Маўчанне Ганчарэнкі ідзе ў масы: яго касплэяць у хакейнай «Лідзе», а «Урал» запусціў продаж лімітаванага мерчу
«Няма слоў».
10 тур расійскай прэм'ер-лігі падарыў вельмі яскравы мем: беларускі галоўны трэнер «Урала» Віктар Ганчарэнка быў настолькі раззлаваны судзействам у матчы супраць «Растова», што не вымавіў ні слова на пасляматчавых інтэрв'ю, затое дырэктар уральцаў Рыгор Іваноў, вядомы сваім эпатажам і лексіконам «блатнога» узроўню, маўчаць не стаў – хацеў утапіць суддзяў і выбегчы на поле з бітай.
Цяпер маўчанне Ганчарэнкі паступова замацоўваецца ў спартыўнай культуры. Так, перад кубкавым матчам з «Рубінам» 3 кастрычніка, «Урал» у сацсетках анансаваў лімітаваны мерч – чорная майка з вачыма беларуса і надпісам «Няма слоў», якую будуць прадаваць у дзень матчу ў кропках прадаж на стадыёне.
Дабраўся мем і да Беларусі. Хакейная «Ліда» ў сацсетках абыграла вяртанне ў асноўны склад форварда Антона Іванкоўскага ў стылістыцы інтэрв'ю Ганчарэнкі. Хакеісту прыгадалі і дрэнную статыстыку – у яго няма галявых дзеянняў за 9 матчаў экстралігі.
