец, магчыма, самаму моцнаму і доўгаму брамансу ва ўкраінскім футболе. Але ж мы ведаем, як сябруюць мужчыны. Сёння могуць паслаць адзін аднаго, а потым сказаць «Прывітанне, засранец», выпіць па піву (хаця Мілеўскаму гэта не рэкамендуецца) і зноў стаць найлепшымі сябрамі.
Успамінаем гісторыю дружбы Мілі і Кента.
Пазнаёміліся ў Акадэміі «Дынама» – сябруюць з 15 гадоў
У 2000 годзе ў Кіеве сабралі таленавітых тынэйджараў з тэрыторыі былога СССР. Футбольная акадэмія «Дынама-1985» пад кіраўніцтвам Паўла Якавенкі мела амбітныя планы, топавыя на той час умовы і змагла перацягнуць да сябе беларуса Мілеўскага з Мiнска і расiянiна Аліева з Масквы.
«Пасябравалі ў Акадэміі. Сышліся не адразу. У 16 ужо сталі вельмі цесна камунікаваць. Потым нас забралі ў «Дынама», дзе мы пачалі разам жыць. На зборах і матчах мы заўсёды былі разам», – распавёў Аліеў у інтэрв'ю Дзмітрыю Гардону ў 2021 годзе.
З 25 акадэмікаў Якавенкі менавіта ў Аліева і Мілеўскага атрымалася найбольш паспяховая i зорная карʼера. Хоць і ў іх не адразу атрымалася замацавацца ў першым складзе «Дынама». Арцём пачаў ззяць пасля знакавага для сябе пенальці паненкай у браму Швейцарыі на ЧС-2006. Аляксандр перажыў свой пік пры Cёмiне ў Кіеве.
Мілеўскі выступаў за «Дынама» да 2012 года – усё абарвалася пасля канфлікту з тагачасным трэнерам Алегам Блахіным, які адправіў гульца ў дубль. За свой перыяд у Кіеве Арцём тройчы стаў чэмпіёнам і чатыры разы ўладальнікам Кубка Украіны.
Аліеў у 2010 годзе сышоў у «Лакаматыў» за Сёміным. Запомніўся ўсім выдатным выкананнем штрафных. З кіяўлянамі двойчы выйграў чэмпіянат Украіны і адзін раз адсвяткаваў перамогу ў Кубку.
Форвард і паўабаронца гулялі разам у «Дынама» і ў зборнай Украіны, а пасля гэтага іх шляхi на поле не перасякаліся. Але на пытанне, хто найлепшы партнёр па камандзе, Аліеў не сумняваючыся ў адным інтэрвʼю назваў першым Мілеўскага.
Мілеўскі пазнаёміў сябра з жонкай – у пары двое дзяцей і скандальны развод
«Мы пілі, але гулялі, а цяпер не п'юць і не гуляюць», – ужо легендарная цытата Аліева з нядаўняга інтэрвʼю, якую можна лічыць квінтэсенцыяй цэлай эпохі. Два кента сталі ўвасабленнем часоў шалёных грошай, элітных аўто і начных гулянак.
Цяпер футбалісты трапляюць у скандалы праз лаянкі ў сацсетках, а тады быў проста футбольны трэш-метал: халат Мілеўскага на прэзентацыі Блахіна, скандал Аліева з журналісткай ICTV Ахавай. Пра абодвух можна збіраць асобныя посты з топ-скандаламi.
Сёння Аліеў адкрыта распавядае пра велізарныя штрафы ў «Дынама» і кадаванне ад алкаголю. Тлумачыць адкрытасць тым, што хоча паказаць моладзі, якіх памылак варта пазбягаць.
«Заробак быў добры, і мы маглі сабе ўсё дазволіць. Мы самі гэта выдатна разумелі і ўсё роўна ішлі ў месцы, дзе ў Кіеве збіраўся ўвесь бамонд. Мы выдатна разумелі, што нас убачаць, а мы ўсё роўна сунуліся туды і сунуліся. Як мы ні шыфраваліся – апраналі кепкі, бралі асобныя віп-месцы, а на наступны дзень ужо быў званок у пакой з прыёмнай (Суркіса). Зноў спаліліся.
Як правіла, гэта было пасля матчаў. Пасля перамог я сам тэлефанаваў Міхайлавічу і казаў: «Пацаны хочуць пагуляць». Ён ведаў, што я не пʼю - я тады быў закадаваны. І даваў нам дазвол пагуляць да трох ночы».
Сябры ўсё рабілі разам – гулялі ў футбол, гулялі ў начных клубах, а потым расплачваліся за наступствы.
«Самы вялікі штраф – 100 тысяч долараў пасля фіналу Кубка Украіны, калі мы прайгралі ў Харкаве «Шахцёру» 0:2. Мы перад матчам добра пагулялі з Арцёмам. Калі вярталіся, нас спыніла ДАІ, мы, вядома, дамовіліся з імі, але ўсё роўна ў клубе пра гэта даведаліся.
Ігар Міхайлавіч зайшоў у распранальню і зладзіў нам разбор палётаў перад усёй камандай. І сказаў, што штрафуе на 100 тысяч. Потым адна гульня, другая. Я нядрэнна згуляў, забіў. Падышоў да Суркіса кажу: «Ну, прабачце мяне, Міхайлавіч!». І ён дараваў мне гэты штраф», – распавёў Аліеў каналу «Ад душы ў душу».
Больш за тое, менавіта Мілеўскі пазнаёміў сябра з будучай жонкай Таццянай.
«У свой час у мяне была звычка: патрэнаваўся, і трэба пайсці дзесьці пагуляць. Але калі я пачаў сустракацца з Таняй, то ўсё змянілася. З Таняй я пазнаёміўся на Каляды – нас пазнаёміў Арцём. Мне было 19-20 гадоў.
У той час яшчэ былі гулнкi, але калі мы сталі жыць разам, ёй гэта не падабалася – яна ўсё ж такі і старэйшая за мяне. Дзесьці Таня пачала мяне «стопарыць». Можна сказаць, што толькі яна мяне і спыніла», – распавёў Аліеў у інтэрв'ю праграме «Сам-насам з Гамулай».
У сумесным шлюбе ў пары нарадзілася двое дзяцей – дачка Аліна і сын Арцём.
«Не падумайце, што ў гонар Мілеўскага, – кажа Аляксандр. – Проста ў мяне ініцыялы А.А. Мая дачка Аліна Аліева, таму сын будзе Арцёмам Аліевым. Акрамя таго, мы з жонкай дамаўляліся, што дачцэ дае імя яна, а сыну – я. Вядома, цяпер рана казаць, кім будзе Арцём. Але ў будучыні, вядома, хачу, каб ён стаў футбалістам».
Шлюб завяршыўся скандальным разводам і двума крымінальнымі справамі за тое, што Аляксандр падымаў руку на жонку. Аліеў часта ў інтэрвʼю каментаваў свой развод і казаў, што разборкі з Таццянай сталі прычынай праблем у футбольнай карʼеры.
«Мілеўскі ўмее сябраваць. І я ведаю, што ён ніколі не здрадзіць»
Пасля «Дынама» на некаторы час шляхі Аліева і Мілеўскага разышліся – яны гулялі ў розных клубах і краінах. Калі абодва ўжо завяршылі, то зладзілі рэюніён у Кіеве, сталі блогерамі і завялі Ютуб-каналы «Кент» і «Міля». У іх было шмат сумесных калабарацый і тусовак, але два гады таму новыя відэа перасталі выходзіць.
«Люблю Арцёма за яго сумленнасць. Ён ніколі ў жыцці не здрадзіць. Калі ён сябруе, то сябруе, незалежна ёсць у яго грошы ці не. Ведаю, што ён ніколі ў жыцці не даруе здраду. Ніколі! Для яго – гэта найбольш балюча.
Ён такі, як я. Чалавек са схаванай душой. Ён заўсёды дапаможа чалавеку, які для яго важны. Я мог пагаварыць з ім, калі мне было дрэнна ці яму. Я ведаў, што гэта застанецца паміж намі. Ён умее сябраваць. І я ведаю, што ён ніколі не здрадзіць», – казаў пра сябра Аліеў у 2021 годзе.
Поўнамаштабная вайна па-рознаму паўплывала на былых зорак «Дынама». Мілеўскі доўга не мог знайсці сябе пасля футбола, а з пачаткам расійскага ўварвання наогул запаў у дэпрэсію і давёў сябе да крытычнага стану.
Аліеў затое хутка зарыентаваўся ў сітуацыі, сышоў у тэрабарону ў пачатку агрэсіі, ужо атрымаў пасведчанне ўдзельніка баявых дзеянняў і нават перастаў мець зносіны з бацькамі праз іх пазіцыю адносна вайны.
***
А напрыканцы некалькі гісторый пра галоўных кентоў украінскага футбола.
Арцём Мілеўскі:
«Быў такі рэстаран «Карона» раней у нулявых. Памятаю, мы з Аліевым прыйшлі пасля трэнінгу паесці. Там было казіно «Карона-club» недалёка ля бара. А Міхайлавіч (Ігар Суркіс) там побач жыў.
Карацей, мы ямо, нешта там па піўку. І заходзіць Міхайлавіч у казіно. А мы там за столікам сядзелі. Я такі: «Што робім?» І мы момантам пад стол, каб нас ніхто не ўбачыў. Хутка разлічыліся і выбеглі адтуль. Гэта было вельмі даўно. Нам было яшчэ, магчыма, па 17-18 гадоў. Можа, ён нас тады яшчэ не пазнаў бы».
Арцём Мілеўскі:
«З кім не атрымалася, то гэта Даша Астаф'ева – яна вядомая спявачка ва Украіне. Тады Аліеў наламаў дроў. Мы сядзелі з ёй у холе гасцініцы, гадзін у пяць раніцы, а ён прыехаў і давай перашкаджаць: «Міля, адвязі мяне дадому». Усё і накрылася».
«Цяпер (інтэрвʼю выйшла ў 2022 годзе, – заўв.) кажуць і пішуць, што Аліеў і Мілеўскі «салодкая парачка», найлепшыя сябры. Але калі яны былі сябрамі? Ну, гулялі i гулялі, а бывала, што Арцём яго бачыць не мог. Гэта ўсё проста распісалі «Салодкая парачка» – ##### (лухта) гэта ўсё».
Фото: «Динамо» Киев
