Арлоўскі сеў на экстрэмальную дыету па прыкладзе кіраўніка UFC. Таму прадказалі хуткую смерць, а затым вылечылі ад усіх праблем

Беларускі барэц UFC Андрэй Арлоўскі ў сваім інстаграм распавёў, што правёў 36 гадзін на адной вадзе:

«Я зрабіў гэта – першы досвед галадання. Хацеў правесці 86 гадзін на адной вадзе, як Дэйна Уайт, але пачала балець галава. Нягледзячы на гэта, адчуваў сябе цудоўна. Рэкамендую.

Наступная мэта – мінімум 72 гадзіны. Праўда, на гэтым тыдні ў ЗША адзначаюць Дзень падзякі, так што на дыету я сяду толькі ў пятніцу», – напісаў спартовец і падзяліўся здымкамі да/пасля.

Як адзначыў Арлоўскі, ён паспрабаваў паўтарыць «эксперымент» прэзідэнта UFC Дэйна Уайт, чые фатаграфіі нядаўна абляцелі ўвесь спартыўны свет. Сёння Уайту 54 гады і ён вызначана выглядае лепш, чым у тыя часы, калі толькі ўзначаліў UFС.

Уайт ніколі не хаваў, што любіць добра паесці. «Я не з тых хлопцаў, якія ядуць здаровую ежу ці нешта ў гэтым родзе, – казаў ён. – Прычына, па якой я трэніруюся, – люблю есці».

З узростам стан Уайта пагаршаўся і ён вырашыў змяніць падыход да трэніровак, але не гэта стала ключом да яго поспеху. Найважнейшую ролю ў ператварэнні амерыканца згуляў Гары Брэку – галоўным біёлагу 10X Health Systems. Як расказваў у адным з інтэрв'ю сам Уайт, Брэку здольны прадказаць дату смерці, грунтуючыся на аналізах з дакладнасцю да пары месяцаў.

Кіраўнік UFC быў проста апантаны ідэяй даведацца, колькі ж яму засталося і калі апынуўся са спецыялістам у адным горадзе, адправіўся да яго і здаў аналізы. Вынікі амерыканца былі настолькі жудаснымі, што Брэку прыляцеў да яго асабіста, каб растлумачыць усю сурʼёзнасць сітуацыі: «Ён даў мне 10 гадоў і 4 месяцы жыцця. Гэта было 16 тыдняў таму, і ён сказаў: «Калі ты не зменіш лад жыцця, вось твая чаканая працягласць жыцця». А затым Брэку дадаў: «Калі ты будзеш рабіць у бліжэйшыя 10 тыдняў усё, што я табе скажу, ты зменіш сваё жыццё».

Уайт прытрымліваўся ўсіх рэкамендацый і схуднеў на 30 фунтаў. Вырашыў праблемы з нагамі, якія ў яго былі шмат гадоў, і перастаў храпці. Разам са спецыялістам яны нават запісалі відэа, дзе разабралі праблемы Уайта.

Сёння Уайт раздае інтэрвʼю, у якіх крытыкуе афіцыйную медыцыну, рэкламуе 10X Health Systems і называе Брэка геніем.

«Водная дыета» таксама кладзецца ў гэтую канву. Вось як свой эксперымент апісваў амерыканец: «Я правёў 86 гадзін на адной вадзе, адчуваю сябе абсалютна ўзрушаючы. Я не лекар, але эксперты кажуць, што гэта змяншае рызыку развіцця рака, хваробы Альцгеймера і шматлікіх іншых праблем».

Хаця ў рэальнасці ніякіх пацверджанняў гэтаму няма. Калі б такая дыета сапраўды зніжала рызыку захворванняў, усе лекары свету ўжо даўно прызначалі б яе прафілактычна.

Такое прасоўванне 10X Health Systems і ідэй біяхакінгу выклікала хвалю крытыкі ў адрас кіраўніка UFC. Яго абвінавачваюць у рэкламе інфацыган і скамераў. Падазрэнні выклікала і даўняе сяброўства Уайта з сузаснавальнікам 10X Health Systems бізнэсмэнам і пісьменнікам Грантам Кардонам.

Што да самога Брэку, то яму таксама прыйшлося тлумачыцца. Ён адхрысціўся ад таго, што можа прадказваць дату смерці, але прызнаўся, што зрабіў сякія-такія разлікі, у якасці выключэння, для Уайта.

Але падаецца, што Брэку проста прымусіў Уайта весці здаровы лад жыцця і гэта спрацавала! А зараз кіраўнік UFC разам з магчымымі партнёрамі прадае за дорага тое, пра што вам раскажа любы добры лекар-тэрапеўт на кансультацыі!