Вядомая бягуха-беларуска паставіла кар'еру на паўзу, каб заняцца здароўем дачкі – да такога немагчыма падрыхтавацца

У жніўні 2023-га чэмпіёнка свету-2015 і Еўропы-2014 у бегу на 800 метраў Марына Арзамасава аб'явіла, што цалкам адбыла сваю чатырохгадовую дыскваліфікацыю за допінг.

Лёгкаатлетка, якая за час адхілення пачала працаваць як трэнер, коўч і нутрыцыёлаг, а яшчэ арганізаваць уласны бегавы клуб, была поўная аптымізму і планавала працаваць на карысць спорту. Відавочна, ужо не як спартсменка, бо апошні раз Арзамасава стартавала ажно ў ліпені 2019 года. Сёння ёй ужо 36.

Школы чэмпіёнка запусціла разам з мужам Іллём - ён дагэтуль актыўна выходзіць на старты ў розных дысцыплінах Ironman.

Аднак ад сваёй школы Марыне Арзамасавай давялося адысці. У пачатку лютага яна апублікавала пост, у якім заявіла аб прыпыненні карʼеры трэнера. Прычынай рашэння – праблемы са здароўем у старэйшай дачкі Аляксандры. Арзамасава не раскрыла падрабязнасцяў, толькі зазначыла, што сітуацыя няпрастая, і што на яе вырашэнне спатрэбіцца шмат часу і сіл. Пры гэтым Марына абяцала дзяліцца са сваімі падпісантамі падрабязнасцямі сітуацыі.

На днях лёгкаатлетка напісала, што не будзе называць дыягназ дачкі, але адзначыла, што захворванне носіць аўтаімунны характар, то-бок яно звязанае з парушэннем функцыянавання імуннай сістэмы чалавека, якая пачынае ўспрымаць уласныя тканіны як чужародныя і наносіць ім шкоду.

На момант публікацыі ў дзяўчынкі быў 14-ы дзень хваробы, але востры перыяд можа доўжыцца да месяца. Першы тыдзень маці магла знаходзіцца побач з дачкой у палаце, але затым дзяўчынку перавялі ў іншую лякарню ў рэанімацыю, куды наведвальнікаў пускаюць толькі на пару гадзін.

Стан дзяўчынкі быў настолькі няпростым, што медыкі казалі пра рызыку пераводу на ШВЛ, але ўсё абышлося.

Цяпер Марына спадзяецца, што хвароба больш не будзе прагрэсаваць, і гэта дазволіць выйсці на плато, калі стан дзяўчынкі будзе роўным, а затым можна чакаць спад. Як зазначае лёгкаатлетка, да такога развіцця падзей не тое што немагчыма падрых – яго проста немагчыма ўявіць у самым страшным сне.

«Але мы ведаем і верым, што хутка пачнецца перыяд аднаўлення, і мы з Іллём прыкладзем усе нашы сілы для гэтага», - запэўніла мама-трэнерка.