Крыўднікі «Дынама» Мінск з трэскам праваліліся ў 1/4 фінала Кубка Гагарына – насуха саступілі камандзе з беларускім трэнерам
Сенсацыйнае фіяска масквічоў.
Маскоўскае «Дынама», якое выбіла з 1/8 Кубка Гагарына «зуброў», сенсацыйна вылецела з турніру.
Пераможцы рэгуляркі прайгралі тры матчы запар у серыі з «Трактарам», у штабе якога працуе беларускі трэнер Аляксандр Макрыцкі. У чацвёртай сустрэчы, якая праходзіла 22 сакавіка ў Чэлябінску, у «Дынама» проста не засталося права на памылку. «Трактар» жа глядзеўся ўпэўнена і быў гатовы да змагання.
Аляксандр Макрыцкі другі злева
«Дынамаўцам» удалося адкрыць лік сустрэчы – на 9-й хвіліне Мікіта Гусеў і Седрык Пакет узорна рэалізавалі большасць. Але ўжо праз дзве хвіліны госці атрымалі кур'ёзны гол у свае вароты – пасля дотыку Чарльза Робінсана шайба патрапіла ў перакладзіну, а ад яе адскочыла ў галкіпера бела-блакітных Максіма Матарыгіна і закацілася ў вароты – 1:1.
У рэшце першага перыяда «дынамаўцы» прымудрыліся прапусціць яшчэ тройчы. Здавалася, што ў гэтым матчы ўсё вырашана. Але трэнерскі штаб масквічоў знайшоў патрэбныя словы, і падапечныя здолелі скараціць адставанне да адной шайбы. Пры ліку 3:4 у дынамаўскіх заўзятараў замігцела надзея, што іх каманда зможа паўтарыць камбэк з другога матча, калі яны адгуляліся з 2:4 за перыяд.
Але каманда беларускага трэнера была супраць – на 55-й хвіліне Ілля Карпухін змог адабраць шайбу ў суперніка і выкінуць яе ў сярэднюю зону, дзе ўключыўся Максім Шабанаў. Форвард «Трактара» падхапіў шайбу, паскорыўся, зрабіў віраж на пятачок, абʼехаў брамніка і закінуў пяты гол у сетку «Дынама».
На апошняй хвіліне Эрык О’Дэл шчоўкнуў пад перакладзіну і скараціў адставанне да мінімуму. Але адгуляцца масквічы ўжо не паспелі.
«Трактар» утрымаў перавагу і выйграў матч, а разам з ім і ўсю серыю, ды яшчэ ўсухую – 4-0!
Маскоўскае «Дынама», якое выйграла рэгулярны чэмпіянат КХЛ, у след за сваімі мінскімі калегамі адправілася ў адпачынак. А каманда Макрыцкага чакае ў паўфінале пераможцу пары «Авангард» – «Лакаматыў». Лік у гэтай серыі 1-3 на карысць Яраслаўля.